ସମସ୍ତ ବଳିଦାନ ଆମ୍ଭର ଅଟେ

ସମସ୍ତ ପଶୁବଧ ତମ୍ବୁ ଦ୍ୱାରକୁ ଅଣାଯିବା ଆବଶ୍ୟକ, ଖୋଲା କ୍ଷେତ୍ରରେ ଛାଗ-ଭୂତମାନଙ୍କ ଉଦ୍ଦେଶ୍ୟରେ ଉତ୍ସର୍ଗ କରାଯିବ ନାହିଁ। ରକ୍ତ କେବେ ଖିଆଯିବ ନାହିଁ, କାରଣ ପ୍ରାଣ ରକ୍ତରେ ଅଛି — ଏବଂ ଆମର ପିତା ସେମାନଙ୍କ ପ୍ରାଣ ପାଇଁ ପ୍ରାୟଶ୍ଚିତ୍ତ କରିବାକୁ ତାହା ବେଦି ଉପରେ ଦେଇଅଛନ୍ତି।

ଅଧ୍ୟାୟ 17।

ଆମ୍ଭମାନଙ୍କ ପିତା ମୋଶାଙ୍କୁ କହିଲେ,

“ହାରୋଣ, ତାହାର ପୁତ୍ରଗଣ ଓ ସମସ୍ତ ଇସ୍ରାଏଲଙ୍କୁ କୁହ, ଆଉ ସେମାନଙ୍କୁ କୁହ, ଆମ୍ଭେ ଯାହା ଆଜ୍ଞା କରିଅଛୁ, ତାହା ଏହି — ଇସ୍ରାଏଲ ବଂଶର ଯେକୌଣସି ଲୋକ ଛାଉଣି ଭିତରେ କିମ୍ବା ଛାଉଣି ବାହାରେ ବଳଦ, ମେଷଶାବକ କିମ୍ବା ଛାଗ ବଧ କରେ, ପୁଣି ଆମ୍ଭ ଆବାସ ସମ୍ମୁଖରେ ଆମ୍ଭ ଉଦ୍ଦେଶ୍ୟରେ ଉତ୍ସର୍ଗ କରିବା ନିମନ୍ତେ ତାହା ସମାଗମ-ତମ୍ବୁର ଦ୍ଵାର ନିକଟକୁ ନ ଆଣେ, ସେ ଲୋକ ରକ୍ତପାତ ଦୋଷରେ ଦୋଷୀ; ସେ ରକ୍ତପାତ କରିଅଛି, ଆଉ ଆପଣା ଲୋକମାନଙ୍କ ମଧ୍ୟରୁ ଉଚ୍ଛିନ୍ନ ହେବ। ଏଣୁ ଇସ୍ରାଏଲ ସନ୍ତାନଗଣ ଆପଣାମାନଙ୍କ ଯେଉଁ ବଳି ଏବେ ପଦା କ୍ଷେତ୍ରରେ ଉତ୍ସର୍ଗ କରୁଅଛନ୍ତି, ତାହା ସମାଗମ-ତମ୍ବୁର ଦ୍ଵାର ନିକଟକୁ ଯାଜକ ନିକଟକୁ ଆଣି, ଆମ୍ଭ ଉଦ୍ଦେଶ୍ୟରେ ମଙ୍ଗଳାର୍ଥକ ବଳିରୂପେ ଉତ୍ସର୍ଗ କରିବେ। ପୁଣି ଯାଜକ ସମାଗମ-ତମ୍ବୁର ଦ୍ଵାର ନିକଟରେ ଆମ୍ଭ ବେଦି ଉପରେ ସେହି ରକ୍ତ ସେଚନ କରିବ, ଆଉ ଆମ୍ଭ ଉଦ୍ଦେଶ୍ୟରେ ସୁବାସାର୍ଥେ ମେଦ ଦଗ୍ଧ କରିବ। ପୁଣି ଯେଉଁ ଛାଗ-ଭୂତଗଣର ଅନୁଗମନରେ ସେମାନେ ବ୍ୟଭିଚାର କରୁଅଛନ୍ତି, ସେମାନଙ୍କ ଉଦ୍ଦେଶ୍ୟରେ ସେମାନେ ଆଉ ବଳିଦାନ କରିବେ ନାହିଁ। ଏହା ସେମାନଙ୍କ ପୁରୁଷାନୁକ୍ରମେ ଏକ ଅନନ୍ତକାଳୀନ ବିଧି।

“ଆଉ ସେମାନଙ୍କୁ କୁହ, ଇସ୍ରାଏଲ ବଂଶର କିମ୍ବା ସେମାନଙ୍କ ମଧ୍ୟରେ ପ୍ରବାସ କରୁଥିବା ବିଦେଶୀ ଲୋକମାନଙ୍କ ମଧ୍ୟରୁ ଯେକେହି ହୋମବଳି କିମ୍ବା ବଳିଦାନ ଉତ୍ସର୍ଗ କରେ, ଆଉ ଆମ୍ଭ ଉଦ୍ଦେଶ୍ୟରେ ଉତ୍ସର୍ଗ କରିବା ନିମନ୍ତେ ତାହା ସମାଗମ-ତମ୍ବୁର ଦ୍ଵାର ନିକଟକୁ ନ ଆଣେ, ସେ ଲୋକ ଆପଣା ଲୋକମାନଙ୍କ ମଧ୍ୟରୁ ଉଚ୍ଛିନ୍ନ ହେବ।

