Pa na Kakoinu Thiamting Khat Indao Thang Rwe
Hananiah na indaoga, Babylon krwang om ringok ga sangwan kani sung bi raitalune diga rinluga, haga pi tip thang lang Jeremiah om ringok thingpek ding kaichat sate. Jeremiah na Amen diga baat rwe, habei ga thingpek om rwan la ani Pa om thin ringok ding pon lat rwe, khatle Hananiah khou, mi nun ding karwaknu lang balumsa to lang zei briakpina maan thilune diga rinne. Maanna batakka thi rwe.
Ani Pa na chongkhak hei bing bi kabia nge 13–14, 16
28 1Haba sangwan bi, Judah krwang Zedekiah na paannu kamanu balinu sangwan, impaangnu tha bi, Gibeon rwan Azor om sa kapaisa thiamting Hananiah na tako bing khatle mi nun se takung riak meithaan bi, ani Pa in bi akhou rinne: 2“Kraanmi rwan om Pukraangba, Israel om Rikrwang na rinne, Babylon krwang om ringok ding Eina rop rwe. 3Babylon krwang Nebuchadnezzar na heiba lana Babylon la lou se thang damnu Pukraangba in om pot bing se ding, sangwan kani sung bi heiba riak bi Eina han lou hunglune. 4Judah krwang, Jehoiakim om sa kapaisa Jeconiah khatle Babylon la nam thou damnu Judah rwan bazin mi se ding heiba riak bi Eina han lou hunglune, diga Pukraangba na rinne. Balangbe Babylon krwang om ringok ding Eina rop thanglune.”
5Ani Pa in bi han ongnu tako bing khatle mi nun se takung riak meithaan bi, thiamting Jeremiah na thiamting Hananiah khou baat rwe. 6Thiamting Jeremiah na rinne, “Amen! Ani Pa na hadanga to ding ngo. Babylon bina ani Pa in om pot bing khatle bazin mi se ding heiba riak bi han lou hungga, nangna ri chong rin swaknu chong bing ding Maanna pi tip thang ding ngo. 7Atiyeda atun, Eina nang khou khatle heiba mi nun se khou kabianu hei chong ding ngaiyo: 8Ani pui kama thoutan bina ongnu thiamting bing na chaat taswang khak khatle krwang talei liannu bing lu chung bi, kraan, liamnu khatle ripian ding ri chong rin swak ngaake. 9Dai bazaangnu ri chong rin swaknu thiamting om chong ga hung tang swaknu kaan bi thuba, haba thiamting ga ani Pa na batak sekka lang thang ngaaknu diga theilune.”
10Habei ga thiamting Hananiah na thiamting Jeremiah om daankong bina ringok ka louluga bwei rop rwe, 11Hananiah na mi nun se khou rinne, “Pukraangba na hadanga rinne, Sangwan kani sung bi chaat se om daankong bina Babylon krwang Nebuchadnezzar om ringok ding Eina bwei rop thanglune.” Habei ga thiamting Jeremiah na se thangsia rwe.
12Hananiah na thiamting Jeremiah om daankong bina ringok ka bwei rop thangnu nung bi, ani Pa om chong ga Jeremiah khou hung tang rwe:
13“Sero, Hananiah khou rinno, ani Pa na rinne, Nangna thing ringok ding bwei rop rwe atiyeda thin ringok ding to thanglune. 14Balangbe kraanmi rwan om Pa, Israel om ani Pa na rinne, Babylon krwang Nebuchadnezzar khou chwanlaang to langna heiba chaat se om daankong bi thin ringok ka Eina phun rwe, atiga banina chwanlaang tolune. Nilai lak khouring bing ding le Eina bakhou pi thang rwe.”
15“Thiamting Jeremiah na thiamting Hananiah khou rinne, ‘Ngaiyo, Hananiah! Ani Pa na nang ding lang thang make; nangna heiba mi nun ding chong karwaknu bi balumsa thang ongnuwe.’
16Atibriakpina ani Pa na rinne, Hei sangwan bi talei ram bina nang ding Eina lou swak thanglune; nangna ani Pa lu chung bi natnu chong ga pao swak briakpina nang thilune.”
17Atiga thiamting Hananiah ga haba sangwan khatchanu bi, siarinu tha bi thi rwe.