Avāna Mosesli Hānga
Nao pharrā thili, ava chi naomayarawui vang shinithang, naongalāva̱wui vang thara mati thang makathar leira, chiwui thili kathara ot kachiva̱li mapaishingda tharkhavai atam kasāng ngaksora. Ana yaonao akha eina vānao akha khuirāra, maningkha yaonao chan mangāakha vānao khani.
12 1Ithumwui Avāna Mosesli hānga,
2Israelnaobingli hithāda hānglu, sha̱nao akhana chungkasang naomayara akha pharaakha, a shinithang matharmara; awui shānrāt kazat atamli makathar thāda a matharmara. 3Kala kachishatathang awui phasā ahui rimshokra. 4Kaja zimiksho thumrāda kathum peichaoda a awui pheomi khavaiwui ashee lungli pamra. Awui pheomi khavai atam makupranglakha eina tangda, ana kathara ot akhanidala masāza̱paimara, lah katharapamli mazangpaimara. 5Kalikhada ana naongalāva̱ akha pharaakha, awui shānrāt kazat atamli makathar thāda, a haptā khani matharmara; kala zimiksho hangtharukta tharuk peichaoda awui pheomi khavaiwui ashee lungli pamchingra.
6Naomayara nilala naongalāva̱ nilala, awui pheomi khavai atam kupkahaiwui thili, ana rikkatā kachigatwui vang kumkhawui yaonao akha, kala suihamchigatwui vang kha̱na̱nao akha maningakha nāsha̱ akha, kazip khavai kachonshimwui khāmongpheili pāngmonli khuirāmira. 7Pāngmon china chi ithumwui Avāwui mangāli chigatmira, kala awui vang pheomira; chithāda a awui ashee khangaya̱ chiwui eina tharhaora. Hi naomayara nilala naongalāva̱ nilala kapharā sha̱naowui ainna.
8Kha ana yaonao mashokrarakha, ana nāsha̱nao khani, lah kha̱na̱nao khani khuirāra; akhava rikkatā kachigatwui vang, kala khangatei akhapā suihamchigatwui vangna. Pāngmon china awui vang pheomira, kala a tharhaora. a a v8 Shimkhur china yaonao makhuirākathuka tharan, ithumwui Avāna kachigat makhuirākathukbingli hi teopā khami chi eina khuisangmi; kala hi kachigat, Marina Jishuli katharapamli chigatthang khuirā kahai chi khakhaina.
