Solumoni Katunga amana Kayidika Kipfumu kyandi
Kunima mvula makumodi ma kutunga, Solumoni wáyidika mbanza za ngolu, wáheka makanda ma bisi Kanana mana másala mu kisalu kya kingolu-ngolu, wásya bisi Kiseledi hanga basuta yi bapfumu, amana wásya banganga Nzambi yi balefi mu bimvuka bya Tavidi. Masuwa matukiku ku Eziyoni-Ngebe mánata wolu, amana kisalu kya nzu ya Tata wetu kyálungisama.
8 1Kunima mvula makumodi, muna mina Solumoni kátunga nzu ya Tata wetu yi nzu yandi ya kipfumu, 2Solumoni wátunga mu mbala yikwawu mbanza zina Hulami kámuheka, amana wákadisa batu ba Kiseledi muna ziawu.
3Amana Solumoni wénda mu kunwana Hamati-Zoba, amana wánunga. 4Wátunga Tadimodi mu lufinda, kumosi yi mbanza zoosu za kulunda bima zina kátunga mu Hamati. 5Wátunga mu mbala yikwawu phi Beti-Holoni wa kuna zilu yi Beti-Holoni wa ha tsi, hanga mbanza za ngolu, yi bibaka, yi mwelu, yi bikangidilu, 6Baalati, yi mbanza zoosu za kulunda bima za Solumoni, yi mbanza za mitukumbila mya phunda yi za bakwa baphunda, amana byosu bina kázola kutunga ku Yelusalemi, ku Lebanoni, yi mu tsi yandi yosu ya kipfumu.
7Bákala kaka batu básala muna bisi Hiti, bisi Amoli, bisi Pelezi, bisi Hivi, yi bisi Yebusi, bana bakalaku bisi Kiseledi. 8Batekulu bawu bana bakala kaka zinga mu tsi, bana Kiseledi katótisaku, Solumoni wábaheka mu kisalu kya kingolu-ngolu, bwosu bena kaka yi kuna lelu dyadi. 9Kaasi Solumoni kákitulaku keti mutu mosi wa bisi Kiseledi hika mu kisalu kyandi; bawu bákala baphumbulu, bapfumu ba batsinzidi bandi, yi bapfumu ba mitukumbila myandi yi ba bakwa baphunda bandi. 10Bana bákala bambuta ba batsinzidi ba kyamvu Solumoni: khama zoodi yi makumi tanu, bana bakala yadika batu.
11Solumoni wánata mwana ndumba wa Fwalawo, tuka ku mbanza ya Tavidi, ku nzu yina kámutungila, mu kuzimbula: «Ka mukhetu wama mosi ku kakála zinga mu nzu ya Tavidi kyamvu wa Kiseledi, mukuma homa hosu hana mukunzu wa Tata wetu wakótila, henina hatoma.»
12Amana Solumoni wátambika bimenga bya kuyoka kwena Tata wetu, ha mesa ma kimenga mana kátunga ku thwala ya mbalanda, 13kosu kilumbu bwosu bulombi, bwosu mukuku wa Moyize: mu masabata, mu ngonda za mpha, yi mu mikinzi mitatu mya kosu mvula—mukinzi wa mapha makonda muvimbu, mukinzi wa mingu, yi mukinzi wa masombolu.
14Bwosu mikuku mya tata dyandi Tavidi, wátula mikanzu mya banganga Nzambi mu kisalu, yi mikanzu mya balefi mu kuzatula khembu amana basadila ku thwala ya banganga Nzambi bwosu bulombi kosu kilumbu, yi mikanzu mya batsinzidi ba mwelu ku kosu mwelu, mukuma Tavidi, mutu wa Tata wetu, wásenda bwawu. 15Bawu báhanga kaka bwosu mitsiku mya kyamvu kwena banganga Nzambi yi balefi, yi kuna mu mambu ma kulunda bima.
16Kisalu kyosu kya Solumoni kyalungila, tuka kilumbu kina bátudila mupfundila wa nzu ya Tata wetu yi kuna kilumbu kyámanisama; bwabuna nzu ya Tata wetu yalunga.
17Amana Solumoni wénda ku Esiyoni-Gebeli yi ku Eloti, ku mukinda wa yanga, mu tsi ya Edomi. 18Hulami wámuthumina masuwa mu nzila ya basadi bandi, kumosi yi basadi ba masuwa bana bazaya yanga; bálabuka kumosi yi basadi ba Solumoni yikuna Ofili, bábonga wolu, kitesu kya zitu kumi yi tsambwadi, amana bánata kwena kyamvu Solumoni.
