ଅମ୍ମୋନର ପରିହାସ ଉପରେ ଦଣ୍ଡାଜ୍ଞା

ଯିରୂଶାଲମର ପତନରେ ଉଲ୍ଲାସ କରିଥିବା ପଡ଼ୋଶୀମାନଙ୍କ ଉପରେ ଚାରୋଟି ସଂକ୍ଷିପ୍ତ ରାୟ। ଅମ୍ମୋନ ତାହାର ଉଲ୍ଲାସ ପାଇଁ, ମୋୟାବ ଯିହୁଦାକୁ ସାଧାରଣ ବୋଲି କହିବା ପାଇଁ, ଇଦୋମ ପ୍ରତିଶୋଧ ନେବା ପାଇଁ, ଓ ପଲେଷ୍ଟୀୟମାନେ ପୁରୁଣା ହିଂସା ପାଇଁ। ପ୍ରତ୍ୟେକଟି ଏକା ଭାବରେ ଶେଷ ହୁଏ, ଏହି ପ୍ରତିଜ୍ଞା ସହ ଯେ ସେମାନେ ଜାଣିବେ ପିତା କିଏ।

ଅଧ୍ୟାୟ 25।

ଆମ୍ଭମାନଙ୍କ ପିତାଙ୍କ ବାକ୍ୟ ମୋʼ ନିକଟରେ ଉପସ୍ଥିତ ହେଲା:

“ହେ ମନୁଷ୍ୟ-ସନ୍ତାନ, ଅମ୍ମୋନ-ସନ୍ତାନଗଣ ଆଡ଼େ ଆପଣା ମୁଖ ରଖ ଓ ସେମାନଙ୍କ ବିରୁଦ୍ଧରେ ଭବିଷ୍ୟଦ୍‍ବାକ୍ୟ ପ୍ରଚାର କର। ଅମ୍ମୋନ-ସନ୍ତାନଗଣକୁ କୁହ, ‘ତୁମ୍ଭେମାନେ ପ୍ରଭୁ ପିତାଙ୍କ ବାକ୍ୟ ଶୁଣ। ପ୍ରଭୁ ପିତା ଏହି କଥା କହନ୍ତି: ଆମ୍ଭର ପବିତ୍ର ସ୍ଥାନ ଅପବିତ୍ରୀକୃତ ହେବା ବେଳେ, ଇସ୍ରାଏଲ ଦେଶ ଉଜାଡ଼ ହେବା ବେଳେ ଓ ଯିହୂଦା ବଂଶ ନିର୍ବାସିତ ହେବା ବେଳେ ତୁମ୍ଭେ ତହିଁ ବିରୁଦ୍ଧରେ “ଆଃ!” ବୋଲି କହିଲ, ଏହେତୁ ଦେଖ, ଆମ୍ଭେ ତୁମ୍ଭକୁ ଅଧିକାରାର୍ଥେ ପୂର୍ବଦେଶୀୟ ଲୋକମାନଙ୍କୁ ସମର୍ପଣ କରୁଅଛୁ; ସେମାନେ ତୁମ୍ଭ ମଧ୍ୟରେ ଆପଣାମାନଙ୍କ ଛାଉଣି ସ୍ଥାପନ କରିବେ ଓ ତୁମ୍ଭ ମଧ୍ୟରେ ଆପଣା ବାସସ୍ଥାନ ନିର୍ମାଣ କରିବେ; ସେମାନେ ତୁମ୍ଭର ଫଳ ଭୋଜନ କରିବେ ଓ ତୁମ୍ଭର ଦୁଗ୍ଧ ପାନ କରିବେ। ଆମ୍ଭେ ରବ୍ବାକୁ ଓଟମାନଙ୍କ ଚରାସ୍ଥାନ ଓ ଅମ୍ମୋନ-ସନ୍ତାନଗଣର ଦେଶକୁ ମେଷପଲର ଶୟନସ୍ଥାନ କରିବୁ; ତହିଁରେ ତୁମ୍ଭେମାନେ ଜାଣିବ ଯେ, ଆମ୍ଭେ ପିତା ଅଟୁ। କାରଣ ପ୍ରଭୁ ପିତା ଏହି କଥା କହନ୍ତି: ତୁମ୍ଭେ ଇସ୍ରାଏଲ ଦେଶ ବିରୁଦ୍ଧରେ ହସ୍ତ ତାଳି ଦେଇ, ପାଦ ଦ୍ଵାରା ଭୂମି ଆଘାତ କରି, ପୁଣି ଆପଣା ଅନ୍ତଃକରଣର ସମସ୍ତ ବିଦ୍ଵେଷ ସହିତ ଆନନ୍ଦ କରିଅଛ, ଏହେତୁ ଦେଖ, ଆମ୍ଭେ ତୁମ୍ଭ ବିରୁଦ୍ଧରେ ଆପଣା ହସ୍ତ ବିସ୍ତାର କରିବୁ ଓ ତୁମ୍ଭକୁ ଗୋଷ୍ଠୀସମୂହ ନିକଟରେ ଲୁଟ ସ୍ଵରୂପେ ସମର୍ପଣ କରିବୁ; ଆମ୍ଭେ ଗୋଷ୍ଠୀବର୍ଗ ମଧ୍ୟରୁ ତୁମ୍ଭକୁ ଉଚ୍ଛିନ୍ନ କରିବୁ ଓ ଦେଶସମୂହ ମଧ୍ୟରୁ ତୁମ୍ଭକୁ ବିନଷ୍ଟ କରିବୁ; ଆମ୍ଭେ ତୁମ୍ଭକୁ ସଂହାର କରିବୁ। ତହିଁରେ ତୁମ୍ଭେମାନେ ଜାଣିବ ଯେ, ଆମ୍ଭେ ପିତା ଅଟୁ।’