“ଇସ୍ରାଏଲ ବଂଶର କିମ୍ବା ସେମାନଙ୍କ ମଧ୍ୟରେ ପ୍ରବାସ କରୁଥିବା ବିଦେଶୀ ଲୋକମାନଙ୍କ ମଧ୍ୟରୁ ଯେକେହି କୌଣସି ପ୍ରକାର ରକ୍ତ ଭୋଜନ କରେ, ଆମ୍ଭେ ସେହି ରକ୍ତଭୋଜୀ ଲୋକ ବିରୁଦ୍ଧରେ ଆପଣା ମୁଖ ରଖିବା, ଆଉ ତାହାର ଲୋକମାନଙ୍କ ମଧ୍ୟରୁ ତାହାକୁ ଉଚ୍ଛିନ୍ନ କରିବା। କାରଣ ରକ୍ତ ଶରୀରର ଜୀବନ; ଆଉ ଆମ୍ଭେ ତୁମ୍ଭମାନଙ୍କ ପ୍ରାଣ ପାଇଁ ପ୍ରାୟଶ୍ଚିତ୍ତ କରିବା ନିମନ୍ତେ ବେଦି ଉପରେ ତାହା ତୁମ୍ଭମାନଙ୍କୁ ଦେଇଅଛୁ; ଯେହେତୁ ଜୀବନ ସକାଶୁ ରକ୍ତ ପ୍ରାୟଶ୍ଚିତ୍ତ କରେ। ^a ଏଣୁ ଆମ୍ଭେ ଇସ୍ରାଏଲଙ୍କୁ କହିଲୁ, ତୁମ୍ଭମାନଙ୍କ ମଧ୍ୟରୁ କେହି ରକ୍ତ ଭୋଜନ କରିବ ନାହିଁ, କିଅବା ତୁମ୍ଭମାନଙ୍କ ମଧ୍ୟରେ ପ୍ରବାସ କରୁଥିବା କୌଣସି ବିଦେଶୀ ଲୋକ ରକ୍ତ ଭୋଜନ କରିବ ନାହିଁ।

“ଆଉ ଇସ୍ରାଏଲ ବଂଶର କିମ୍ବା ସେମାନଙ୍କ ମଧ୍ୟରେ ପ୍ରବାସ କରୁଥିବା ବିଦେଶୀ ଲୋକମାନଙ୍କ ମଧ୍ୟରୁ ଯେକେହି କୌଣସି ଭୋଜନୀୟ ପଶୁ କିମ୍ବା ପକ୍ଷୀ ଶିକାର କରେ, ସେ ତାହାର ରକ୍ତ ଢାଳି ଧୂଳିରେ ଆଚ୍ଛାଦନ କରିବ। ପ୍ରତ୍ୟେକ ପ୍ରାଣୀର ଜୀବନ ତାହାର ରକ୍ତରେ ଥାଏ। ଏଣୁ ଆମ୍ଭେ ଇସ୍ରାଏଲ ସନ୍ତାନଗଣଙ୍କୁ କହିଲୁ, ତୁମ୍ଭେମାନେ କୌଣସି ପ୍ରାଣୀର ରକ୍ତ ଭୋଜନ କରିବ ନାହିଁ, ଯେହେତୁ ପ୍ରତ୍ୟେକ ପ୍ରାଣୀର ଜୀବନ ତାହାର ରକ୍ତ ଅଟେ; ଯେକେହି ତାହା ଭୋଜନ କରିବ, ସେ ଉଚ୍ଛିନ୍ନ ହେବ।

“ପୁଣି ସ୍ଵଦେଶୀ କି ବିଦେଶୀ ଯେକୌଣସି ଲୋକ ସ୍ଵୟଂମୃତ ପଶୁ କିମ୍ବା ବନ୍ୟ ପଶୁ ଦ୍ଵାରା ବିଦୀର୍ଣ୍ଣ ପଶୁ ଭୋଜନ କରିବ, ସେ ଆପଣା ବସ୍ତ୍ର ଧୋଇବ ଓ ଜଳରେ ସ୍ନାନ କରିବ, ପୁଣି ସନ୍ଧ୍ୟା ପର୍ଯ୍ୟନ୍ତ ଅଶୁଚି ରହିବ; ତହିଁ ଉତ୍ତାରେ ସେ ଶୁଚି ହେବ। ମାତ୍ର ଯଦି ସେ ତାହା ନ ଧୋଏ କିମ୍ବା ଆପଣା ଶରୀର ସ୍ନାନ ନ କରେ, ତେବେ ସେ ଆପଣା ଅପରାଧ ବହିବ।”