Pitri pora Moses ke kotha koi ase

Bacha jonom diya pichete ekjon ama to putro nimite saat din aru suali nimite chouddo din asuchi thake, tar pichete kunba pobitro jinis usorte aha age aru lomba suchi hobole somoi pura kore. Tai ekta bhera bacha aru ekta chiriya ane, nohoile bhera bacha kinibole napare koile duita chiriya ane.

Adhyay 12.

Amar Pitri pora Moses ke eneka koise:

“Israel laga manuh khan ke kobi: jitia ekjon maiki pet te bacha dhori kene ekjon chokra jonom koribo, tetiya tai sat din tak letera thakibo—tai laga mahina huwa somoite letera huwa nisena.” Aru ath din te tai laga age-chamra tu sunnot kori dibo. Tar pichete tai tettis din tak tai laga sapha huwa laga khoon te thakibo. Tai laga sapha huwa din khan pura nohua tak, tai eku pobitro jinis ke chubo naparibo, aru pobitro ghor te bhi ghusibo naparibo. Jodi tai ekjon chokri jonom koribo, tetiya tai laga mahina huwa somoi nisena, tai dui hafta tak letera thakibo; aru tar pichete tai chiyasath din tak tai laga sapha huwa laga khoon te thakibo.

“Jitia chokra nahoile chokri karne tai laga sapha huwa din khan pura hoi jabo, tetiya tai pora juwa-aha laga tombu laga dorja te purohit ke, jolai diya daan nimite ek saal umor laga mer laga bacha ekta, aru paap laga daan nimite kom umor laga potou nahoile kopou ekta, anibo lage.” Purohit pora eitu ke amar Pitri age te daan koribo, aru tai karne prayaschit koribo; tetiya tai laga khoon bohi juwa pora tai sapha hoi jabo. Chokra nahoile chokri jonom diya maiki karne eitu niyom ase.

“Jodi tai ekta mer bacha dibole napare, tetiya tai duita kopou nahoile duita kom umor laga potou lobo pare—ekta jolai diya daan karne, aru ekta paap laga daan karne. Purohit pora tai karne prayaschit koribo, aru tai sapha hoi jabo.” ^a