1 Thotrinchān 9

9 ¹Israel saikora mithotwui lairikli kapihaida, Israelwui Awungabingwui Lairikli kapiserhai. Kala athumwui mashitkasangwui vang Judahli Babylonli tukvāhaowa. ²Kachichāwui keinungli athumwui shimluili khare pamluishit kahaibing china Israelnaobing, pāngmonbing, Levinaobing, kala Khorumshimli otram khangatha̱bingna. ³Kala Jerusalemli Judahwui naomayarabing kaikha, Benjaminwui naomayarabing kaikha, kala Ephraim eina Manassehwui naomayarabing kaikha pama: ⁴Judahwui nao Perezwui naomayarabingwui eina, Baniwui eina pharā khamaron Imriwui nao, Omriwui nao, Ammihudwui naomayara Uthai. ⁵Kala Shilohpashi: naochizai Asaiah eina awui naomayarabing. ⁶Zerahwui naomayarabing: Jeuel eina athumwui achināngarā, shātharuk hangchiko. ⁷Kala Benjaminwui naomayarabing: Hassenuahwui eina pharā khamaron Hodaviahwui nao, Meshullamwui naomayara Salluna. ⁸Jerohamwui naomayara Ibneiah; Michriwui nao Uzziwui naomayara Elah; Ibnijahwui eina pharā khamaron Reuelwui nao, Shephatiahwui naomayara Meshullam, ⁹kala athumwui achināngarā, athumwui mithotwui lairikli kapi kahai athishurda, shāchiko hangphangāda tharuk. Athum saikora hi athumwui avāva̱ ngarā shimkhurwui wungva̱bingna.

¹⁰Kala pāngmonbingwui eina: Jedaiah, Jehoiarib, Jachin, ¹¹kala Ahitubwui eina pharā khamaron Meraiothwui nao, Zadokwui nao, Meshullamwui nao, Hilkiahwui naomayara Azariahna, ithumwui Avāwui shimli khamungana. ¹²Malchijahwui eina pharā khamaron Pashhurwui nao, Jerohamwui naomayara Adaiah; kala Immerwui eina pharā khamaron Meshillemithwui nao, Meshullamwui nao, Jahzerahwui nao, Adi-elwui naomayara Maasai; ¹³kala athumwui achināngarā, avāva̱ ngarā shimkhurwui wungva̱bing, thingkha shātharuk hangtharuk, ithumwui Avāwui shimli otram ngatha̱mi khavai kashapa mibingna.

¹⁴Kala Levinaobingwui eina: Merariwui naomayarabingwui, Hashabiahwui eina pharā khamaron Azrikamwui nao, Hasshubwui naomayara Shemaiahna, ¹⁵kala Bakbakkar, Heresh, Galal, kala Asaphwui eina pharā khamaron Zichriwui nao, Micawui naomayara Mattaniah; ¹⁶kala Jeduthunwui eina pharā khamaron Galalwui nao, Shemaiahwui naomayara Obadiah, kala Netophathpashiwui kha̱ kha̱li kapam, Elkanahwui eina pharā khamaron Asawui naomayara Berechiahna.

