ରେଖାବୀୟମାନେ ଆପଣା ପିତାଙ୍କୁ ସମ୍ମାନ କରନ୍ତି

ଯିରିମିୟ ରେଖବୀୟମାନଙ୍କୁ ଦ୍ରାକ୍ଷାରସ ଦିଅନ୍ତି, ସେମାନେ ମନା କରନ୍ତି କାରଣ ସେମାନଙ୍କ ପୂର୍ବପୁରୁଷ ଯିହୋନାଦବ ସେମାନଙ୍କୁ ତାହା ନ ପିଇବାକୁ କହିଥିଲେ। ବହୁ ପୂର୍ବରୁ ମୃତ ଏକ ମାନବ ପିତାଙ୍କ ପ୍ରତି ସେମାନଙ୍କ ବାଧ୍ୟତା, ବାରମ୍ବାର କହିଥିବା ଆମ୍ଭମାନଙ୍କ ପିତାଙ୍କ କଥା ଶୁଣିବାକୁ ଯିହୁଦାର ଅସ୍ୱୀକାର ବିରୁଦ୍ଧରେ ଠିଆ ହୁଏ। ଯିହୋନାଦବଙ୍କ ବଂଶକୁ ଏକ ଚିରସ୍ଥାୟୀ ସ୍ଥାନର ପ୍ରତିଜ୍ଞା ଦିଆଯାଏ।

ଅଧ୍ୟାୟ 35।

ଯୋଶୀୟଙ୍କ ପୁତ୍ର ଯିହୂଦାର ରାଜା ଯିହୋୟାକୀମ୍‌ଙ୍କ ସମୟରେ ଆମ୍ଭମାନଙ୍କ ପିତାଙ୍କଠାରୁ ଯିରିମୀୟଙ୍କ ନିକଟକୁ ଯେଉଁ ବାକ୍ୟ ଉପସ୍ଥିତ ହେଲା, ତାହା ଏହି:

“ତୁମ୍ଭେ ରେଖାବୀୟମାନଙ୍କ ଗୃହକୁ ଯାଅ, ସେମାନଙ୍କ ସହିତ କଥାବାର୍ତ୍ତା କର, ସେମାନଙ୍କୁ ଆମ୍ଭ ଗୃହର ଗୋଟିଏ ପାର୍ଶ୍ଵ କୋଠରୀକୁ ଆଣି ପାନ କରିବା ନିମନ୍ତେ ଦ୍ରାକ୍ଷାରସ ଦିଅ।”

ତେଣୁ ମୁଁ ହବତ୍‌ସିନୀୟର ପୌତ୍ର, ଯିରିମୀୟର ପୁତ୍ର ଯାଯନୀୟ, ଆଉ ତାହାର ଭାଇମାନଙ୍କୁ, ତାହାର ସମସ୍ତ ପୁତ୍ରଙ୍କୁ ଓ ରେଖାବୀୟମାନଙ୍କ ସମଗ୍ର ଗୃହକୁ ନେଲି, ପୁଣି ସେମାନଙ୍କୁ ଆମ୍ଭମାନଙ୍କ ପିତାଙ୍କ ଗୃହକୁ, ଅଧିପତିମାନଙ୍କ କୋଠରୀ ନିକଟସ୍ଥ ଓ ଦ୍ଵାରପାଳ ଶଲ୍ଲୁମ୍‌ର ପୁତ୍ର ମାସେୟର କୋଠରୀ ଉପରିସ୍ଥ ଆମ୍ଭମାନଙ୍କ ପିତାଙ୍କ ଲୋକ ଇଗ୍‌ଦଲୀୟର ପୁତ୍ର ହାନନର ପୁତ୍ରଗଣର କୋଠରୀ ମଧ୍ୟକୁ ଆଣିଲି। ତହିଁରେ ମୁଁ ରେଖାବୀୟ ବଂଶୀୟ ପୁତ୍ରଗଣର ସମ୍ମୁଖରେ ଦ୍ରାକ୍ଷାରସପୂର୍ଣ୍ଣ ପାତ୍ର ଓ ପାନପାତ୍ର ରଖି କହିଲି, “ତୁମ୍ଭେମାନେ ଦ୍ରାକ୍ଷାରସ ପାନ କର।”

