Ithum Mang Khatheibing Thāhaowa
Kāhuiwui Laa.
Kaje eina kharāk kahai mibingna hāngra, shimli kharāk chi mang kamang thāda leikahai kala ithumwui morhāli ngana eina mathāng kahai—chieina Negebli tara kharākha thāda ithumwui Avāli ngakao, ngasāk hathāngkhavai. Atam hiwui kasoi chi mikta eina kaphāi mibing chāng khakhui kahat eina shimli kharāk.
126 1Ithumwui Avāna Zionwui lan hanmiluishit tharan, ithum mang khaleibing thāhaowa. 2Chieina ithumwui khamorli khamana̱na pemsai, kala ithumwui maleli khamathānkhon eina pemsai; chieina yurbingwui ngachaili hānga, "PROHO Varena athumwui vang ot kachungkha sāmihaira." 3Ithumwui Avāna ithumwui vang ot kachungkha sāmihaira; ithum khamathānna pemtinghaowa.
4O ithumwui Avā, Negebli khalei kongbing thāda ithumwui lan hanmiluishitlu. a a v4 Negeb chi Israelwui azingshong khalei siwuk lamhāngna, chili zingrot kupra naoda tara̱ makhaleiwui kongbing tara̱na thākta pemtinghaira — hi lan thākta onngasak kahaiwui chānjamna. 5Chāra̱ eina athā khayaobingna khamathānkhon eina hātkhuira. 6Yaokhavai athā khao khuiphungda chapsasui eina shoka china, mā lanji khuiphungda khamathānkhon eina kachangkhata shimli ungphalungra.
