1 Thotrinchān 28

28 ¹Israel saikorawui kathānabing, shangbingwui kathāna, awungali otram ngatha̱ rāmrahbingwui raithāna, thingthingwui kala shāshāwui raithāna, awunga kala awui naomayarabingwui shimlui kala sha̱kei saikorawui otva̱bing, kala kathāna kachiva̱, kapingabing kala rai kapinga raimimāng saikora, athum saikorali Davidna Jerusalemli kazipkhui. ²Awunga Davidna ngakarthuida hānga, "Ivānaobing kala iwui mibing, ili nganāmilu. Ithumwui Avāwui tuingashit oko, awui pheizingwui vang ngasāmkakhui shim akha sākhavai iwuklungli lei, kala chi sākhavai ina ngarān sai. ³Kha ithumwui Avāna ili hānga, 'Nana iwui mingwui vang shim masākhuimara, kaja nava ashee tākhangasak kahai raiwui mina.' ⁴Chitha-ilala Israelwui ithumwui Avāna iwui avāva̱ shim katonga eina Israellungli katang mavaimara mungkhavai ili kapangkhui. Kaja ithumwui Avāna kathāna sākhavai Judahli kapangkhui, kala Judahwui shimlungli iwui avāva̱ shim kapangkhui; kala iwui avāva̱wui naomayarabingwui alung eina Israel saikoratungli ili awunga sākhavai ana khamathāna. ⁵Ithumwui Avāna ili naomayara tarākha mihaira. Iwui naomayara saikorawui alung eina Israellungli ithumwui Avā wungramwui wungpamkhongli pamkhavai ana iwui naomayara Solomonli kapangkhui. ⁶Ana ili hānga, 'Nawui naomayara Solomonna iwui shim kala iwui kayāngbing sākāra, kaja ina ali iwui naomayara sākhavai kapangkhui, kala ina awui avā ngasāra.' ⁷Ana ajala thāda iwui ningkhami kala shiyan mayonkhavai nganingtitta leiakha, ina awui wungram katang mavaimara sakāmira.

⁸"Chiwui vang ara, Israel saikorawui mangāli, ithumwui Avāwui yaruiwui mangāli, kala ana shāda, nathumwui Avāwui ningkhami saikora mayonda phālu, chithākha nathumna hi kaphā ngalei chi shimlui khuida, katang mavaimara nathumwui thili nathumwui naongarāli hormihaora. ⁹Nava, iwui naomayara Solomon, navāwui Vareli theilu, kala wuklung katonga kala ningkhami khavaili ali otram ngatha̱lu, kaja ithumwui Avāna wuklung kachiva̱ phākhui, kahang kala phaning kachiva̱ theishinga. Ali phālu chithākha nana ali samphangra; ali horhaiakha chithākha ana nali katang mavaimara horchaomira. ¹⁰Phaningkhuilu, kaja ithumwui Avāna katharapamwui vang shim akha sākhavai nali kapangkhui. Pingda pangda sāda otsālu."

¹¹Davidna awui naomayara Solomonli khorumshimwui khamrei, chiwui shimbing, chiwui zātshimbing, chiwui atokābing, chiwui alungkābing, kala lukhamashan pamkhongwui kā chiwui tāzak mi, ^a a v11 Lukhamashan pamkhong chiya kadhara okowui sinā kachanga eina sākahai akhung akhona, Kathara Katharapamli haikahai, Varewui ngalem leilakha apamna. ¹²kala ithumwui Avāwui shimwui kayāngbingwui vang, kuikhamareili khalei kā saikorawui vang, awui shimwui zātshimbingwui vang, kala dharkatkhami lemmetwui zātshimbingwui vang, awui ningli leikahai saikorawui tāzak; ¹³pāngmonbing kala Levinaobingwui azangbingwui vang, ithumwui Avāwui shimli otram ngatha̱ khavai ot saikorawui vang, kala awui shimli otram ngatha̱ khavai khorkhong saikorawui vang. ¹⁴Otram ngatha̱ ayur kachiva̱li haikhavai sinā ot kachiva̱wui vang sinā chi kharit eina mi, kala otram ngatha̱ ayur kachiva̱li haikhavai lupāsā ot kachiva̱wui vang lupāsā chi kharit eina mi. ¹⁵Thaomeishong kachiva̱wui haiot athishurda, sinā thaomeishongbing kala chiwui sinā thaomeibingwui kharit, sinā thaomeishong kachiva̱ kala chiwui thaomeibingwui vang sinā kharit, kala lupāsā thaomeishong kachiva̱ kala chiwui thaomeibingwui vang lupāsā kharit mi. ¹⁶Ngasokhamiwui khamui haikhavai table kachiva̱wui vang sinā kharit mi; kala lupāsā tablebingwui vang lupāsā mi. ^b b v16 Ngasokhamiwui khamui (showbread da hala kahoa) chiya khorumshimli table akhawui tungli Varewui mangāli haikahai kathara khamui khani china, kala pāngmonbingna Sabbath zimiksho kachida ngahanserser sai. ¹⁷Sinā kachanga eina sākahai marik-kapei, khongsai, kala khongphei mi; sinā dishon kachiva̱wui kharit; lupāsā dishon kachiva̱wui kharit; ¹⁸nganamkaphā riktā khavai hanphutwui vang langkahai sināwui kharit; kala charfawui azakwui vang sinā mi; cherubim china angachāng hārlaga ithumwui Avāwui tuingashit oko chi farora. ¹⁹"Hi saikora chi," Davidna hānga, "ithumwui Avāwui pāng eina ili kapisangmi kahaina, ana ili azak saikorawui theithangkhamei sangmi."

²⁰Davidna awui naomayara Solomonli hānga, "Pingmeida malung zangmeilu; ot chi sālu. Mangacheealu lah ningla masuitāhaialu, kaja iwui Avāna nali ngasomida lei. Ithumwui Avāwui shimli otram ngatha̱ khavai ot saikora sākupranglakha eina tangda, ana nali masākhami maleimara lah horkahaila masālakmara. ²¹"Yanglu, pāngmonbing eina Levinaobing khumkhum eina ngayarkhaida, ithumwui Avāwui shimwui otram ngatha̱ saikorawui vang ngarānsangda lei. Them-kathema kala mingairereo kahai mi saikorana ot khipākhalila nali ngasora, wungnaobing eina mi saikorala nawui kakaso saikora khuisangda leira."