Tiseiywek Tugul ko Punjin Anee
Nyolu koibu age tugul ne eeny kurgeetap emait ne kituiyechin, ak ma koeng'ji eng' timiin oigap ng'oroor che yaigei chepkugonio. Mata koam korotiik koigeny, amu mi saboondo eng' korotiik—ak ki gochi Kwandanyo eng' kaptisisyet si koatonon saboonwekwak.
Ng'alaali Kwandanyo eng' mustarisyek 2–16
17 1Ki ng'alaalji Kwandanyo Musa, koleenji:
2“Ng'alaalji Aron, ak weeriikyik, ak piigap Israel tugul, ak imwachi koleenji: Niito ne ka ang'at: 3Chii age tugul eng' piigap Israel ne eeny kirgit, anan mengit, anan ng'oroor eng' nganaseet oriit, anan eng' saang'utap nganaseet, 4ak ma koip kurgeetap emait ne kituiyechin si kogoito eng' Anee eng' taitap tabendonyu—chiichooto ko tinyei tengektap korotiik; kagotumda korotiik ak king'etoi eng' piikyik. 5Si koip anyun piigap Israel tiseiywekwak, che kogoitoi rani eng' timiin, kobwa tisiindet eng' kurgeetap emait ne kituiyechin, ak koeng'ji koek kagoochinoik che po kaalyeet eng' Anee. 6Isote tisiindet korotiik kaptisisyennyu eng' kurgeetap emait ne kituiyechin, ak peelei mwanik, koek nyamdutyet ne anyiny eng' Anee. 7Mata koeng'ji icheek tiseiywek oigap ng'oroor, che yaigei chepkugonio ak icheek. Niito ng'atuutyet ne po koigeny eng' ortinwekwak tugul.
8“Imwachi, koleenji: Chii age tugul eng' piigap Israel, anan toondet ne menye among icheek, ne kogoito tiseiywot anan kagoochinet ne kibeelei, 9ak ma koip kurgeetap emait ne kituiyechin si kogoito eng' Anee—king'etoi chiichooto eng' piikyik.
10“Chii age tugul eng' kootap Israel, anan toondet ne menye among icheek, ne amei korotiik alak tugul—ainde togeennyu agaigai chiichooto ak ang'etu eng' piikyik. 11Korotiik ko saboondap poorto; kiagoochok eng' kaptisisyet si keyai kagaigaet agobo saboonwekwok, amu atonone korotiik eng' saboondo. a a v11 Kigoochi Kwandanyo ineegei korotiik koek ne atononi; ak korotiigap tiseiywot age tugul ko ki udoe korotiigap Jeso, che ki kitumda si kotuge lagokyik keleenyin agenge koigeny. 12Niito anyun ne kileenji piigap Israel: Mata koam chii age tugul eng' okweek korotiik, ak ma toondet ne menye among okweek.
13“Chii age tugul eng' piigap Israel anan toondet ne menye among icheek ne soore tyony anan toriit ne oame, kanyool kotumda korotiikyik ak kotuge temburyek. 14Saboondap tyony age tugul ko mi korotiikyik. Niito anyun ne kileenji piigap Israel: Amat oam korotiigap tyony age tugul, amu saboondanyi ko korotiikyik—king'etoi age tugul ne amei.
15“Chii age tugul, ngo salwok anan toondet, ne amei poortap tyony ne kame anan ne katon tyong'in, kanyool komwet ngoroikyik, ak kouungei eng' peek, ak komurwoniit agoi koimen, yeityo kotiliilit. 16Ago ngo ma komwet anan ma kouungei poortanyi, ko ibei tengektanyi.”