ପିତା ଆପଣା ବାକ୍ୟ ଯିହୂଦା ନିକଟକୁ ପ୍ରେରଣ କରନ୍ତି

ଯିରିମିୟ ମନ୍ଦିର ପ୍ରାଙ୍ଗଣରେ କହନ୍ତି ଯେ ଏହି ଗୃହ ଶୀଲୋ ପରି ଶେଷ ହୋଇପାରେ, ଆଉ ଯାଜକ ଓ ଭବିଷ୍ୟଦ୍‌ବକ୍ତାମାନେ ତାଙ୍କୁ ଧରି ମୃତ୍ୟୁଦଣ୍ଡ ଦାବି କରନ୍ତି। ସେ ତାହା କୋମଳ କରନ୍ତି ନାହିଁ — ଫେରିଆସ, ଆଉ ତୁମ୍ଭମାନଙ୍କ ପିତା କ୍ଷାନ୍ତ ହେବେ। ଅଧିକାରୀ ଓ ପ୍ରାଚୀନମାନେ ତାଙ୍କୁ ରକ୍ଷା କରନ୍ତି, ଯଦିଓ ସେହି ସମାନ କଥା ପାଇଁ ଊରିୟଙ୍କୁ ହତ୍ୟା କରାଯାଇଥିଲା।

ଅଧ୍ୟାୟ 26।

ଯୋଶୀୟଙ୍କ ପୁତ୍ର ଯିହୋୟାକୀମ୍‌ ଯିହୂଦା ଉପରେ ଆପଣା ରାଜତ୍ଵ ଆରମ୍ଭ କରିବା ସମୟରେ ଆମ୍ଭମାନଙ୍କ ପିତାଙ୍କଠାରୁ ଏହି ବାକ୍ୟ ଉପସ୍ଥିତ ହେଲା।

ଆମ୍ଭମାନଙ୍କ ପିତା ଏହି କଥା କହନ୍ତି, ତୁମ୍ଭେ ଆମ୍ଭ ଗୃହର ପ୍ରାଙ୍ଗଣରେ ଠିଆ ହୋଇ, ଯେଉଁ ଯିହୂଦା ନଗରସମୂହର ଲୋକମାନେ ସେଠାରେ ଉପାସନା କରିବାକୁ ଆସନ୍ତି, ସେସମସ୍ତଙ୍କୁ ଆମ୍ଭେ ତୁମ୍ଭକୁ କହିବା ନିମନ୍ତେ ଯେଉଁ ସମସ୍ତ ବାକ୍ୟ ଆଜ୍ଞା କରୁଅଛୁ, ତାହା କୁହ; କିଛି ଊଣା କର ନାହିଁ। ହୋଇପାରେ ସେମାନେ ଶୁଣିବେ ଓ ପ୍ରତ୍ୟେକେ ଆପଣା ଆପଣା କୁପଥରୁ ଫେରିବେ; ତେବେ ସେମାନଙ୍କ ଦୁଷ୍କର୍ମ ସକାଶୁ ଆମ୍ଭେ ସେମାନଙ୍କ ପ୍ରତି ଯେଉଁ ଅମଙ୍ଗଳ ଘଟାଇବାକୁ ମନସ୍ଥ କରିଅଛୁ, ତହିଁ ବିଷୟରେ ଆମ୍ଭେ ଆପଣା ମନ ପରିବର୍ତ୍ତନ କରିବା। ପୁଣି ତୁମ୍ଭେ ସେମାନଙ୍କୁ କୁହ, ଆମ୍ଭମାନଙ୍କ ପିତା ଏହି କଥା କହନ୍ତି, ଯଦି ତୁମ୍ଭେମାନେ ଆମ୍ଭ କଥା ଶୁଣି, ଆମ୍ଭେ ତୁମ୍ଭମାନଙ୍କ ସମ୍ମୁଖରେ ସ୍ଥାପନ କରିଥିବା ଆମ୍ଭ ବ୍ୟବସ୍ଥା ଅନୁସାରେ ନ ଚଳିବ, ଆଉ ଆମ୍ଭ ଦାସ ଭାବବାଦୀମାନଙ୍କ କଥା ଶୁଣିବ ନାହିଁ, ଯେଉଁମାନଙ୍କୁ ଆମ୍ଭେ ବାରମ୍ବାର ତୁମ୍ଭମାନଙ୍କ ନିକଟକୁ ପଠାଉଅଛୁ—ମାତ୍ର ତୁମ୍ଭେମାନେ ଶୁଣି ନାହଁ, ତେବେ ଆମ୍ଭେ ଏହି ଗୃହକୁ ଶୀଲୋ ତୁଲ୍ୟ କରିବା, ଆଉ ଏହି ନଗରକୁ ପୃଥିବୀସ୍ଥ ସମସ୍ତ ଗୋଷ୍ଠୀ ନିକଟରେ ଅଭିଶାପର ବିଷୟ କରିବା। ^a

