Mishān 3

3 ¹Sinai Kaphungli ithumwui Avāna Mosesli rāhāngthang Aaron eina Moseswui naotunbing chi hina. ²Hibing Aaronwui naomayarabingwui amingna: naochizai Nadab, chiwui thili Abihu, Eleazar, kala Ithamar. ³Hibing Aaronwui naomayarabingwui amingna, thao neomi kahai pāngmonbing, Mosesna pāngmon sāda otram ngatha̱mi khavai tharchigat kahaibing. ⁴Nadab eina Abihuna Sinai lamhāngli ithumwui Avāwui mangāli makathara mei kachigatwui vang, awui mangāli thihaowa; aniwui nao maleimana. Chiwui vang eina Eleazar eina Ithamarna aniwui avāva̱ Aaronwui mangāli pāngmon sai.

⁵Chiwui thili ithumwui Avāna Mosesli hānga,

⁶"Levi shangli khuirālaga pāngmon Aaronwui mangāli chipamlu, chithāda athumna ali otram ngatha̱ra. ⁷Athumna kazip khavai kachonshim mangāli awui otngarut kala yarui ashangva̱ katongawui otngarut yangmida, tabernacleli otram ngatha̱ra. ⁸Athumna kazip khavai kachonshimwui shikachin khorkhong saikora kala Israelnaobingwui otngarut yanglaga, tabernacleli otram ngatha̱ra. ⁹Levinaobingli Aaron eina awui naomayarabingli mihaolu; athum Israel mibingwui eina ningtongda ali michao kahaina. ¹⁰Aaron eina awui naomayarabingli athumwui pāngmon otpam yangsangmi khavai kapangkhuilu; kha ayarwui mi khipānakha rānganaiakha thiphalungra."

¹¹Chiwui thili ithumwui Avāna Mosesli hānga,

¹²"Yanglu, ina Levinaobingli Israel mibingwui eina, Israelnaobing alungli naopam shokkhare naochizai saikorawui mahut khuihaira. Levinaobing iwuina. ^a a v12 Levinaobingna Israelwui naochizai naomayarabingwui mahut sāra; chibing hi Israelwui mibing Egyptwui eina kashok atam Varena Egyptwui pharākhare sāthatthang, haokaphokli Varewui vang tharchigat kahaibingna (Exodus 13:2 yanglu). ¹³Pharākhare saikora iwuina. Egypt ngaleili pharākhare katonga sathatthang, Israelli pharākhare saikora, mila sha̱keila, ina ikhalattawui vang tharchigathaira. Athum iwui ngasāra. I nathumwui Avāna."

¹⁴Chiwui thili ithumwui Avāna Sinai lamhāngli Mosesli hānga,

¹⁵"Leviwui naomayarabingli athumwui avāva̱ ngarāwui shimlak kala shimkhur athishurda shānkhuilu; mayarnao kachāngkhawui eina thuida chiwui atung saikora shānkhuilu."

¹⁶Chieina ali kaso kahai athishurda, Mosesna ithumwui Avāwui khak eina athumli shānkhui.

¹⁷Hibing Leviwui naomayarabing athumwui aming athishurda: Gershon, Kohath, kala Merarina. ¹⁸Hibing Gershonwui naomayarabingwui amingna, athumwui shimkhurwui athishurda: Libni eina Shime-i. ¹⁹Kohathwui naomayarabing athumwui shimkhurwui athishurda: Amram, Izhar, Hebron, kala Uzzielna. ²⁰Merariwui naomayarabing athumwui shimkhurwui athishurda: Mahli eina Mushina. Hibing avāva̱ ngarāwui shimlak athishurda Levibingwui shimkhurna.

²¹Gershonwui eina Libnaobingwui shimkhur kala Shime-inaobingwui shimkhur shoka; hibing Gershonnaobingwui shimkhurbingna. ²²Athumwui mayarnao mashing, kachāngkhawui eina thuida chiwui atung saikora, thing shini shāphangāna.

²³Gershonnaobingwui shimkhurbingna tabernaclewui khanukshong zingtunshongli rāmrah vasāpama. ²⁴Gershonnaobingwui avāva̱ ngarā shimkhurwui kathāna chi Laelwui naomayara Eliasaphna. ²⁵Gershonwui naomayarabingna kazip khavai kachonshimli tabernacle, kachonshim, chiwui fakham khavai, kala kazip khavai kachonshimwui khāmongwui chonrān yangra. ²⁶Tabernacle eina hanphut kuimareida khalei yāngkhupli rānkhavai, chiwui zangkhavai ngaveiwui chonrān, kala chiwui otli shikachin khara̱bing saikorala athumna yangra.

