Ithe witũ Atũma Kiugo Gĩake kũrĩ Juda

Jeremia akoigĩra nja ya Hekaarũ atĩ nyũmba ĩno no ĩthire ta Shilo, nao athĩnjĩri Ngai na anabii makamũnyiita, makĩenda ooragwo. Ndanyihanyihia ũhoro ũcio: cookai, naake Ithe wanyu nĩegũtiga ũndũ ũcio. Anene na athuuri makamũhonokia, o na gũtuĩka Uria ooragirwo nĩ ũndũ wa ciugo o icio.

Gĩcunjĩ 26.

Rĩrĩa Jehoiakimu mũrũ wa Josia aambĩrĩirie gũthamaka bũrũri wa Juda, kiugo gĩkĩ gĩgĩũka kuuma kũrĩ Ithe witũ atĩrĩ:

Ũũ nĩguo Ithe witũ ekuuga atĩrĩ: Rũgama nja ya nyũmba yakwa, wĩre matũũra moothe ma Juda marĩa mokaga kũhooya kuo ciugo ciothe iria ngũgwatha ũarie; ndũkahithe o na kĩmwe. Hihi nĩmakaamũigua, o mũndũ agarũrũke atigane na njĩra yake njũru; naguo niĩ njerire ũhoro wa mwanangĩko ũrĩa ndaaciirĩire kũmarehere nĩ ũndũ wa ciĩko ciao njũru. Meere atĩrĩ: Ũũ nĩguo Ithe witũ ekuuga atĩrĩ: Mũngĩkorwo mũtikaanjigua, nĩguo mũthiĩ kũringana na watho wakwa ũrĩa ndĩmũigĩĩire mbere, o na kũigua ndungata ciakwa anabii, arĩa ndĩmũtũmagĩra kaingĩ kaingĩ—no mũtirĩ mwamaigua, hĩndĩ ĩyo nĩngatua nyũmba ĩno ĩhaane ta Shilo, narĩo itũũra rĩĩrĩ ndĩrĩtue kĩrumi harĩ ndũũrĩrĩ ciothe cia thĩ. ^a

Nao athĩnjĩri Ngai, na anabii, na andũ othe makĩigua Jeremia akĩaria ciugo icio thĩinĩ wa nyũmba ya Ithe witũ. Na rĩrĩa Jeremia aarĩkirie kwaria maũndũ mothe marĩa Ithe witũ aamwathĩte eere andũ othe, athĩnjĩri Ngai, na anabii, na andũ othe makĩmũnyiita, makĩanĩrĩra atĩrĩ, “Ti-itherũ nĩũgũkua! Nĩkĩĩ ũrathage ũrathi na rĩĩtwa rĩa Ithe witũ, ũkiuga atĩrĩ, ‘Nyũmba ĩno ĩgaatuĩka ta Shilo, narĩo itũũra rĩĩrĩ rĩgaatuĩka ihooru, rĩtarĩ mũndũ ũtũũraga kuo’?” Nao andũ othe magĩthiũrũrũkĩria Jeremia thĩinĩ wa nyũmba ya Ithe witũ.

Rĩrĩa anene a Juda maiguire ũhoro ũcio, makĩambata kuuma nyũmba ya mũthamaki magĩthiĩ nyũmba ya Ithe witũ, magĩĩikarĩra itoonyero rĩa Kĩhingo-kĩrĩa-Kĩerũ gĩa nyũmba ya Ithe witũ. Nao athĩnjĩri Ngai na anabii makĩĩra anene acio na andũ othe atĩrĩ, “Mũndũ ũyũ aagĩrĩirwo nĩ gũkua; nĩarathĩte ũrathi wa gũũkĩrĩra itũũra rĩĩrĩ, o ta ũrĩa inyuĩ ene mwĩiguĩire.”