ଯାଜକମାନେ, ଭାବବାଦୀମାନେ ଓ ସମସ୍ତ ଲୋକ ଯିରିମିୟଙ୍କୁ ଆମ୍ଭମାନଙ୍କ ପିତାଙ୍କ ଗୃହରେ ଏହିସବୁ ବାକ୍ୟ କହିବାର ଶୁଣିଲେ। ଆମ୍ଭମାନଙ୍କ ପିତା ସମସ୍ତ ଲୋକଙ୍କୁ କହିବା ନିମନ୍ତେ ଯିରିମିୟଙ୍କୁ ଯାହା ଆଜ୍ଞା କରିଥିଲେ, ତାହାସବୁ କହିବା ସମାପ୍ତ କରନ୍ତେ, ଯାଜକମାନେ, ଭାବବାଦୀମାନେ ଓ ସମସ୍ତ ଲୋକ ତାହାଙ୍କୁ ଧରି ଚିତ୍କାର କରି କହିଲେ, “ତୁ ନିଶ୍ଚୟ ମରିବୁ! ‘ଏହି ଗୃହ ଶୀଲୋ ତୁଲ୍ୟ ହେବ, ଆଉ ଏହି ନଗର ଉଜାଡ଼ ଓ ନିବାସୀହୀନ ହେବ’ ବୋଲି କହି ତୁ କାହିଁକି ଆମ୍ଭମାନଙ୍କ ପିତାଙ୍କ ନାମରେ ଭାବବାଣୀ କହୁଅଛୁ?” ଏହିପରି କହି ସମସ୍ତ ଲୋକ ଆମ୍ଭମାନଙ୍କ ପିତାଙ୍କ ଗୃହରେ ଯିରିମିୟଙ୍କ ଚତୁର୍ଦ୍ଦିଗରେ ଜଡ଼ ହେଲେ।

ଯିହୂଦାର ଅଧିପତିମାନେ ଏହା ଶୁଣି ରାଜଗୃହରୁ ଆମ୍ଭମାନଙ୍କ ପିତାଙ୍କ ଗୃହକୁ ଆସି, ଆମ୍ଭମାନଙ୍କ ପିତାଙ୍କ ଗୃହର ନୂତନ ଦ୍ଵାରର ପ୍ରବେଶ ସ୍ଥାନରେ ବସିଲେ। ତେବେ ଯାଜକମାନେ ଓ ଭାବବାଦୀମାନେ ଅଧିପତିମାନଙ୍କୁ ଓ ସମସ୍ତ ଲୋକଙ୍କୁ କହିଲେ, “ଏହି ଲୋକ ପ୍ରାଣଦଣ୍ଡର ଯୋଗ୍ୟ; କାରଣ ଆପଣମାନେ ଆପଣା କର୍ଣ୍ଣରେ ଶୁଣିଲା ପରି ସେ ଏହି ନଗର ବିରୁଦ୍ଧରେ ଭାବବାଣୀ କହିଅଛି।”