¹⁷Ngavei khamayonbing: Shallum, Akkub, Talmon, Ahiman, eina athumwui achināngarā; Shallumna wungva̱na. ¹⁸Aja eina tangda athum zingshoshong khalei awungawui ngaveili nganingda lei. Hibing hi Levinaobingwui rāmrahwui ngavei khamayonbingna. ¹⁹Korewui naomayara Shallum, chi Ebiasaphwui, chi Corahwui, kala awui avāva̱ shimwui achinābing, Corahshina, otram ngatha̱ khavai ot chi singa, kala kachonshimwui khum mayona; athumwui avāva̱ngarāna ithumwui Avāwui rāmrahli yangda zangkhavaili mayona. ²⁰Eleazarwui naomayara Phinehasna khareli athumwuitungli kathāna sai; ithumwui Avāna ali ngasomisai. ²¹Meshelemiahwui naomayara Zechariahna kazip khavai kachonshim khāmongpheili ngavei khamayona sai. ²²Ngaveiwui ngavei khamayona khavai kapang kahai athum saikora shākhani tharāda khanina; athumwui kha̱bingli mithot lairikwui athishurda aming chana. David eina marān Samuelna athumli hi ning tharlak otpamli haivāsera. ²³Athum eina athumwui naomayarabingna khamayona thāda ithumwui Avāwui shim, kachonshimwui shimwui ngaveibing mayona. ²⁴Ngavei khamayonbing chi shong matili haivāsera: zingsho, zingtun, atung, kala azing. ²⁵Athumwui kha̱bingli khalei athumwui achinābingna atam chāda zimiksho shini kachida athum ngasoda leikhavai rāra. ²⁶Ngavei khamayon kharei mati, Levinaobing, ithumwui Avāwui shimwui kā eina kazipshimbingli misang kahaibingna. ²⁷Athumna ithumwui Avāwui shimwui kuimareida ngayā ungpama, kaja khamayonwui ot chi athumwuina, kala ngavei shokhavai ot ngathor kachida athumwuina.

²⁸Kaikhava otram ngatha̱ khavai khorkhongbing yangda, chi azang ashok chungmi. ²⁹Khangateibing china thongthāng, kathara khorkhongbing, manaktak kahai mathir, drakhāra̱, thao, nganamkaphā, kala thaoyur yangmi. ³⁰Kala pāngmonbingwui naomayara kaikhana thao ayur-ayā manātmi. ³¹Levinaobingwui akha, Corahwui Shallumwui naochizai Mattithiahna khamui sākhui khavaili yangmi. ³²Kohathshi achinābing kaikhava sabbath kachida ngaher khamui khangarān khavaili yangmi. ^a a v32 Ngaherwui khamui: kathara khamuitang tharāda khani katharapamwui sākakhui tabletungli ngaher khani eina haida, kala sabbath kachida katei eina khuithuihaora.

³³Hibing laa kasābing, Levinaobingwui avāva̱ ngarā shimkhurwui wungva̱bing, khorumshimwui kāli pama, khangatei otbing eina ningkhān ngasaka; kaja athum ngashun ngayā otli leisai. ³⁴Hibing hi Leviwui avāva̱ ngarā shimkhurwui wungva̱bing, mithot lairikwui athishurda aming chan kathānabingna; kala athum Jerusalemli pamsai.

Saulwui shimkhur: Gibeonshong latunga

³⁵Gibeonli Gibeonshāvā Je-iel pānsai, kala apreiva̱wui ming Maacah hoi, ³⁶Abdon chi awui naochizaina, kala chiwui thili Zur, Kish, Baal, Ner, Nadab, ³⁷Gedor, Ahio, Zechariah, kala Mikloth. ³⁸Miklothna Shime-amwui avāva̱na; athumla Jerusalemli athei-asābingli kāroda athei-asābingli ngasoda pānsai. ³⁹Nerna Kishwui avāva̱na; kala Kishna Saulwui avāva̱na; kala Saulna Jonathan, Malchishua, Abinadab kala Eshbaal longwui avāva̱na. ⁴⁰Jonathanwui naomayara chi Merib-baalna, kala Merib-baalna Micahwui avāva̱na. ⁴¹Micahwui naomayarabing: Pithon, Melech, Tahrea kala Ahaz. ⁴²Ahazna Jarahwui avāva̱na; kala Jarahna Alemeth, Azmaveth, kala Zimriwui avāva̱na; kala Zimrina Mozawui avāva̱na. ⁴³Mozana Bine-awui avāva̱na; kala Rephaiah chi awui naona, Ele-asah awui naona, kala Azel awui naona. ⁴⁴Azelwui naomayara tharuk leisai, athumwui mingbing chi: Azrikam, Bocheru, Ishmael, She-ariah, Obadiah eina Hanan. Hibing hi Azelwui naomayarabingna.