2ይ ዜና 27 FHB Father's Heart Bible™

27 ¹ኢዮኣታም ምስ ነገሰ ወዲ ዕስራን ሓሙሽተን ዓመት ነበረ፤ ኣብ ኢየሩሳሌም ድማ ዓሰርተ ሽዱሽተ ዓመት ነገሰ። እኖኡ ኸዓ የሩሳ ጓል ሳዶቅ ነበረት። ²ከምቲ ኣቦኡ ዖዝያን ዝገበሮ፥ ኣብ ቅድሚ ኣቦና ቅኑዕ ገበረ፤ ግና ናብ ቤተ መቕደስ ኣቦና ኣይኣተወን። እቶም ህዝቢ ግና ገና ዓመፅ ይገብሩ ነበሩ። ³ነቲ ላዕለዋይ በሪ ቤት ኣቦና ሰርሐ፥ ኣብ ቅፅሪ ዖፌል ድማ ብዙሕ ሰርሐ። ^a a v3 ዖፌል፥ ልክዕ ብደቡብ እቲ ደብረ መቕደስ ዝርከብ እተዓርደ ጎቦ ኮይኑ፥ ካብ ውሽጣዊ ቕፅሪ ኸተማ ኢየሩሳሌም ሓደ ኽፋል ዝነበረ እዩ። ⁴ኣብ ደጕዓ ይሁዳ ኸተማታት ሰርሐ፥ ኣብ ዱር ድማ ዕርድታትን ግምቢታትን ሰርሐ። ⁵ምስ ንጉስ ደቂ ኣሞን ተዋግአ፥ ሰዓሮም ድማ። በታ ዓመት እቲኣ ኸዓ ደቂ ኣሞን ሸውዓተ ሽሕን ሓሙሽተ ሚእትን ፓውንድ ብሩርን ሓምሳ ሽሕ ኲንታል ስርናይን ሓምሳ ሽሕ ኲንታል ስገምን ሃብዎ፤ ከምኡ ድማ በቲ ኻልኣይን ሳልሳይን ዓመት ሃብዎ። ⁶ኢዮኣታም ድማ ኣብ ቅድሚ ኣቦኡ መንገዱ ቅኑዕ ገይሩ ስለ ዝሓለወ፥ በርትዐ። ⁷እቲ ዝተረፈ ናይ ኢዮኣታም ነገርን፥ ኵሉ ውግኣቱን ግብርታቱን፥ ኣብ መፅሓፍ ነገስታት እስራኤልን ይሁዳን ተፅሒፉ ኣሎ። ⁸ምስ ነገሰ ወዲ ዕስራን ሓሙሽተን ዓመት ነበረ፤ ኣብ ኢየሩሳሌም ድማ ዓሰርተ ሽዱሽተ ዓመት ነገሰ። ⁹ኢዮኣታም ምስ ኣቦታቱ ደቀሰ፤ ኣብ ከተማ ዳዊት ድማ ቀበርዎ፤ ክንድኡ ኸዓ ወዱ ኣካዝ ነገሰ።