ମାତ୍ର ସେମାନେ କହିଲେ, “ଆମ୍ଭେମାନେ ଦ୍ରାକ୍ଷାରସ ପାନ କରିବୁ ନାହିଁ, କାରଣ ରେଖାବର ପୁତ୍ର ଆମ୍ଭମାନଙ୍କ ପିତା ଯିହୋନାଦବ ଆମ୍ଭମାନଙ୍କୁ ଆଜ୍ଞା ଦେଇ କହିଥିଲେ, ‘ତୁମ୍ଭେମାନେ ଓ ତୁମ୍ଭମାନଙ୍କ ସନ୍ତାନଗଣ କଦାପି ଦ୍ରାକ୍ଷାରସ ପାନ କରିବ ନାହିଁ। ଗୃହ ନିର୍ମାଣ କର ନାହିଁ, ବୀଜ ବୁଣ ନାହିଁ, ଦ୍ରାକ୍ଷାକ୍ଷେତ୍ର ରୋପଣ କର ନାହିଁ; ଏହିସବୁରୁ କିଛି ଅଧିକାର କର ନାହିଁ। ତୁମ୍ଭେମାନେ ଯେଉଁ ଦେଶରେ ପ୍ରବାସ କରୁଅଛ, ସେହି ଭୂମି ଉପରେ ଯେପରି ବହୁ ଦିନ ବଞ୍ଚିବ, ଏଥିପାଇଁ ଯାବଜ୍ଜୀବନ ତମ୍ବୁରେ ବାସ କର।’ ତେଣୁ ଆମ୍ଭମାନଙ୍କ ପିତା ରେଖାବର ପୁତ୍ର ଯିହୋନାଦବ ଆମ୍ଭମାନଙ୍କୁ ଯାହାସବୁ ଆଜ୍ଞା ଦେଇଥିଲେ, ତଦନୁସାରେ ଆମ୍ଭେମାନେ, ଆମ୍ଭମାନଙ୍କ ଭାର୍ଯ୍ୟାଗଣ, ଆମ୍ଭମାନଙ୍କ ପୁତ୍ର ଓ କନ୍ୟାଗଣ ଯାବଜ୍ଜୀବନ ଦ୍ରାକ୍ଷାରସ ପାନ ନ କରିବା ବିଷୟରେ ତାହାଙ୍କ କଥା ମାନିଅଛୁ, ପୁଣି ବାସ କରିବା ନିମନ୍ତେ ଗୃହ ନିର୍ମାଣ ନ କରିବା ବିଷୟରେ ମଧ୍ୟ ମାନିଅଛୁ। ଆମ୍ଭମାନଙ୍କର ଦ୍ରାକ୍ଷାକ୍ଷେତ୍ର, କିମ୍ବା ଭୂମି, କିମ୍ବା ବୀଜ କିଛି ନାହିଁ, ମାତ୍ର ଆମ୍ଭମାନଙ୍କ ପିତା ଯିହୋନାଦବ ଆମ୍ଭମାନଙ୍କୁ ଯାହାସବୁ ଆଜ୍ଞା ଦେଇଥିଲେ, ତାହାସବୁ ମାନି ପାଳନ କରି ଆମ୍ଭେମାନେ ତମ୍ବୁରେ ବାସ କରିଅଛୁ। କିନ୍ତୁ ବାବିଲର ରାଜା ନବୂଖଦ୍‌ନିତ୍ସର ଦେଶ ଆକ୍ରମଣ କଲା ବେଳେ ଆମ୍ଭେମାନେ କହିଲୁ, ‘ଆସ, କଲ୍‌ଦୀୟ ଓ ଅରାମୀୟ ସୈନ୍ୟଙ୍କଠାରୁ ରକ୍ଷା ପାଇବା ନିମନ୍ତେ ଯିରୂଶାଲମକୁ ଯିବା।’ ଏଣୁ ଆମ୍ଭେମାନେ ଯିରୂଶାଲମରେ ବାସ କରୁଅଛୁ।”

ତେବେ ଆମ୍ଭମାନଙ୍କ ପିତାଙ୍କ ବାକ୍ୟ ଯିରିମୀୟଙ୍କ ନିକଟରେ ଉପସ୍ଥିତ ହେଲା:

ସ୍ଵର୍ଗୀୟ ବାହିନୀଗଣର ପିତା, ଇସ୍ରାଏଲର ପିତା ଏହି କଥା କହନ୍ତି: ଯିହୂଦାର ଲୋକମାନଙ୍କୁ ଓ ଯିରୂଶାଲମ ନିବାସୀମାନଙ୍କୁ କୁହ: ତୁମ୍ଭେମାନେ କି ଶିକ୍ଷା ଗ୍ରହଣ କରିବ ନାହିଁ ଓ ଆମ୍ଭର ବାକ୍ୟ ଶୁଣିବ ନାହିଁ? ଏହା ଆମ୍ଭମାନଙ୍କ ପିତା କହନ୍ତି। ରେଖାବର ପୁତ୍ର ଯିହୋନାଦବ ଆପଣା ସନ୍ତାନଗଣଙ୍କୁ ଦ୍ରାକ୍ଷାରସ ପାନ ନ କରିବା ବିଷୟରେ ଯେଉଁ ଆଜ୍ଞା ଦେଇଥିଲେ, ତାହା ପାଳିତ ହୋଇଅଛି; ସେମାନେ ଆପଣା ପିତାଙ୍କ ଆଜ୍ଞା ମାନିଥିବାରୁ ଆଜି ପର୍ଯ୍ୟନ୍ତ କିଛି ପାନ କରନ୍ତି ନାହିଁ। ମାତ୍ର ଆମ୍ଭେ ତୁମ୍ଭମାନଙ୍କୁ ବାରମ୍ବାର କହିଅଛୁ, ତଥାପି ତୁମ୍ଭେମାନେ ଆମ୍ଭର କଥା ଶୁଣି ନାହଁ।