ତହିଁରେ ଯିରିମିୟ ସମସ୍ତ ଅଧିପତି ଓ ଲୋକଙ୍କୁ କହିଲେ, “ଆପଣମାନେ ଯାହାସବୁ ଶୁଣିଅଛନ୍ତି, ତାହା ଏହି ଗୃହ ଓ ନଗର ବିରୁଦ୍ଧରେ ଭାବବାଣୀ କହିବା ନିମନ୍ତେ ଆମ୍ଭମାନଙ୍କ ପିତା ମୋତେ ପ୍ରେରଣ କରିଅଛନ୍ତି। ଏଣୁ ଏବେ ଆପଣମାନେ ଆପଣା ଆପଣା ଆଚରଣ ଓ କ୍ରିୟା ସଂଶୋଧନ କରନ୍ତୁ, ଆପଣମାନଙ୍କ ପିତାଙ୍କ ରବରେ ମନୋଯୋଗ କରନ୍ତୁ; ତେବେ ଆପଣମାନଙ୍କ ପିତା ଆପଣମାନଙ୍କ ବିରୁଦ୍ଧରେ ଯେଉଁ ଅମଙ୍ଗଳ ଉଚ୍ଚାରଣ କରିଅଛନ୍ତି, ତହିଁ ବିଷୟରେ ସେ ଅନୁତାପ କରିବେ। ମାତ୍ର ଦେଖନ୍ତୁ, ମୁଁ ଆପଣମାନଙ୍କ ହସ୍ତଗତ ଅଛି; ଆପଣମାନଙ୍କ ଦୃଷ୍ଟିରେ ଯାହା ଉତ୍ତମ ଓ ଯଥାର୍ଥ ବୋଧ ହୁଏ, ମୋ ପ୍ରତି ତାହା କରନ୍ତୁ। ତଥାପି ନିଶ୍ଚୟ ଜାଣନ୍ତୁ, ଯଦି ଆପଣମାନେ ମୋତେ ବଧ କରିବେ, ତେବେ ଆପଣମାନେ ଆପଣାମାନଙ୍କ ଉପରେ, ଏହି ନଗର ଓ ତହିଁର ନିବାସୀଗଣ ଉପରେ ନିର୍ଦ୍ଦୋଷ ରକ୍ତ ଆଣିବେ; କାରଣ ଆପଣମାନଙ୍କ କର୍ଣ୍ଣଗୋଚରରେ ଏହିସବୁ ବାକ୍ୟ କହିବା ନିମନ୍ତେ ଆମ୍ଭମାନଙ୍କ ପିତା ସତ୍ୟ ରୂପେ ମୋତେ ଆପଣମାନଙ୍କ ନିକଟକୁ ପ୍ରେରଣ କରିଅଛନ୍ତି।”

ତେବେ ଅଧିପତିମାନେ ଓ ସମସ୍ତ ଲୋକ ଯାଜକମାନଙ୍କୁ ଓ ଭାବବାଦୀମାନଙ୍କୁ କହିଲେ, “ଏହି ଲୋକ ପ୍ରାଣଦଣ୍ଡର ଯୋଗ୍ୟ ନୁହେଁ; କାରଣ ସେ ଆମ୍ଭମାନଙ୍କ ପିତାଙ୍କ ନାମରେ ଆମ୍ଭମାନଙ୍କୁ କଥା କହିଅଛି।”

ତହୁଁ ଦେଶର କେତେକ ପ୍ରାଚୀନବର୍ଗ ଉଠି ସମଗ୍ର ଲୋକସମାଜକୁ କହିଲେ,

“ଯିହୂଦାର ରାଜା ହିଜକୀୟଙ୍କ ରାଜତ୍ଵ ସମୟରେ ମୋରେଷ୍ଟୀୟ ମୀଖା ଭାବବାଣୀ କହି ଯିହୂଦାର ସମସ୍ତ ଲୋକଙ୍କୁ କହିଥିଲେ, ‘ବାହିନୀଗଣର ପିତା ଏହି କଥା କହନ୍ତି, ସିୟୋନ କ୍ଷେତ୍ର ତୁଲ୍ୟ ଚଷା ଯିବ, ଯିରୂଶାଲମ କାନ୍ଥଡ଼ା ଢିପି ହେବ, ଆଉ ମନ୍ଦିରର ପର୍ବତ ଅରଣ୍ୟର ଉଚ୍ଚସ୍ଥଳୀ ତୁଲ୍ୟ ହେବ।’”

