Tunei Surkwen
Keleenji surkwen kyget koboiboi. Keleenji piik che tinyei eunek che nyalulyotin ak muguleldo che iwoolegei kole nyonei Kwandang'wong' ineegei. Yeityo koyaatak konyegap che koryotiin, kotoromben che ing'waldos ko uu teweretyot, isururgei peek eng' sandet ne beelei pooldet, ak komiitei ooreet ne tiliil ne weendi kaa, ole mabendi che ng'woneen.
35 1Koboiboitu surkwen ak emet ne yaamaat; koboiboitu ong'ateet ak kotuneni ko uu taapteet. 2Kotuneni abune ak koboiboi eng' poiboiyet ak tyendo. Kigoochini toroornatetap Lebanon, korooronindo ne po Karmel ak Sharon. Kogeerei icheek toroornatetap Kwandanyo, telunatetap Kwandanyo. a a v2 Lebanon, Karmel, ak Sharon ko ki komoswekap Israel ne po keny che ki kililwen agobo timwekwak che neryootiin, tuloonoogwak che ruryotiin, ak korooronindap ng'wony — kaigei kainoik che po korooronindo.
3Igimit eunek che nyalulyotin, ak igimit kutung'oik che meiyotiin. 4Mwachi icheek che tinyei muguleldo ne iwoolegei, “Ogimit; ameiywei! Ogeer, nyonei Kwandang'wong' kobooto kirwoogutik, ak kageeretap Kwandanyo. Nyonei ak kosarwok.”
5Yeityo koyaatak konyegap che koryotiin, ak koyaatak itigap che miing'en. b b v5 Ye kingo teeba Johana ne po Kaptisisyet kobunu kapkeny kole tos Jeso ko ineendet ne nyonei, kowolji Jeso eng' ng'aleechu agetugul — che koryotiin kogeerei, che miing'en kogasei, che ing'waldos kotorombei — ne iboorunei poisyetap ruutennyi ko uu nyonetap sarunet ne ki kayomit Kwanda eng' keny (Matayo 11:5; Luka 7:22). 6Yeityo kotoromben che ing'waldos ko uu teweretyot, ak kotyen tongoanigap che namaat kuut eng' poiboiyet. Amu isururgei peek eng' surkwen, ak kereruusyek eng' ong'ateet. 7Koek sandet ne beelei pooldet, ak emet ne amei melelda kong'igap peek; eng' ole menyei suiyosyek, ole ruitos, koek susweek saoset ak morong'yot.
8Ak komiitei yooto ooreet ne oo, ooreet, ak kiguure ooreetap Tiliilindo. Mabendi ooreenooto che ng'woneen; po ineendet ne pendi ooreet — kot che perber koma betotos. 9Mamiitei ng'etundo yooto, ak mabendi tyong'indo age tugul ne poriseni; mekinyoor icheek yooto. Ago kobendi che kagiweech yooto, 10ak koweeksei che kagityaach po Kwandanyo. Konyonei Zion kobooto tyendo, poiboiyet ne po koigeny eng' metowekwak; koname kagasetapkei ak poiboiyet icheek, ak kochaakta arageneet ak riiret.