Ti Karayan ken ti Kayo ti Biag

Agayus ti karayan iti kalsada ti siudad, ken ti kayo ti biag adda iti dua nga igid, ket ti bulongna agpaimbag kadagiti nasion. Makita met ngarud dagiti adipenna ti rupa ti Amatayo. Naminpito a kunaen ni Jesus nga umayen isuna iti dandani; sumungbat ti Espiritu ken ti Nobia, Umayka, ket siasinoman nga mawaw mabalin nga uminom nga awan bayadna.

Kapitulo 22.

Kalpasanna, impakita kaniak ti anghel ti karayan ti danum a mangted-biag, a nalawag a kas kristal, nga agayus manipud iti trono ni Amatayo ken ni Jesus, ti Kordero, iti tengnga ti kalsada ti siudad. Iti tunggal igid ti karayan, nagtubo ti kayo ti biag, nga agbungbunga iti sangapulo ket dua a kita ti bunga, nga agbunga iti tunggal bulan; ket dagiti bulong ti kayo ket pagimas dagiti nasion. Awanen ti ilunod a mabati. Ti trono ni Amatayo ken ni Jesus, ti Kordero, ket addanto iti siudad, ket agdayawto kenkuana dagiti adipenna. Makitadanto ti rupana, ket addanto ti naganna kadagiti muging da. Awanen ti rabii. Saandan a kasapulan ti pagsilnag wenno ti lawag ti init, ta ni Amatayo ti mangted iti lawag kadakuada, ket agturongda iti agnanayon ken agnanayon.

Kinuna kaniak ti anghel, “Napudno ken pudno dagitoy a sasao. Ni Amatayo, a mangipaltiing kadagiti propetana, imbaonna ti anghelna tapno ipakitana kadagiti adipenna ti masapul a dagus a mapasamak.”

“Kitaenyo, umayakon a dagus! Nagasat ti mangtungpal kadagiti sasao ti padto daytoy a libro.”

Umayakon a Dagus

Siak, ni Juan, ti nakangngeg ken nakakita kadagitoy a banag. Idi nangngegko ken nakitak dagitoy, nagrukbabak tapno agdayaw iti sakaanan ti anghel a nangipakita kaniak kadagitoy. Ngem kinunana kaniak, “Dika aramiden dayta! Kaduaka laeng nga agserbi, a kadua dagiti kabsatmo a propeta ken dagiti mangtungpal kadagiti sasao daytoy a libro. Dayawem ni Amatayo!” Kinunana kaniak, “Dika selioan dagiti sasao ti padto daytoy a libro—asidegen ti panawen. Bay-am a ituloy ti managdakdakes ti panagdakesna; ti narugit ket agtalinaed a narugit; ti nalinteg ket ituloyna ti agaramid iti nalinteg; ti nasantoan ket agtalinaed a nasantoan.”

“Kitaenyo, umayakon a dagus, ket adda kaniak ti gunggonako, tapno bayadak ti tunggal maysa segun iti inaramidda.

“Siak ti Alpha ken ti Omega, ti Umuna ken ti Maudi, ti Rugi ken ti Gibus.” Nagasat dagiti agbuggo kadagiti kawesda, tapno maaddaanda iti kalintegan iti kayo ti biag ken makastrekda kadagiti ruangan ti siudad. Adda iti ruar dagiti aso, dagiti mammangkik, dagiti makiabig iti di umiso a sekso, dagiti mamapatay, dagiti agdaydayaw kadagiti didiosen, ken dagiti amin nga mangayat ken mangaramid iti ulbod. “Siak, ni Jesus, imbaonko ti anghelko tapno ipaneknekna kadakayo dagitoy para kadagiti iglesia. Siak ti Ramut ken Kaputotan ni David, ti nalawag a Bituen ti Bigat.”

Kuna ti Espiritu Santo ken ti Nobia, “Umayka!” Kunaen koma ti makangngeg, “Umayka!” Umay koma ti mawaw; alaenna koma a libre ti danum ti biag, siasinoman nga agtarigagay.

Ipaneknekko kadagiti amin a makangngeg kadagiti sasao ti padto daytoy a libro: no adda mangnayon kadagitoy, nayonto ni Amatayo kenkuana dagiti didigra a naisurat ditoy. No adda mangikkat kadagiti sasao daytoy a libro ti padto, ikkaten ni Amatayo ti bingayna iti kayo ti biag ken iti nasantoan a siudad a nailadawan ditoy. ^a

Kuna ti mangpaneknek kadagitoy a banag, “Wen, umayakon a dagus.” Amen. Umayka, Apo Jesus! ^b

Adda koma ti parabur ni Apo Jesus kadagiti amin. Amen.