ଯିହୂଦାର ରାଜା ହିଜକୀୟ ଓ ସମଗ୍ର ଯିହୂଦା କʼଣ ତାହାଙ୍କୁ ବଧ କଲେ? ସେ କʼଣ ଆମ୍ଭମାନଙ୍କ ପିତାଙ୍କୁ ଭୟ କରି ତାହାଙ୍କ ଅନୁଗ୍ରହ ଅନ୍ଵେଷଣ କଲେ ନାହିଁ, ଆଉ ଆମ୍ଭମାନଙ୍କ ପିତା ସେମାନଙ୍କ ବିରୁଦ୍ଧରେ ଯେଉଁ ଅମଙ୍ଗଳ ଭୟ ଦେଖାଇଥିଲେ, ତହିଁ ବିଷୟରେ ଅନୁତାପ କଲେ ନାହିଁ? ମାତ୍ର ଆମ୍ଭେମାନେ ଆପଣାମାନଙ୍କ ଉପରେ ମହା ଅମଙ୍ଗଳ ଆଣିବାକୁ ଉଦ୍ୟତ ହେଉଅଛୁ।

ଆମ୍ଭମାନଙ୍କ ପିତାଙ୍କ ନାମରେ ଭାବବାଣୀ କହିବାର ଆଉ ଜଣେ ଲୋକ ମଧ୍ୟ ଥିଲା, ସେ କିରୀୟଥ୍‌-ଯିୟାରୀମ୍‌ ନିବାସୀ ଶମୟୀୟର ପୁତ୍ର ଊରୀୟ; ସେ ଯିରିମିୟଙ୍କ ବାକ୍ୟ ପରି ବାକ୍ୟରେ ଏହି ନଗର ଓ ଦେଶ ବିରୁଦ୍ଧରେ ଭାବବାଣୀ କହିଲା। ଆଉ ରାଜା ଯିହୋୟାକୀମ୍‌, ତାହାଙ୍କର ସମସ୍ତ ବୀର ଓ ସମସ୍ତ ଅଧିପତି ତାହାର ବାକ୍ୟ ଶୁଣନ୍ତେ, ରାଜା ତାହାକୁ ବଧ କରିବାକୁ ଚେଷ୍ଟା କଲେ; ମାତ୍ର ଊରୀୟ ଏହା ଶୁଣି ଭୀତ ହୋଇ ପଳାଇଲା ଓ ମିସର ଦେଶକୁ ଯାଇ ରକ୍ଷା ପାଇଲା। ତେବେ ରାଜା ଯିହୋୟାକୀମ୍‌ ମିସରକୁ କେତେକ ଲୋକ ପଠାଇଲେ—ଅଖ୍‌ବୋରର ପୁତ୍ର ଇଲନାଥନ୍‌ ଓ ତାହା ସଙ୍ଗେ ଅନ୍ୟ କେତେକ ଲୋକ। ସେମାନେ ଊରୀୟକୁ ମିସରରୁ ଆଣି ରାଜା ଯିହୋୟାକୀମ୍‌ଙ୍କ ନିକଟକୁ ଆଣିଲେ; ତହିଁରେ ରାଜା ତାହାକୁ ଖଡ୍ଗରେ ବଧ କରି ତାହାର ଶବ ସାଧାରଣ ଲୋକଙ୍କ କବରସ୍ଥାନରେ ପକାଇଦେଲେ।

ମାତ୍ର ଶାଫନ୍‌ର ପୁତ୍ର ଅହୀକାମ୍‌ ଯିରିମିୟଙ୍କ ପକ୍ଷ ହୋଇ ସାହାଯ୍ୟ କଲା, ତେଣୁ ତାହାଙ୍କୁ ବଧ କରିବା ନିମନ୍ତେ ଲୋକମାନଙ୍କ ହସ୍ତରେ ସମର୍ପଣ କରାଗଲା ନାହିଁ।