²⁷Kohathwui eina Amramnaobingwui shimkhur, Izharnaobingwui shimkhur, Hebronnaobingwui shimkhur, kala Uzzielnaobingwui shimkhur shoka; hibing Kohathnaobingwui shimkhurbingna. ²⁸Mayarnao kachāngkhawui eina thuida chiwui atung saikora mashing thing chishat shātharukna, kathara shim khamayonabingna.

²⁹Kohathwui naomayarabingwui shimkhurbingna tabernaclewui azingshongli rāmrah vasāpama. ³⁰Kohathnaobingwui shimkhurbingwui avāva̱ ngarā shimkhurwui kathāna chi Uzzielwui naomayara Elizaphanna. ³¹Athumna oko, table, thaomeishong, hanphutbing, kathara shimli shichin khavai khorkhongbing, chonrān, kala chiwui ot saikora yangra. ³²Pāngmon Aaronwui naomayara Eleazar hi Levinaobingwui kathāna khareina, kala kathara shim khamayonabingli yangra.

³³Merariwui eina Mahnaobingwui shimkhur kala Mushnaobingwui shimkhur shoka; hibing Merarinaobingwui shimkhurbingna. ³⁴Athumwui mayarnao mashing, kachāngkhawui eina thuida chiwui atung saikora, thing tharuk shākhanina.

³⁵Merarishi shimkhurwui avāva̱ ngarāwui shimlakwui kathāna chi Abihailwui naomayara Zurielna; athumna tabernaclewui atungshong rāmrah sāpama. ³⁶Merariwui naomayarabingna tabernaclewui akombing, khamakhārra thingbing, pākra̱bing, apheibing, chiwui shikachin khorkhong saikora, kala chiwui otram khangatha̱ saikora yangra; ³⁷Yāngkhup kuimareida khalei pākra̱bing, chiwui apheibing, thingshun kala khara̱bing saikorala athumna yangra.

³⁸Kala tabernaclewui zingshoshong, kazip khavai kachonshimwui mangāli zingshoshong rāmrah sāpama chi Moses, Aaron, kala anaomayarabing china, athumna Israelnaobingwui vang eina katharapamli yangra; kala kachikathā ayarwui mina rānganaiakha chipāli shaothatra. ³⁹Ithumwui Avāna kaso kahai athishurda Moses eina Aaronna Levinaobing saikora shānlaga, athumwui shimkhur athishurda, mayarnao kachāngkha eina thuida chiwui atungbing saikora: mi thing maga̱da khanina.

Naochizaibingli Ngatangkhui

⁴⁰Chieina ithumwui Avāna Mosesli hānga, "Israelwui mayarnao naochizai kachāngkha eina thuida chiwui atungbing saikora mishān khuilu, kala athumwui amingwui mashing chi ngarumlu. ⁴¹Levinaobingli iwui vang khuilu—I nathumwui Avāna—Israelnaobingwui alungli naochizai saikorawui mahut, kala Israelwui sha̱keiwui naochizai saikorawui mahut Levinaobingwui sha̱kei khuilu."

⁴²Chithāda ithumwui Avāna ali kaso kahai athishurda, Mosesna Israelnaobingwui naochizai saikora mishān khui. ⁴³Mayarnao naochizai saikora, kachāngkha eina thuida, aming mashing athishurda: mi thing maga̱da khani shākhani hangshinida kathumna.

⁴⁴Chieina ithumwui Avāna Mosesli hānga:

⁴⁵"Israelnaobingwui naochizai saikorawui mahut Levinaobingli khuilu, kala athumwui sha̱keiwui mahut Levinaobingwui sha̱kei khuilu. Levinaobing iwui ngasāra. I nathumwui Avāna. ⁴⁶Levinaobingwui mashingli lāngda khalei Israelwui naochizai shākhani hangshinida kathum chi ngatangkhui khavaina. ⁴⁷Mipha̱li shekel khani khuilu, kathara shimwui shekel athishurda (shekel kachiva̱ chi lupāsā beka sha̱khana). ⁴⁸Lupā chi Aaron eina anaomayarabingli, lāngda khalei naochizaibingwui ngatangman thāda milu."

⁴⁹Chithāda Mosesna Levinaobingwui mashingli lāngda khalei naochizaibingwui eina ngatangman lupā chi khui; ⁵⁰Israelnaobingwui naochizaibingwui eina ana thing kha shākathum hangtharukta phangā khui; chi kathara shimwui shekel athishurda shekel khanina. ⁵¹Ithumwui Avāna Mosesli kaso kahai athishurda, ithumwui Avāwui tui eina Mosesna ngatangman lupā chi Aaron eina anaomayarabingli mihaowa.