Nake Jeremia akĩĩra anene acio othe na andũ atĩrĩ, “Ithe witũ nĩwe wandũmire njũkĩrĩre nyũmba ĩno na itũũra rĩĩrĩ na ũrathi, ngĩaria maũndũ mothe marĩa mwaiguire. Nĩ ũndũ ũcio garũrai mĩthiĩre yanyu na ciĩko cianyu, mwathĩkĩre mũgambo wa Ithe wanyu, na Ithe wanyu nĩakeerira ũhoro wa mwanangĩko ũrĩa aamwarĩrĩirie. No rĩrĩ, niĩ ndĩ haha, mookoinĩ manyu. Njĩĩkĩrai o ũrĩa mũkuona arĩ wega na kĩhooto harĩ inyuĩ. No rĩrĩ, menyai wega atĩrĩ: mũngĩnjũraga, nĩmũkeerehera thakame ĩtarĩ na ihĩtia igũrũ rĩanyu, na igũrũ rĩa itũũra rĩĩrĩ, na atũũri a rĩo—nĩ ũndũ ma Ithe witũ nĩwe wandũmire kũrĩ inyuĩ njarie ciugo ici ciothe mũkĩiguaga.”

Nao anene na andũ othe makĩĩra athĩnjĩri Ngai na anabii atĩrĩ, “Mũndũ ũyũ ndaagĩrĩirwo nĩ gũtuĩrwo ciira wa gĩkuũ, nĩgũkorwo atwaarĩirie na rĩĩtwa rĩa Ithe witũ.”

Nao athuuri amwe a bũrũri makĩrũgama, makĩĩra kĩũngano gĩothe kĩa andũ atĩrĩ,

“Maika wa Moreshethu nĩ ararathire ũrathi hĩndĩ ĩrĩa Hezekia aathamakaga Juda, akĩĩra andũ othe a Juda atĩrĩ, ‘Ũũ nĩguo Ithe wa mbũtũ cia ita cia igũrũ ekuuga atĩrĩ: Zayuni rĩkaarĩmwo ta mũgũnda, narĩo Jerusalemu rĩgaatuĩka hĩba cia mahiga, narĩo kĩrĩma gĩa hekaru gĩtuĩke handũ hatũũgĩru harĩ mĩtitũ.’”

Hezekia mũthamaki wa Juda na Juda guothe-rĩ, nĩ mamũũragire? Githĩ ndeetigĩrire Ithe witũ, agĩcaria ũtugi wake, nĩ ũndũ ũcio Ithe witũ akĩĩrira ũhoro wa mwanangĩko ũrĩa aamehĩtĩire? Na ithuĩ tũrĩ hakuhĩ kwĩrehere mwanangĩko mũnene.

Na rĩrĩ, nĩkwarĩ na mũndũ ũngĩ warathaga ũrathi na rĩĩtwa rĩa Ithe witũ, nĩwe Uria mũrũ wa Shemaia wa kuuma Kiriathu-Jearimu. Nake akĩrathĩra itũũra rĩĩrĩ na bũrũri ũyũ ũrathi na ciugo ta iria cia Jeremia. Na rĩrĩa mũthamaki Jehoiakimu, na njamba ciake ciothe cia ita, na anene othe, maiguire ciugo ciake, mũthamaki akĩenda kũmũũragithia. Nake Uria aigua ũguo, agĩĩtigĩra, akĩũra, akĩũrĩra bũrũri wa Misiri. Nake mũthamaki Jehoiakimu agĩtũma andũ bũrũri wa Misiri—nĩo Elinathani mũrũ wa Akibori na angĩ hamwe nake. Nao makĩrehe Uria kuuma Misiri makĩmũtwara kũrĩ mũthamaki Jehoiakimu, nake akĩmũũraga na rũhiũ rwa njora, agĩikia mwĩrĩ wake mbĩrĩrainĩ cia andũ arĩa a mũingĩ.

No Ahikamu mũrũ wa Shafani nĩwe wateithĩrĩirie Jeremia, nĩ ũndũ ũcio ndaaneanirwo mookoinĩ ma andũ nĩguo oragwo.