ପିତା ଆପଣା ନଗରକୁ ଫେରିଆସନ୍ତି

ଆମ ପିତା କହନ୍ତି ସେ ସିୟୋନକୁ ଫେରି ଆସିଛନ୍ତି, ଏବଂ ସେ ଯେଉଁ ଚିତ୍ର ଦିଅନ୍ତି ତାହା ସାଧାରଣ: ବାଡ଼ି ଧରିଥିବା ବୃଦ୍ଧ ଲୋକ, ଦାଣ୍ଡରେ ଖେଳୁଥିବା ପିଲାମାନେ। ଉପବାସଗୁଡ଼ିକ ଉତ୍ସବରେ ପରିଣତ ହେବ, ଜାତିମାନେ ତାଙ୍କୁ ଖୋଜି ଆସିବେ, ଏବଂ ତାଙ୍କ ଲୋକମାନେ ସତ୍ୟ କହିବେ ଓ ସଚ୍ଚୋଟ ଭାବେ ବିଚାର କରିବେ।

ଅଧ୍ୟାୟ 8।

ସ୍ଵର୍ଗୀୟ ବାହିନୀଗଣର ପିତାଙ୍କ ବାକ୍ୟ ମୋʼ ନିକଟରେ ଉପସ୍ଥିତ ହୋଇ କହିଲା,

ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି, ଆମ୍ଭେ ସିୟୋନ ନିମନ୍ତେ ମହା ଉଦ୍‌ଯୋଗରେ ଉଦ୍‌ଯୋଗୀ ଅଟୁ; ପ୍ରଜ୍ଵଳିତ କୋପରେ ଆମ୍ଭେ ତାହା ନିମନ୍ତେ ଉଦ୍‌ଯୋଗୀ ଅଟୁ।

ଆମ୍ଭମାନଙ୍କ ପିତା ଏହା କହନ୍ତି, ଆମ୍ଭେ ସିୟୋନକୁ ଫେରିଅଛୁ ଓ ଯିରୂଶାଲମ ମଧ୍ୟରେ ବାସ କରିବା। ତହିଁରେ ଯିରୂଶାଲମ ସତ୍ୟ ନଗର ବୋଲି, ପୁଣି ସ୍ଵର୍ଗୀୟ ବାହିନୀଗଣର ପିତାଙ୍କ ପର୍ବତ ପବିତ୍ର ପର୍ବତ ବୋଲି ବିଖ୍ୟାତ ହେବ।

ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି, ବୃଦ୍ଧ ପୁରୁଷ ଓ ବୃଦ୍ଧା ସ୍ତ୍ରୀମାନେ ପୁନର୍ବାର ଯିରୂଶାଲମର ଛକମାନଙ୍କରେ ବସିବେ, ପୁଣି ପ୍ରତ୍ୟେକେ ଅଧିକ ବୟସ ସକାଶୁ ହସ୍ତରେ ଆପଣା ଆପଣା ଯଷ୍ଟି ଧରିବେ। ଆଉ ନଗରର ଛକମାନ କ୍ରୀଡ଼ାକାରୀ ବାଳକ ଓ ବାଳିକାମାନଙ୍କ ଦ୍ଵାରା ପରିପୂର୍ଣ୍ଣ ହେବ।

ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି, ସେହି ସମୟରେ ଏହି ଲୋକମାନଙ୍କର ଅବଶିଷ୍ଟାଂଶ ଦୃଷ୍ଟିରେ ଯଦି ତାହା ଅତି ଆଶ୍ଚର୍ଯ୍ୟ ବୋଧ ହୁଏ, ତେବେ ଆମ୍ଭ ଦୃଷ୍ଟିରେ ହିଁ କʼଣ ତାହା ଅତି ଆଶ୍ଚର୍ଯ୍ୟ ବୋଧ ହେବ? ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି।

ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି, ଦେଖ, ଆମ୍ଭେ ଆପଣା ଲୋକମାନଙ୍କୁ ସୂର୍ଯ୍ୟୋଦୟ ଦେଶରୁ ଓ ସୂର୍ଯ୍ୟାସ୍ତ ଦେଶରୁ ପରିତ୍ରାଣ କରିବା। ପୁଣି ଆମ୍ଭେ ସେମାନଙ୍କୁ ଯିରୂଶାଲମ ମଧ୍ୟରେ ବାସ କରିବା ନିମନ୍ତେ ସ୍ଵଦେଶକୁ ଆଣିବା; ତହିଁରେ ସେମାନେ ଆମ୍ଭର ସନ୍ତାନ ହେବେ ଓ ଆମ୍ଭେ ସତ୍ୟ ଓ ଧାର୍ମିକତାରେ ସେମାନଙ୍କର ପିତା ହେବା।

ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି, ସ୍ଵର୍ଗୀୟ ବାହିନୀଗଣର ପିତାଙ୍କ ଗୃହର ଭିତ୍ତିମୂଳ ସ୍ଥାପିତ ହେବା ବେଳେ ଯେଉଁ ଭାବବାଦୀମାନେ କହିଥିଲେ, ସେମାନଙ୍କ ମୁଖରୁ ଏହି ବାକ୍ୟ ଯେଉଁ ତୁମ୍ଭେମାନେ ଏହି କାଳରେ ଶୁଣୁଅଛ, ତୁମ୍ଭମାନଙ୍କ ହସ୍ତ ବଳିଷ୍ଠ ହେଉ, ଯେପରି ମନ୍ଦିର ନିର୍ମିତ ହୋଇ ପାରିବ। ସେହି ସମୟ ପୂର୍ବରୁ ମନୁଷ୍ୟ କି ପଶୁ ନିମନ୍ତେ କୌଣସି ବେତନ ମିଳୁ ନ ଥିଲା, ଆଉ ଯେ ବାହାରକୁ ଯାଉଥିଲା କିମ୍ବା ଭିତରକୁ ଆସୁଥିଲା, ସେ ଶତ୍ରୁଠାରୁ ନିରାପଦ ନ ଥିଲା; କାରଣ ଆମ୍ଭେ ପ୍ରତ୍ୟେକ ଲୋକକୁ ତାହାର ପ୍ରତିବାସୀ ବିରୁଦ୍ଧରେ ଲଗାଇ ଦେଇଥିଲୁ। ମାତ୍ର ଏବେ ଆମ୍ଭେ ଏହି ଲୋକମାନଙ୍କର ଅବଶିଷ୍ଟାଂଶ ପ୍ରତି ପୂର୍ବକାଳର ନ୍ୟାୟ ବ୍ୟବହାର କରିବା ନାହିଁ, ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି। ଶାନ୍ତିର ବୀଜ ବୁଣାଯିବ; ଦ୍ରାକ୍ଷାଲତା ଆପଣା ଫଳ, ଭୂମି ଆପଣା ଶସ୍ୟ ଓ ଆକାଶମଣ୍ଡଳ ଆପଣା ଶିଶିର ଦେବ। ପୁଣି ଆମ୍ଭେ ଏହି ଲୋକମାନଙ୍କର ଅବଶିଷ୍ଟାଂଶକୁ ଏହିସବୁ ଅଧିକାର କରିବାକୁ ଦେବା। ହେ ଯିହୂଦା ବଂଶ ଓ ଇସ୍ରାଏଲ ବଂଶ, ଯେପରି ତୁମ୍ଭେମାନେ ଗୋଷ୍ଠୀଗଣ ମଧ୍ୟରେ ଅଭିଶାପ ସ୍ଵରୂପ ହୋଇଥିଲ, ସେପରି ଆମ୍ଭେ ତୁମ୍ଭମାନଙ୍କୁ ପରିତ୍ରାଣ କରିବା, ଆଉ ତୁମ୍ଭେମାନେ ଆଶୀର୍ବାଦ ସ୍ଵରୂପ ହେବ। ଭୟ କର ନାହିଁ, ତୁମ୍ଭମାନଙ୍କ ହସ୍ତ ବଳିଷ୍ଠ ହେଉ।

ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି, ତୁମ୍ଭମାନଙ୍କ ପିତୃପୁରୁଷଗଣ ଆମ୍ଭକୁ କ୍ରୋଧ ଜନ୍ମାଇବା ବେଳେ ଆମ୍ଭେ ଯେପରି ତୁମ୍ଭମାନଙ୍କ ପ୍ରତି ଅମଙ୍ଗଳ ଘଟାଇବାକୁ ସଙ୍କଳ୍ପ କରିଥିଲୁ ଓ ଆପଣା ମନ ପରିବର୍ତ୍ତନ କରି ନ ଥିଲୁ, ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି, ସେପରି ଏହି କାଳରେ ଆମ୍ଭେ ପୁନର୍ବାର ଯିରୂଶାଲମ ଓ ଯିହୂଦା ବଂଶର ମଙ୍ଗଳ କରିବାକୁ ସ୍ଥିର କରିଅଛୁ। ତୁମ୍ଭେମାନେ ଭୟ କର ନାହିଁ। ତୁମ୍ଭେମାନେ ଏହିସବୁ କର୍ମ କର; ପ୍ରତ୍ୟେକେ ଆପଣା ପ୍ରତିବାସୀ ସହିତ ସତ୍ୟ କଥା କୁହ; ତୁମ୍ଭମାନଙ୍କ ନଗରଦ୍ଵାରରେ ଶାନ୍ତି ନିମନ୍ତେ ସତ୍ୟ ଓ ନ୍ୟାୟର ବିଚାର କର। ^a ତୁମ୍ଭେମାନେ ଆପଣା ଆପଣା ହୃଦୟରେ ପ୍ରତିବାସୀ ବିରୁଦ୍ଧରେ କୁକଳ୍ପନା କର ନାହିଁ, ଆଉ ମିଥ୍ୟା ଶପଥକୁ ପ୍ରେମ କର ନାହିଁ; କାରଣ ଆମ୍ଭେ ଏହିସବୁ ଘୃଣା କରୁ, ଆମ୍ଭମାନଙ୍କ ପିତା ଏହା କହନ୍ତି।

ଏଉତ୍ତାରେ ସ୍ଵର୍ଗୀୟ ବାହିନୀଗଣର ପିତାଙ୍କ ବାକ୍ୟ ମୋʼ ନିକଟରେ ଉପସ୍ଥିତ ହୋଇ କହିଲା,

ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି, ଚତୁର୍ଥ, ପଞ୍ଚମ, ସପ୍ତମ ଓ ଦଶମ ମାସର ଉପବାସସବୁ ଯିହୂଦା ବଂଶ ପ୍ରତି ଆନନ୍ଦ, ଉଲ୍ଲାସ ଓ ଆହ୍ଲାଦଜନକ ଉତ୍ସବ ହେବ। ଏଣୁ ତୁମ୍ଭେମାନେ ସତ୍ୟ ଓ ଶାନ୍ତିକୁ ପ୍ରେମ କର। ^b

ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି, ଭବିଷ୍ୟତରେ ଲୋକସମୂହ, ଅର୍ଥାତ୍‍ ଅନେକ ନଗରର ନିବାସୀମାନେ ଆସିବେ। ପୁଣି ଏକ ନଗରର ନିବାସୀମାନେ ଅନ୍ୟ ନଗରକୁ ଯାଇ କହିବେ, ‘ଆସ, ଆମ୍ଭେମାନେ ଆମ୍ଭମାନଙ୍କ ପିତାଙ୍କ ଅନୁଗ୍ରହ ପ୍ରାର୍ଥନା କରିବାକୁ, ଅର୍ଥାତ୍‍ ସ୍ଵର୍ଗୀୟ ବାହିନୀଗଣର ପିତାଙ୍କ ଅନ୍ଵେଷଣ କରିବାକୁ ଅବିଳମ୍ବେ ଯିବା; ମୁଁ ମଧ୍ୟ ଯିବି।’ ଆଉ ଅନେକ ଲୋକ ଓ ବଳବାନ ଗୋଷ୍ଠୀୟମାନେ ଯିରୂଶାଲମରେ ସ୍ଵର୍ଗୀୟ ବାହିନୀଗଣର ପିତାଙ୍କ ଅନ୍ଵେଷଣ କରିବାକୁ ଓ ଆମ୍ଭମାନଙ୍କ ପିତାଙ୍କ ଅନୁଗ୍ରହ ପ୍ରାର୍ଥନା କରିବାକୁ ଆସିବେ। ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି, ସେହି ସମୟରେ ନାନା ଗୋଷ୍ଠୀର ସର୍ବ ଭାଷାବାଦୀ ଦଶ ଜଣ ଲୋକ ଜଣେ ଯିହୂଦୀ ଲୋକର ବସ୍ତ୍ରାଞ୍ଚଳ ଧରି କହିବେ, ‘ଆମ୍ଭେମାନେ ତୁମ୍ଭ ସଙ୍ଗେ ଯିବୁ, କାରଣ ଈଶ୍ଵର ତୁମ୍ଭ ସଙ୍ଗରେ ଅଛନ୍ତି ବୋଲି ଆମ୍ଭେମାନେ ଶୁଣିଅଛୁ।’