Iyali da Sahihiyar Koyarwa Ta Tsara

An faɗa wa Titus abin da zai gaya wa kowane rukuni, tsofaffin maza, tsofaffin mata masu horar da 'yan mata, samari, da bayi, don kada a taɓa ɓata koyarwar. Alherin Ubanmu ya bayyana, yana koya wa mutane su yi rayuwa daidai yanzu yayin da suke jiran bayyanuwar Almasihu.

Babi na 2.

Amma kai, ka faɗa abin da ya dace da sahihiyar koyarwa. Dattawa su kasance masu natsuwa, masu mutunci, masu kamun kai, sahihai cikin bangaskiya, da ƙauna, da jimiri. Haka ma tsofaffin mata su kasance masu ladabi sosai a ɗabi'arsu, ba masu ɓata suna ba, ba bayin yawan shan giya ba, amma masu koyar da abin da yake nagari, domin su horar da matasan mata su ƙaunaci mazansu, su kuma ƙaunaci 'ya'yansu, masu kamun kai, tsabtatattu, masu aiki a gida, masu kirki, masu biyayya ga mazansu, domin kada a zagi maganar Ubanmu.

Haka ma, ka gargaɗi matasa maza su kasance masu kamun kai. A cikin kome, ka zama abin koyi a ayyuka nagari, da gaskiya da mutunci cikin koyarwarka, da sahihan kalmomi marasa aibi, domin duk mai hamayya yă ji kunya, saboda ba zai sami wani mummunan abu da zai faɗa game da mu ba.

Bayi su yi biyayya ga iyayengijinsu a cikin kome, su gamshe su, kada su yi musu jayayya, ^a kada su yi sata, sai dai su nuna cikakkiyar amana mai kyau, domin su ƙawata koyarwar Ubanmu, Mai Cetonmu, a cikin kome.

Gama alherin Ubanmu ya bayyana, yana kawo ceto ga dukan mutane, yana koya mana mu ƙi mugunta da sha'awoyin duniya, mu kuma yi rayuwa mai kamun kai, da adalci, da tsoron Allah a wannan zamani na yanzu, muna jiran begen nan mai albarka da bayyanar ɗaukaka ta Allahnmu mai girma da Mai Cetonmu, Yesu Almasihu, ^b wanda ya ba da kansa saboda mu, domin yă fanshe mu daga dukan fasikanci, yă kuma tsarkake wa kansa jama'a ta kansa, masu marmarin ayyuka nagari.

Ka yi shelar waɗannan abubuwa; ka ƙarfafa, ka kuma tsawata da dukan iko. Kada ka bar kowa yă rena ka.