Balaam pora Tisra Bar Asirbad Diya

Balaam pora shogun bisara bondh kore, aru amar Pitri laga Atma tar uporte ahe. Tai tisra bar Israel laga tombu khan ke asirbad diye, Balak ke bisi khong uthai diye, titia bisi dur tak age te saye: Jacob pora ekta tara ulabo, ekta raj-lathi uthibo, aru Amalek laga khotom.

Adhyay 24.

Balaam pora dekhise ki Israel ke asirbad diya tu amar Pitri ke khushi dise, etu karne tar age nisena chihna nabisari kene, kintu jongol phale muri saise. Balaam pora upor te sai kene Israel khan jati-jati pora tombu lagai thaka dekhise; tetiya amar Pitri laga Atma tar uporte ahhise. Tar bhabobani uthai kene koise: “Beor laga putro Balaam laga bhabobani, jun manuh laga suku khuli ase tai laga bhabobani, amar Pitri laga kotha huna ekjon laga bhabobani, Sorbashoktiman laga darshan dekha, suku khuli kene niche jhuki thaka ekjon laga bhabobani: Jacob, tumar tombu khan kiman sundor ase, Israel, tumar thaka jaga khan! door tak phela upotyika khan nisena, nodi usorte thaka bagan khan nisena, amar Pitri pora lagai diya aloe gash khan nisena, pani khan usorte thaka devdar gash khan nisena. Tar balti khan pora pani bohi jabo, aru tar bongsho khan logot bisi pani thakibo. Tar raja tu Agag pora bhi untha hobo, aru tar rajyo tu dangor kori dibo. ^a Amar Pitri pora Israel ke Egypt pora ulai anise; Israel tu tarkhan karne jongli goru laga seng khan nisena ase. Israel pora taikhan ke birodh kora desh khan ke khai dibo, taikhan laga hardi khan bhangai dibo, aru taikhan ke tir pora bindhi dibo. Tai niche boi ase, tai singho nisena ghumai ase, maiki singho nisena—kun pora tai ke uthabole himmot koribo? Tumi ke asirbad diya khan asirbad pabo, aru tumi ke shrap diya khan shrap pabo.”

Balak laga khong Balaam uporte uthise, aru tai hath mari dise. Balak pora Balaam ke koise, “Moi tumi ke moi laga dushman khan ke shrap dibole matise, kintu tumi etiya tinbar taikhan ke asirbad di dise! Etiya tumar ghor te polai ja! Moi tumi ke bisi sonman dibo koi thakise, kintu Isor pora tumi ke sonman pora rukhai dise.”

Balaam pora Balak ke jawab dise, “Tumi pathai diya khobor-manuh khan ke moi kowa nai naki, ‘Jodi Balak pora moi ke tar ghor bhorta chandi aru suna dile bhi, moi nijor itcha te bhal nahole biya kaam koribole moi laga Isor laga hukum paar kori jabo naparibo; moi laga Isor pora moi ke ki koi, etu he moi kobo pare’? Aru etiya moi moi laga manuh khan logot te wapas jai ase. Ahhibi, etu manuh khan pora ahhibole thaka din khan te tumar manuh khan ke ki koribo, etu moi tumi ke janai dibo.”

Jacob Pora Uthi Aha Tara

Tetiya tar bhabobani uthai kene koise: “Beor laga putro Balaam laga bhabobani, jun manuh laga suku khuli ase tai laga bhabobani, amar Pitri laga kotha huna ekjon laga bhabobani, Sorbo Uccho Jon laga gyaan jana, Sorbashoktiman laga darshan dekha, suku khuli kene niche jhuki thaka ekjon laga bhabobani: Moi tai ke dekhise, kintu etiya nohoi; moi tai ke saise, kintu usorte nohoi. Jacob pora ekta tara ulabo, aru Israel pora ekta raj-lathi uthibo; etu pora Moab laga kapal chitki dibo aru Sheth laga sob putro khan ke bhangai dibo. ^b Edom ke jiti lobo, aru tar dushman Seir ke bhi jiti lobo, kintu Israel tu takot pora dangor hoi thakibo. Jacob pora ekjon raj koribo, aru sheher te bachi juwa khan ke khotom kori dibo.”

Tetiya Balaam pora Amalek ke dekhise, tar kotha uthai kene koise: “Amalek tu desh khan majote prothom thakise, kintu tar ses tu pura khotom hobo.”

Tai Kenite khan ke saise, tar bhabobani uthai kene koise: “Tumar thaka jaga tu mojbut ase, tumar basa pathor te lagai rakhise. Hoilebi Kain tu khotom hoi jabo jitia Asshur pora tumi ke bondi kori loi jabo.”

Tar bhabobani uthai kene koise: “Jitia Isor pora etu koribo, tetiya kun pora jinda thakibo pare? Kittim laga samundar kinar pora jahaj khan ahhibo; taikhan pora Asshur ke dukh dibo aru Eber ke bhi dukh dibo, kintu taikhan bhi pura khotom hoi jabo.” ^c

Tetiya Balaam uthi kene tar ghor te wapas jaise, aru Balak bhi tar nijor rasta te jaise.