Dawideibü theletbü
Angbü chia che.
Mütshuongei seneibü Bou to Dawideibü theyolanyobü damenbü ngakei: haoei Bou shanga kishang hapla phaia yepmang akubü. Jongaibü kho aeibou yaangenbü theyolanyobü ki—ponpen kibü choba setshang, Zion jembü kishang shanga pienbü, hoba haoeibü shalebou shuong shanga shausiyung.
132 1O Abou, Dawid shanga, haoei janyobü khonsak pendou damenashi, 2haoei Bou to theyolanyokei hoba Jakobeibü Yaangenbou to theletkei: 3“Ngei kü chem neichem to alotlabü ayingsi kü lao khüto aanglabü; 4Ngei kü nyek to ayeptilabü, ayingsi kü nyekphai to ahopatilabü, 5Bou shanga kaoen che, Jakobeibü Yaangenbou shanga kishang che ngei hapla shongko.”
6Chühashi, künei Efrataa Busen shangabü ditkei; künei kho Jair sek shuonga hapbei. a a v6 Efrata kho Bethlehem kailepa kibü kaonyu ki; Jaar kho Kiriath-jearim shangabü lauda, aoena Dawidei theyolanyobü Busen Jerusalem to aleibala thedanga kho haksoan kikei. 7Sen haoeibü lemshang to loukho; sen haoeibü younakshang la küpjung lemkho. 8O Abou, loenashi, hoba kaibü haksoshang to louashi, no hoba kaibü hau Busen yoa louashi. 9Kaibü ungshedbou shuongei saopobüei neitishima, hoba kaibü maanglembü shuongei olinko chia lautishima.
10No khangenbou Dawid shanga, kaibü naangenbou ka thenyek asepeijan.
11Bouei Dawid to theyolanyobü maimaitham che thekei, aokei ka haoei asepeilabü: “Kaibü shimung ka loulabü che ngei kaibü Choba setshanga setlabü. b b v11 Peterei Pentecost chaloua phinthonkei, seneibü Bouei Dawideibü lilabü Jisu to Dawid Choba setshanga ponpen setla angtian ho thekubü haüthüktikei dogo. 12Kaibü shousi shuongei kü theyolanyobü jungeia longa hoba ngei haoen to lenlabü ngühkhüm jungeia longa, kheijinei haoeneibü shousi shuong kaibü Choba setshanga ponpen setlabü.”
13Aishanga Bouei Zion pienkei; haoei kho jembü kishang shanga mangsühkei:
14“Ho ngeibü haksoshang ponpen ki; ngo hanei kilabü, aishanga ngei kho mangsühkei. 15Ngei haoeibü shausiyung yaangei haükulabü; ngei haoeibü shalebü shuong wentekei shi shentilabü. 16Ngei haoeibü ungshedbou shuong khümenbü neikulabü, hoba haoeibü maanglembü shuongei olinko chia alou laulabü.
17“Khünei ngei Dawideibü hau angtilabü; ngei kü naangenbou shanga hantin che lamlekei. 18Ngei haoeibü dangbou shuong himouei neikulabü, lausikei hao thüka haoeibü khun shinglabü.”
