መዝሙር 132

132 ¹አባታችን ሆይ፤ ስለ ዳዊት የተቀበለውን መከራ ሁሉ አስብ፤ ²ለአባታችን እንዴት እንደ ማለ፣ ለያዕቆብ ኀያልም ስእለትን እንደ ተሳለ፦ ³“ወደ ቤቴ ድንኳን አልገባም፣ በመኝታዬም ላይ አልወጣም፤ ⁴ለዐይኖቼ እንቅልፍን ለሽፋሽፍቶቼም ማሸለብን አልሰጥም፤ ⁵ለአባታችን ስፍራን፣ ለያዕቆብ ኀያልም ማደሪያን እስካገኝ ድረስ።”

⁶እነሆ፣ በኤፍራታ ስለ ታቦቱ ሰማን፤ በያዕር ሜዳዎችም አገኘነው። ^a a v6 ኤፍራታ በቤተ ልሔም ዙሪያ ያለው አካባቢ ነው፤ ያዕር ዳዊት ታቦቱን ወደ ኢየሩሳሌም ከማምጣቱ በፊት የቃል ኪዳኑ ታቦት ያረፈበትን ቂርያት ይዓሪምን ያመለክታል። ⁷ወደ ማደሪያው እንግባ፤ በእግሩ መረገጫ ፊትም እንስገድ። ⁸አባታችን ሆይ፤ ተነሥተህ ወደ ማረፊያህ ና፤ አንተና የኀይልህ ታቦት። ⁹ካህናትህ ጽድቅን ይልበሱ፤ ቅዱሳንህም በደስታ ይዘምሩ።

¹⁰ስለ ዳዊት ስለ ባሪያህ የቀባኸውን ፊት አትመልስ።

¹¹አባታችን ለዳዊት የማይመለስበትን የጸና መሐላ ማለ፤ “ከገዛ ሰውነትህ የሚወጣውን በዙፋንህ ላይ አስቀምጣለሁ። ^b b v11 ጴጥሮስ በጴንጤቆስጤ ዕለት፣ አባታችን የዳዊት ዘር የሆነውን ኢየሱስን በዳዊት ዙፋን ላይ ለዘላለም እንዲቀመጥ በማስነሣት ይህን መሐላ እንደ ጠበቀ ተናገረ። ¹²ልጆችህ ኪዳኔን፣ የማስተምራቸውንም ምስክር ቢጠብቁ፣ ልጆቻቸው ደግሞ በዙፋንህ ላይ ለዘላለም ይቀመጣሉ።”

¹³አባታችን ጽዮንን መርጧልና፤ ማደሪያው ትሆነው ዘንድ ወድዷታል፦

¹⁴“ለዘላለም ማረፊያዬ ይህች ናት፤ ወድጄአታለሁና፣ በዚህ አድራለሁ። ¹⁵ስንቋን አትረፍርፌ እባርካለሁ፤ ድኆቿን በእንጀራ አጠግባለሁ። ¹⁶ካህኖቿን ድነትን አለብሳለሁ፤ ቅዱሳኗም በደስታ እጅግ ይዘምራሉ።

¹⁷“በዚያ የዳዊትን ኀይል አበቅላለሁ፤ ለቀባሁት መብራትን አዘጋጅቻለሁ። ¹⁸ጠላቶቹን እፍረትን አለብሳለሁ፤ በእርሱ ላይ ግን አክሊሉ ያበራል።”