ኣቦና ንኻህናቱ ይኣልዮም

እቶም ካህናት ርስቲ ስለ ዘይብሎም፥ ካብቲ መስዋእቲ ይነብሩ። ምጥንቋልን ስራይን ናብ ምዉታት ምሕታትን ናይቶም ኣህዛብ ፍፁም ክልኩል እዩ። ኣብ ክንድኡ ድማ ኣቦና ካብ ማእኸል ኣሕዋቶም ከም ሙሴ ዝበለ ነቢይ ከተስእ እዩ፤ ቃላት ሓደ ነቢይ ምፍፃሙ ኸዓ ንሱ ከም ዝተለኣኸ መፈተኒ እዩ።

ምዕራፍ 18።

ካህናት ሌዋውያን፥ ብዘሎ ነገድ ሌዊ፥ ምስ እስራኤል ግደን ርስትን የብሎምን፤ ነቲ ንኣቦና ዝቐርብ መስዋእቲ ምግቢ፥ ርስቱ፥ ይበልዕዎ። ኣብ ማእኸል ኣሕዋቶም ርስቲ ኣይሃልዎም፤ ከምቲ ዝተስፈዎም፥ ኣቦና ርስቶም እዩ። እዝ ካብ ህዝቢ ናይ ካህናት መሰል እዩ፦ እቶም ብዕራይ ወይ በጊዕ ዝስውኡ፥ ነቲ ካህን ማእገር፥ ክልቲኡ ምዕጉርትን ከብድን ይሃብዎ። ካብ እኽልኻ፥ ካብ ሓድሽ ወይንኻን ካብ ዘይትን በዅሪ፥ ካብ ኣባጊዕኻን በዅሪ ፀምሪ ሃቦ። ኣቦኻ ነዙይ ካብ ኵሎም ነገዳት፥ ንሱን ደቁን ብስም ኣቦና ደው ኢሎም ንዘለኣለም ከገልግሉ፥ ሓረዮ እዩ እሞ።

ሓደ ሌዋዊ ኻብ ሓንቲ ኻብተን ኣብ እስራኤል ዝነብሩለን ከተማታት ወፂኡ፥ ናብታ ኣቦና ዝሓረያ ቦታ ብዝደለዮ ጊዜ እንተ መፀ፥ ሽዑ ኸም ኵሎም እቶም ኣብኡ ኣብ ቅድሚ ኣቦና ደው ዝብሉ ኣሕዋቱ ሌዋውያን፥ ብስም ኣቦና ከገልግል ይኽእል እዩ። ብዘይ እቲ ኻብ ምሻጥ ጥሪት ማይ ቤቱ ዝረኽቦ፥ ማዕረ ግደ ይብላዕ።

እቲ ኣቦ ንተግባር ጥንቍልና ይኽልክል

ናብታ ኣቦኻ ዝህበካ ምድሪ ምስ ኣቶኻ፥ ከምቲ እቶም ኣህዛብ ዝገብርዎ ፍንፉን ተግባር ክትገብር ኣይትመሃር። ኣባኻትኩም ወዱ ወይ ጓሉ ብሓዊ ዘሕልፍ፥ ዝጠንቍል፥ ፋል ዝብል፥ ዝማርት፥ ወይ ስራይ ዝገብር ሓደ እኳ ኣይርከብን፤ ዝደግም፥ መንፈስ ምዉታን ዝፅውዕ፥ ጠንቋሊ፥ ወይ ናብ ምዉታት ዝሓትት። እዝ ዝገብር ኵሉ ኣብ ቅድሚ ኣቦና ፍንፉን እዩ እሞ፤ ብሰሪ እዝ ፍንፉን ተግባር እዙይ፥ ኣቦኻ ኻብ ቅድሜኻ ይሰጎም ኣሎ። ኣብ ቅድሚ ኣቦኻ ፍፁም ኩን። እዞም ክትወርሶም ዘለኻ ኣህዛብ ግና፥ ንፋል ዝብሉን ንጠንቈልትን ይሰምዑ፤ ንኣኻ ግና ኣቦኻ ነዙይ ኣይፈቐደልካን።

እቲ ኣቦ ነቢይ ክሰድድ እዩ

ኣቦኻ ኻባኻ፥ ካብ ኣሕዋትካ፥ ከማይ ዝበለ ነቢይ ከተስኣልካ እዩ፤ ንእኡ ስምዓዮ። ^a ኣብ ኮሬብ ብመዓልቲ እቲ ጉባኤ ኻብ ኣቦኻ ዝለመንካዮ እዙይ እዩ፦ “ድሕሪ ደጊም ድምፂ ኣቦና ኣይስማዕ፤ ነዝ ዓብዪ ሓዊ እዙይውን ደጊም ኣይርአ፤ እንተ ዘይኮነስ ክመውት እየ።”

ኣቦናውን ከምዙይ በለኒ፦ “እቲ ዝበልዎ ቕኑዕ እዩ። ካብ ማእኸል ኣሕዋቶም ከማኻ ዝበለ ነቢይ ከተስኣሎም እየ፤ ቃላተይ ድማ ኣብ ኣፉ ኸንብር እየ፤ ኵሉ ዝእዝዞ ኸዓ ክነግሮም እዩ። ነቲ ብስመይ ዝዛረቦ ቃላተይ ዘይሰምዕ ኵሉ፥ ኣነ ባዕለይ ክሓቶ እየ። እቲ ኣነ ዘይኣዘዝክዎ ቃል ብስመይ ክዛረብ ዝደፍር ነቢይ ግና፥ ወይ እቲ ብስም ካልኦት ኣማልኽቲ ዝዛረብ፥ እቲ ነቢይ እቱይ ይሞት።”

ኣብ ልብኻ ድማ “ነቲ ኣቦና ዘይተዛረቦ ቃል ብኸመይ ክንፈልጦ ንኽእል?” እንተ በልካ፥ ሓደ ነቢይ ብስም ኣቦና እንተ ተዛረበ፥ እቲ ቓል ድማ እንተ ዘይኮነ ወይ እንተ ዘይተፈፀመ፥ ነቲ ቓል እቲ ኣቦና ኣይተዛረቦን፤ እቲ ነቢይ ብትዕቢት እዩ ተዛሪብዎ፤ ኣይትፍርሆ።