Tata ke tuba na Moyize
Na manima ya kubuta, mama kele ya kuvedila ve bilumbu nsambwadi samu na mwana ya bakala, mpe bilumbu kumi na iya samu na mwana ya kento, na manima yandi ke lungisa bilumbu ya nda ya kuvedisa na ntwala ya kusimba kima ya longo. Yandi ke nata mwana ya dimeme mpe dibembe, to mabembe zole kana yandi kele na lubaku ya kuzwa dimeme ve.
Tata ya beto ke zonza na bavese 2–8
12 1Tata ya beto tubaka na Moyize:
2«Zabisa bana ya Isayeli: Kana kento me baka divumu mpe buta mwana ya bakala, yandi kele ya kuvedila ve bilumbu nsambwadi, mutindu ntangu yandi ke talaka menga. 3Na kilumbu ya nana, ba ke zenga bubakala ya yandi. 4Bilumbu makumi tatu na tatu, yandi ke vwanda na menga ya kuvedisa ya yandi. Yandi fwana kusimba ve kima ya longo to kukota na Yinzo ya longo tii ntangu bilumbu ya yandi ya kuvedisa ke lunga. 5Kana yandi buta mwana ya kento, yandi kele ya kuvedila ve balumingu zole, mutindu ntangu yandi ke talaka menga. Na manima, yandi ke tatamana bilumbu makumi sambanu na sambanu na menga ya kuvedisa ya yandi.
6«Ntangu bilumbu ya yandi ya kuvedisa samu na mwana ya bakala to mwana ya kento ke lunga, yandi fwana kunata na nganga-Nzambi, na nkotolo ya Yinzo ya Mbwabanu, mwana ya dimeme ya mvula mosi mutindu Munkayulu ya Kuyoka, mpe mwana ya dibembe to kiduka mutindu Munkayulu ya mulemvo. 7Nganga-Nzambi ke pesa yawu na mantwala ya Tata ya beto mpe ke katula masumu ya yandi. Yandi ke kuma ya kuvedila na menga ya yandi yina ke basika. Yayi ni Musiku yina me tadila kento yina ke buta mwana ya bakala to mwana ya kento.
8«Kana yandi kele ve na lubaku samu na kuzwa dimeme, yandi lenda baka biduka zole to mabembe zole, mosi samu na Munkayulu ya Kuyoka, mosi samu na Munkayulu ya mulemvo. Nganga-Nzambi ke katula masumu ya yandi, mpe yandi ke kuma ya kuvedila.» a a v8 Ntangu dibuta vwandaka ve na lubaku samu na kuzwa dimeme, Tata ya beto pesaka kisika na bansukami na dikabu yayi ya fyoti — mpe yayi ni munkayulu yina Maliya nataka ntangu yandi lakisaka Yesu na Yinzo ya Nzambi.