USolomon Wakha Alungise Ubukumkani Bakhe

Phantsi kweminyaka engamashumi mabini yokwakha, uSolomon unqabisa imizi, afake abantu abaseleyo bamaKanan emsebenzini onzima, agcine amaSirayeli njengamadoda okulwa nabathetheli, aze amise ababingeleli nabaLevi kwizigaba zikaDavide. Iinqanawa ezivela eEziyon-gebhere zizisa igolide, waza umsebenzi wendlu kaBawo wethu wafezeka.

Isahluko 8.

Emva kweminyaka emashumi mabini, awakha ngayo uSolomon indlu kaBawo wethu nebhotwe lakhe, uSolomon wayakha imizi uHuram abemnike yona, wabahlalisa kuyo abantu bakwaSirayeli.

Waza uSolomon wahamba waya kulwa neHamati-tsobha, wayeyisa. Wakha iTademore esentlango, nemizi yonke yoovimba awayakhayo eHamati. Wayakha neBhete-horon engasentla neBhete-horon yasezantsi, imizi enqatyisiweyo, nodonga, namasango, nemivalo; neBhahalata, nemizi yonke yovimba kaSolomon, nemizi yeenqwelo zakhe zokulwa, nemizi yabamahashe bakhe, nako konke awayenqwenela ukwakha eYerusalem, naseLebhanon, nasezweni lonke lolawulo lwakhe.

Bebesekho abantu abaseleyo kuwo amaHeti, nama-Amori, namaPerizi, namaHivi, namaYebhusi, ababengengabo abakwaSirayeli. Inzala yabo eseleyo kwelo zwe, engazange itshatyalaliswe ngamaSirayeli, yiyo uSolomon awayifaka kuviko lomsebenzi onzima, njengoko kusenjalo nanamhla. USolomon akenzanga nabanye koonyana bakaSirayeli ukuba babe ngamakhoboka omsebenzi wakhe; babengamadoda okulwa, nabathetheli babongameli bakhe, nabathetheli beenqwelo zakhe zokulwa nabamahashe bakhe. Ngabo aba abathetheli abangabongameli bokumkani uSolomon: amakhulu amabini anamanci mahlanu, ababewuphethe abantu.

USolomon wayinyusa intombi kaFaro, wamkhupha kuwo uMzi kaDavide, wayisa endlwini abeyakhele yona, esithi: “Akukho mfazi wam uya kuhlala endlwini kaDavide ukumkani wakwaSirayeli; kuba ingcwele yonke indawo etyeya kaBawo wethu ingene kuyo.”

Waza uSolomon wanyusa amadini anyukayo kuBawo wethu esibingelelweni awayakhayo phambi kwevaranda, yimihla ngemihla ngokwesiko, ngokomthetho kaMoses: ngeesabatha, nasekuthwaseni kweenyanga, nasemithendelekweni emithathu ngomnyaka—umthendeleko wezonka ezingenagwele, nomthendeleko weeveki, nomthendeleko weminquba.

Ngokwemimiselo kaDavide uyise, wamisa amaqela ababingeleli emisebenzini yabo, namaqela abaLevi ukuba badumise balungiselele phambi kwababingeleli njengoko kwakufuneka imihla ngemihla, namaqela abagcini-sango esangweni ngesango; kuba uDavide, umntu kaBawo wethu, wayewisile loo mthetho. Abaphambukanga emthethweni wokumkani kubabingeleli nabaLevi nangantoni na, nasezindaweni zobuncwane.

Wagqitywa ke wonke umsebenzi kaSolomon, kwathabathela kumhla owasekwa ngawo indlu kaBawo wethu, wada wagqitywa; yagqitywa ke indlu kaBawo wethu.

Waza uSolomon waya e-Etsiyon-gebhere nase-Eloti elunxwemeni lolwandle ezweni lakwaEdom. UHuram wamthumela iinqanawa ngesandla sabakhonzi bakhe, namadoda alwaziyo ulwandle; eza ndawonye nabakhonzi bakaSolomon kwaOfire, athabatha khona igolide, iitalente ezingamakhulu mane anamanci mahlanu, azisa kukumkani uSolomon.