Shiru a Sama
Sama ta yi shiru kamar rabin sa'a. Wani mala'ika ya ɗaga addu'o'in tsarkaka tare da turare a gaban Ubanmu, sa'an nan ya jefa wutar farantin turaren ƙasa. Ƙahoni huɗu suna biyo baya, kowanne yana lalatar da kashi ɗaya bisa uku — ƙasa, teku, koguna, haske — sai gaggafa ta yi kuka cewa mafi muni yana zuwa.
8 1Da Ɗan Rago ya buɗe hatimi na bakwai, sai aka yi shiru a Sama kamar rabin sa'a. 2Na kuma ga mala'iku bakwai waɗanda suke tsaye a gaban Ubanmu, aka kuwa ba su ƙahoni bakwai.
3Sai wani mala'ika ya zo, ya tsaya a bagade riƙe da farantin turare na zinariya, aka kuma ba shi turare mai yawa domin yă miƙa shi tare da addu'o'in dukan tsarkaka a bisa bagaden zinariya da yake a gaban kursiyi. 4Hayaƙin turaren, tare da addu'o'in tsarkaka, ya tashi a gaban Ubanmu daga hannun mala'ikan. a a v4 Ko a tsakiyar hukunci, Ubanmu da kansa yakan karɓi kowace addu'ar 'ya'yansa — kukan tsarkaka yana hawa gare shi a bisa bagaden Sama. 5Sai mala'ikan ya ɗauki farantin turaren, ya cika shi da wutar bagade, ya jefa shi ƙasa; sai aka yi tsawa, da motsin ƙara, da walƙiya, da girgizar ƙasa.
Ana Shirin Busa Ƙahoni Bakwai
6Mala'iku bakwai nan da suke riƙe da ƙahoni bakwai kuwa suka shirya su busa su.
7Mala'ika na fari ya busa ƙahonsa, sai ƙanƙara da wuta gauraye da jini suka fāɗa duniya. Sulusin duniya ya ƙone, sulusin itatuwa ya ƙone, dukan ɗanyar ciyawa kuma ta ƙone.
8Mala'ika na biyu ya busa ƙahonsa, sai aka jefa wani abu kamar babban dutse mai cin wuta cikin teku. Sulusin teku ya zama jini. 9Sulusin halittu masu rai da suke cikin teku ya mutu, sulusin jiragen ruwa kuma ya lalace.
10Mala'ika na uku ya busa ƙahonsa. Sai wani babban tauraro mai cin wuta kamar fitila ya fāɗo daga Sama a kan sulusin koguna da maɓuɓɓugan ruwa. 11Sunan tauraron Ɗaci. Sulusin ruwaye kuwa ya zama mai ɗaci, mutane da yawa kuma suka mutu saboda ruwan, don ya zama mai ɗaci. b b v11 Ɗaci wata tsiro ce sananniya saboda tsananin ɗacinta — sunan tauraron ya yi daidai da mugun aikinsa a kan ruwaye.
12Mala'ika na huɗu ya busa ƙahonsa, sai aka bugi sulusin rana, da wata, da taurari, har sulusinsu ya yi duhu; sulusin yini kuwa ya rasa haske, dare ma haka. 13Sa'an nan na duba, na kuma ji wani gaggafa yana tashi a tsakiyar sararin sama yana ihu da ƙarfi, yana cewa, Kaito, kaito, kaiton mazaunan duniya, saboda sauran busar ƙahonin mala'iku uku da suke gab da busawa!