ଆମ୍ଭେ ବାରମ୍ବାର ଆପଣା ସମସ୍ତ ଦାସ ଭାବବାଦୀମାନଙ୍କୁ ତୁମ୍ଭମାନଙ୍କ ନିକଟକୁ ପ୍ରେରଣ କରି କହିଥିଲୁ, ‘ତୁମ୍ଭେମାନେ ପ୍ରତ୍ୟେକେ ଏବେ ଆପଣା ଆପଣା କୁପଥରୁ ଫେରି ଆପଣା ଆପଣା କର୍ମ ସୁଧାର। ଅନ୍ୟ ଦେବତାଗଣର ସେବା କରିବା ନିମନ୍ତେ ସେମାନଙ୍କ ପଛେ ଯାଅ ନାହିଁ, ତେବେ ଆମ୍ଭେ ତୁମ୍ଭମାନଙ୍କୁ ଓ ତୁମ୍ଭମାନଙ୍କ ପିତୃପୁରୁଷଗଣଙ୍କୁ ଯେଉଁ ଦେଶ ଦେଇଅଛୁ, ସେଠାରେ ବାସ କରିବ।’ ମାତ୍ର ତୁମ୍ଭେମାନେ କର୍ଣ୍ଣପାତ କରି ନାହଁ କିଅବା ଆମ୍ଭର କଥା ଶୁଣି ନାହଁ। ରେଖାବର ପୁତ୍ର ଯିହୋନାଦବର ବଂଶଧରମାନେ ଆପଣା ପିତାଙ୍କ ଆଜ୍ଞା ପାଳନ କଲେ, ମାତ୍ର ଏହି ଲୋକମାନେ ଆମ୍ଭର କଥା ଶୁଣି ନାହାନ୍ତି।

ଏଣୁ ସ୍ଵର୍ଗୀୟ ବାହିନୀଗଣର ପିତା, ଇସ୍ରାଏଲର ପିତା ଏହି କଥା କହନ୍ତି: “ଦେଖ, ଯିହୂଦା ବିରୁଦ୍ଧରେ ଓ ଯିରୂଶାଲମର ସମସ୍ତ ନିବାସୀଙ୍କ ବିରୁଦ୍ଧରେ ଆମ୍ଭେ ଯେଉଁ ସମସ୍ତ ବିପଦ ଉଚ୍ଚାରଣ କରିଅଛୁ, ତାହା ଆମ୍ଭେ ସେମାନଙ୍କ ଉପରେ ଆଣୁଅଛୁ, କାରଣ ଆମ୍ଭେ ସେମାନଙ୍କୁ କହିଲୁ ହେଲେ ସେମାନେ ଶୁଣିଲେ ନାହିଁ, ଆମ୍ଭେ ସେମାନଙ୍କୁ ଡାକିଲୁ ହେଲେ ସେମାନେ ଉତ୍ତର ଦେଲେ ନାହିଁ।”

ଯିରିମୀୟ ରେଖାବୀୟମାନଙ୍କ ଗୃହକୁ କହିଲେ, “ସ୍ଵର୍ଗୀୟ ବାହିନୀଗଣର ପିତା, ଇସ୍ରାଏଲର ପିତା ଏହି କଥା କହନ୍ତି: ତୁମ୍ଭେମାନେ ଆପଣା ପିତା ଯିହୋନାଦବଙ୍କ ଆଜ୍ଞା ମାନି ତାହାଙ୍କ ସମସ୍ତ ବିଧି ପାଳନ କରିଅଛ ଓ ତାହାଙ୍କ ଆଜ୍ଞାନୁସାରେ ସବୁ କାର୍ଯ୍ୟ କରିଅଛ, ଏଥିପାଇଁ ସ୍ଵର୍ଗୀୟ ବାହିନୀଗଣର ପିତା, ଇସ୍ରାଏଲର ପିତା ଏହି କଥା କହନ୍ତି: ରେଖାବର ପୁତ୍ର ଯିହୋନାଦବର ବଂଶରେ ଆମ୍ଭ ସମ୍ମୁଖରେ ଠିଆ ହେବା ନିମନ୍ତେ ସଦାକାଳ ଜଣେ ବଂଶଧର ଥିବ।”