Ephesianao 1

1 ¹Ithumwui Avāwui kaphaning athishurda Khrista Jishuwui paokazata Paulna, Ephesusli khalei katharabing kala Khrista Jishuli chisin kahaibingli kagapina: ^a a v1 Kharuihon kachāngwui lairikbingli "Ephesusli" da tui chi maleimana. ²Ithumwui Avā kala Proho Jishu Khristana nathumli lukhamashan kala chingri kahai miranu.

Khaluma chiwuili Sokhami Saikora

³Kazingramli khalei manglāwui sokhami saikora eina Khristali ithumli somi kahai, ithumwui Proho Jishu Khristawui Avāli soranu. ^b b v3 Paulwui sokhamiwui tui hina verse 14 eina tangda ngayaovai masot tui khare akha haokaphok ngasaka — ithumwui Avāna Anaomayarali ithumli somi, kala Manglā Katharana ithumli mahor nammihaira. Huikhamiwui apong hupva̱ hi kachinaokhui-kachinaophāwuina. ⁴Ithum leikashi lungli ithumwui Avāwui mangāli kathara kala shāt makā ngasak khavai, ana okathui masāranglakhawui eina ithumli ali kapangkhuihaira. ⁵Ana ithumli Jishu Khristawui mangā eina awui naongarā ngasak khavai, awui kaphaningwui ningyat athishurda phaishokhaira. ^c c v5 Ithumwui Avāwui katang makhavai kaphaning hi huikhami chimāng maningmana — kha naongarā sāhaoluishit khavaina. Okathui maleiranglakhawui eina ana ngakarthuida, Jishuna ithumli awui naongarā sāda shimli khuirā khavaina. ⁶Awui tekhamatei lukhamashanwui masot khavai, chi lukhamashan chi Khaluma Jishuli lemmet eina ithumli mikahaina. ⁷Ithumwui Avāwui lukhamashan kashāng athishurda, ali awui ashee eina ithumna ngatangkhami, ithumwui morei pheokhami chi, samphanghaira. ⁸Chi lukhamashan chi ana thangkhamei kala theishingkakhui saikora eina ithumli heisangmihaira. ⁹Ana ithumli awui ningkachāngwui kathuka tui, Khristali ngarānping kahai awui kaphaning chi theingasakhaira, ¹⁰Hi atambing pemngasaka retkahai atamwui vang, kazingramli kala okathuili khalei ot saikora chi Khristali khokkha sāda ngasaki khavai khangarān akhana. ¹¹Awui ningkachāngwui hāngkachithei athishurda ot saikora sāngasakpai ithumwui Avāwui kaphaning athishurda sānngarānda phaishok kahai ithumla ali shimluikat sāhaokahaina. ¹²Chithākha Khristali rida chihān kahaia ithumna, awui tekhamatei masot mi khavaina. ¹³Ali nathumla, nathumwui huikhamiwui paokaphā, khamashungwui tui chi shālaga ali shitsangda, ngashit kahai Manglā Katharana nathumli mahor nammihaira. ¹⁴Awui tekhamatei masot mi khavai, ithumna shimlui khuiranglakha eina tangda ana ithumwui shimluiwui machutkakhui kahaina.

Theikhavai Mik samphangrawui vang Seihā Sāmi

¹⁵Chiwui vang eina, Proho Jishuli nathumwui shitkasang kala katharabing saikorali nathumwui leikashi chi ina shālaga, ¹⁶Nathumwui vang Vareli ningshi mi chi ina mangasāmhaila, iwui seihā kasāli nathumli phaningungchinga, ¹⁷chithākha ithumwui Proho Jishu Khristawui Avā, tekhamateiwui Avāna, nathumna ithumwui Avāli kayākha mataida theikhui khavai, nathumli thangkhamei kala phongmiwui Manglā miranu. ¹⁸Nathumwui wuklungwui mik kahor samphangngasakta, awui kahowui kachihān chi, kala ithumwui Avāwui mibingli awui tekhamatei shimluiwui kashāng chi nathumna theikhuiranu; ¹⁹kala awui yāng pangshapwui otsak athishurda, shitkasang ithumwuitungli awui pangshapwui hakkhamahā kachungkha chila theikhuiranu. ²⁰Chi ana Jishuli kathiwui eina ringshok ngasakta, kazingramli awui yāshong ali chipamda, Khristali ot sai. ²¹Hi thotli maningla, kha rāthang thotlila, khamunga saikora, sāshap, pangshap kala khamungsin saikorawuitungli, kala phokmi kahai aming saikorawuitungli ana mataimeikap eina lei. ²²Kala ithumwui Avāna ot saikora Khristawui pheizingli haimida, ali saikorawuitungli akhavā sāda churchli mihaira. ²³Chiya awui phasāna, saikora saikorali chipem akhawui khangachāna.