ኣብ ሰማይ ዝነበረ ስቕታ

ሰማይ ኣስታት ፍርቂ ሰዓት ስቕ ይብል። ሓደ መልኣኽ ፀሎት እቶም ቅዱሳን ምስ ዕጣን ኣብ ቅድሚ ኣቦና የቕርብ፥ ደሓር ከዓ ሓዊ እቲ ፅንሃህ ናብ ምድሪ ይድርብዮ። ኣርባዕተ መለኸት ይስዕቡ፥ ነፍሲ ወከፍ ሲሶ ዘጥፍእ—ምድሪ፥ ባሕሪ፥ ሩባታት፥ ብርሃን—ሓደ ንስሪ ድማ ዝገደደ ኸም ዝመፅእ ይጭድር።

ምዕራፍ 8።

እቲ ገንሸል ነቲ ሻውዐይቲ ማሕተም ምስ ከፈተ፥ ኣብ ሰማይ ኣስታት ፍርቂ ሰዓት ዝኣክል ስቕታ ኮነ። ነቶም ኣብ ቅድሚ ኣቦና ደው ዝብሉ ሸውዓተ መላእኽቲ ኸዓ ረአኹ፤ ሸውዓተ መለኸት ድማ ተውሃቦም።

ካልእ መልኣኽ ድማ መፀ፤ ናይ ወርቂ ፅንሃህ ሒዙ ኸዓ ኣብቲ መሰውኢ ደው በለ፤ ምስ ፀሎት ኵሎም ቅዱሳን ኣብቲ ኣብ ቅድሚ እቲ ዙፋን ዘሎ ናይ ወርቂ መሰውኢ ምእንቲ ኸቕርብ ድማ፥ ብዙሕ ዕጣን ተውሃቦ። ትኪ እቲ ዕጣን ድማ ምስ ፀሎት ቅዱሳን ኮይኑ፥ ካብ ኢድ እቲ መልኣኽ ናብ ቅድሚ ኣቦና ደየበ። ^a እቲ መልኣኽ ድማ ነቲ ፅንሃህ ወሲዱ፥ ካብቲ መሰውኢ ሓዊ መሊእዎ ናብ ምድሪ ደርበዮ፤ ነጐድጓድን ድምፅታትን መብረቕን ምንቅጥቃጥ ምድርን ከዓ ኮነ።

እቶም ሸውዓተ መለኸት ተዳለዉ

እቶም ሸውዓተ መለኸት ዝሓዙ ሸውዓተ መላእኽቲ ድማ ክንፍሕዎም ተዳለዉ።

እቲ ቐዳማይ መልኣኽ መለኸቱ ነፍሐ፤ በረድን ሓዊን ምስ ደም ተሓዊሱ ናብ ምድሪ ተደርበየ። ሲሶ ምድሪ ተቓፀለ፥ ሲሶ ኣእዋም ተቓፀለ፥ ኵሉ ልሙዕ ሳዕሪ ድማ ተቓፀለ።

እቲ ኻልኣይ መልኣኽ መለኸቱ ነፍሐ፤ ከም ዓብዪ እምባ ዝኣመሰለ ብሓዊ ዝነድድ ነገር ድማ ናብ ባሕሪ ተደርበየ። ሲሶ ባሕሪ ኸዓ ደም ኮነ። ሲሶ እቶም ኣብ ባሕሪ ዘለዉ ህይወት ዘለዎም ፍጡራት ሞቱ፥ ሲሶ መራኽብ ድማ ጠፍአ።

እቲ ሳልሳይ መልኣኽ መለኸቱ ነፍሐ። ከም ሽግ ዝነድድ ዓብዪ ኮኸብ ድማ ካብ ሰማይ ናብ ሲሶ ሩባታትን ዓይኒ ማያትን ወደቐ። ስም እቲ ኮኸብ ከዓ ኣሳሮ እዩ። ሲሶ እቲ ማያት ድማ መሪር ኮነ፤ እቲ ማያት መሪር ስለ ዝኾነ ኸዓ ብዙሓት ሰባት ካብቲ ማያት ሞቱ። ^b

እቲ ራብዓይ መልኣኽ መለኸቱ ነፍሐ፤ ሲሶ ፀሓይን ሲሶ ወርሕን ሲሶ ከዋኽብትን ተወቕዐ፥ ሲሶኦም ድማ ፀልመተ፤ ሲሶ መዓልቲ ብርሃን ኣይነበሮን፥ ለይቲ ኸዓ ኸምኡ። ሽዑ ድማ ሓደ ኣብ ማእኸል ሰማይ ዝበርር ንስሪ ረአኹ፥ ዓው ኢሉ ኸዓ ከምዙይ ክብል ሰማዕኹ፦ “ኣብ ምድሪ ንዝነብሩ፥ ካብቲ እቶም ገና ኽንፍሑ ዘለዎም ሰለስተ መላእኽቲ ዝተረፈ ድምፂ መለኸት ዝተላዕለ፥ ወይለኦም፥ ወይለኦም፥ ወይለኦም!”