ሩባን ኦም ህይወትን

ሩባ ብማእኸል ኣደባባይ እታ ኸተማ ይውሕዝ፥ ኣብ ክልቲኡ ወገኑ ድማ ኦም ህይወት ኣሎ፥ ቆፅሉ ኸዓ ንኣህዛብ ይፍውስ። ኣገልገልቱ ኣብ መወዳእታ ገፅ ኣቦና ይርእዩ። ኢየሱስ ኣብ ቀረባ ከም ዝመፅእ ሰለስተ ሻዕ ይብል፤ መንፈስን መርዓትን ከዓ፥ ንዓ፥ ኢሎም ይምልሱ — ዝፀምአ ዅሉ ድማ ብናፃ ይስተ።

ምዕራፍ 22።

ሽዑ እቲ መልኣኽ ነቲ ከም ብርለ ዝፀረየ፥ ማይ ህይወት ዝህብ ሩባ፥ ካብ ዝፋን ኣቦናን ካብ ዝፋን ኢየሱስ እቲ በጊዕን ክውሕዝ ኣርኣየኒ፤ ብማእኸል ኣደባባያ ከዓ ይውሕዝ ነበረ። ኣብ ክልቲኡ ወገን እቲ ሩባ ድማ ዓሰርተ ኽልተ ዓይነት ፍረ ዝፈሪ ኦም ህይወት ነበረ፤ ኣብ ነፍሲ ወከፍ ወርሒ ኸዓ ፍሪኣ ይህብ ነበረ፤ ቆፅሊ እቲ ኦም ድማ ንፈውሲ ኣህዛብ እዩ። ደጊም መርገም ኣይህሉን። ዝፋን ኣቦናን ዝፋን ኢየሱስ እቲ በጊዕን ኣብታ ኸተማ ክኸውን እዩ፤ ኣገልገልቱ ድማ ክስግዱሉ እዮም። ገፁ ክርእዩ እዮም፤ ስሙ ድማ ኣብ ግምባሮም ክኸውን እዩ። ደጊም ለይቲ ኣይህሉን። ኣቦና የብርሆሎም እዩ እሞ፥ መብራህቲ ኮነ ብርሃን ፀሓይ ኣየድልዮምን፤ ንዘለኣለመ ኣለም ድማ ክነግሱ እዮም።

ሽዑ እቲ መልኣኽ ከምዙይ በለኒ፦ “እዞም ቃላት እዚኣቶም እሙናትን ሓቅን እዮም። ኣቦና፥ እቲ ንነቢያቱ መንፈሱ ዝህብ፥ ነቲ ኣብ ቀረባ ክኸውን ዘለዎ ንኣገልገልቱ ምእንቲ ኽርእዮም፥ መልኣኹ ለኣኸ።”

“እንሆ፥ ኣብ ቀረባ እመፅእ ኣለኹ! ነቲ ቃላት ትንቢት እዝ መፅሓፍ እዙይ ዝሕሉ ብፁእ እዩ።”

ኣብ ቀረባ እመፅእ ኣለኹ

ኣነ ዮሃንስ ነዚ ነገራት እዚ ሰሚዐ ረአኹ። ምስ ሰማዕኽዎምን ምስ ረአኽዎምን ድማ፥ ኣብ እግሪ እቲ ዘርኣየኒ መልኣኽ ክሰግድ ተደፋእኹ። ንሱ ግና ከምዙይ በለኒ፦ “ኣይትግበር! ኣነ ምሳኻን ምስ ኣሕዋትካ ነቢያትን ምስቶም ቃላት እዝ መፅሓፍ እዙይ ዝሕልዉን ብፁእ ኣገልጋሊ እየ። ንኣቦና ስገድ!” ከምዙይ ድማ በለኒ፦ “ነቲ ቃላት ትንቢት እዝ መፅሓፍ እዙይ ኣይትሕተሞ፥ እቲ ጊዜ ቐሪቡ እዩ እሞ። እቲ ዓመፀኛ ገና ይዕመፅ፤ እቲ ርኹስ ገና ይረክስ፤ እቲ ፃድቕ ገና ፅድቂ ይግበር፤ እቲ ቅዱስ ከዓ ገና ይቀደስ።”

“እንሆ፥ ኣብ ቀረባ እመፅእ ኣለኹ፤ ንነፍሲ ወከፍ ከከም ግብሩ ክፈድዮ፥ ዓስበይ ምሳይ ኣሎ።

“ኣነ ኣልፋን ኦሜጋን፥ ቀዳማይን ዳሕራይን፥ መጀመርታን መወዳእታን እየ።” እቶም ክዳውንቶም ዝሓፅቡ፥ ናብ ኦም ህይወት ክበፅሑን ብኣፍ ደገታት እታ ኸተማ ኽኣትዉን መሰል ይረኽቡ እዮም እሞ፥ ብፁኣን እዮም። ኣብ ደገ ኸዓ ኣኽላባትን፥ ጠንቈልትን፥ ኣመንዝራታትን፥ ቀተልቲ ሰብን፥ መምለኽቲ ጣዖትን፥ ሓሰት ዝፈትዉን ዝገብሩን ኵሎምን ኣለዉ። “ኣነ ኢየሱስ፥ እዚ ነገር እዚ ኣብ ኣብያተ ክርስትያናት ምእንቲ ኽምስክረልኩም፥ መልኣኸይ ለኣኽኩ። ኣነ ናይ ዳዊት ሱርን ዘርእን፥ እታ ብርህቲ ኮኸብ ንግሆን እየ።”

መንፈስ ቅዱስን እታ መርዓትን ከዓ “ንዓ!” ይብሉ። እቲ ዝሰምዐ ድማ “ንዓ!” ይበል። እቲ ዝፀምአ ይምፃእ፤ እቲ ዝደለየ ድማ ማይ ህይወት ብኸምኡ ይውሰድ።

ኣነ ነቲ ቃላት ትንቢት እዝ መፅሓፍ እዙይ ዝሰምዕ ንኵሉ እምስክረሉ ኣለኹ፦ ሓደ ሰብ ኣብ ልዕሊኡ እንተ ወሰኸ፥ ኣቦና ነቲ ኣብዙይ ተፅሒፉ ዘሎ መቕሰፍቲ ኣብ ልዕሊ እቲ ሰብ እቱይ ክውስኸሉ እዩ። ሓደ ሰብ ከዓ ካብ ቃላት እዝ መፅሓፍ ትንቢት እዙይ እንተ ኣጕደለ፥ ኣቦና ነቲ ኣብ ኦም ህይወትን ኣብታ ኣብዙይ ተፅሒፋ ዘላ ቕድስቲ ኸተማን ዘለዎ ግደ ከጕድለሉ እዩ። ^a

እቲ ነዚ ነገር እዚ ዝምስክር ከምዙይ ይብል፦ “እወ፥ ኣብ ቀረባ እመፅእ ኣለኹ።” ኣሜን። ኦ ጐይታ ኢየሱስ፥ ንዓ! ^b

ፀጋ ጐይታ ኢየሱስ ምስ ኵሎም ይኹን። ኣሜን።