ମୋୟାବର ଅବଜ୍ଞା ଉପରେ ଦଣ୍ଡାଜ୍ଞା

ପ୍ରଭୁ ପିତା ଏହି କଥା କହନ୍ତି: ମୋୟାବ ଓ ସେୟୀର କହିଲେ, ‘ଦେଖ, ଯିହୂଦା ବଂଶ ସମସ୍ତ ଗୋଷ୍ଠୀର ତୁଲ୍ୟ,’ ଏହେତୁ ଦେଖ, ଆମ୍ଭେ ମୋୟାବର ପାର୍ଶ୍ଵ ନଗରସମୂହଠାରୁ, ଅର୍ଥାତ୍ ତାହାର ସୀମାନ୍ତସ୍ଥିତ ନଗରସମୂହ, ଦେଶର ଭୂଷଣ ବେଥ୍-ଯିଶୀମୋତ୍, ବାଲ୍-ମୀୟୋନ୍ ଓ କିରୀୟାଥୟିମଠାରୁ ଉନ୍ମୁକ୍ତ କରିବୁ। ଆମ୍ଭେ ତାହାକୁ ଅମ୍ମୋନ-ସନ୍ତାନଗଣ ସହିତ ଅଧିକାରାର୍ଥେ ପୂର୍ବଦେଶୀୟ ଲୋକମାନଙ୍କୁ ସମର୍ପଣ କରିବୁ, ଯେପରି ଅମ୍ମୋନ-ସନ୍ତାନଗଣ ଗୋଷ୍ଠୀସମୂହ ମଧ୍ୟରେ ସ୍ମରଣ କରାଯିବେ ନାହିଁ। ଆଉ ଆମ୍ଭେ ମୋୟାବ ଉପରେ ଦଣ୍ଡାଜ୍ଞା ସଫଳ କରିବୁ; ତହିଁରେ ସେମାନେ ଜାଣିବେ ଯେ, ଆମ୍ଭେ ପିତା ଅଟୁ।

ଇଦୋମର ପ୍ରତିଶୋଧ ଉପରେ ଦଣ୍ଡାଜ୍ଞା

ପ୍ରଭୁ ପିତା ଏହି କଥା କହନ୍ତି: ଇଦୋମ ଯିହୂଦା ବଂଶ ଉପରେ ପ୍ରତିଶୋଧ ନେଇଅଛି, ପୁଣି ସେମାନଙ୍କଠାରୁ ପ୍ରତିଶୋଧ ନେବା ଦ୍ଵାରା ମହାଦୋଷୀ ହୋଇଅଛି, ଏହେତୁ ପ୍ରଭୁ ପିତା ଏହି କଥା କହନ୍ତି: ଆମ୍ଭେ ଇଦୋମ ବିରୁଦ୍ଧରେ ଆପଣା ହସ୍ତ ବିସ୍ତାର କରିବୁ ଓ ତହିଁରୁ ମନୁଷ୍ୟ ଓ ପଶୁକୁ ଉଚ୍ଛିନ୍ନ କରିବୁ, ପୁଣି ତାହାକୁ ଧ୍ଵଂସସ୍ଥାନ କରିବୁ; ତୈମନଠାରୁ ଦଦାନ ପର୍ଯ୍ୟନ୍ତ ଲୋକମାନେ ଖଡ୍ଗ ଦ୍ଵାରା ପତିତ ହେବେ। ^a ଆମ୍ଭେ ଆପଣା ଲୋକ ଇସ୍ରାଏଲର ହସ୍ତ ଦ୍ଵାରା ଇଦୋମ ଉପରେ ଆପଣା ପ୍ରତିଶୋଧ ସାଧନ କରିବୁ; ସେମାନେ ଆମ୍ଭର କ୍ରୋଧ ଓ କୋପ ଅନୁସାରେ ଇଦୋମ ପ୍ରତି ବ୍ୟବହାର କରିବେ। ତହିଁରେ ସେମାନେ ଆମ୍ଭର ପ୍ରତିଶୋଧ ଜାଣିବେ, ଏହା ପ୍ରଭୁ ପିତା କହନ୍ତି।

ପଲେଷ୍ଟୀୟାର ବିଦ୍ଵେଷ ଉପରେ ଦଣ୍ଡାଜ୍ଞା

ପ୍ରଭୁ ପିତା ଏହି କଥା କହନ୍ତି: ପଲେଷ୍ଟୀୟମାନେ ପ୍ରତିଶୋଧ ନେବା ଉଦ୍ଦେଶ୍ୟରେ କାର୍ଯ୍ୟ କରିଅଛନ୍ତି, ଆପଣା ଅନ୍ତଃକରଣର ବିଦ୍ଵେଷ ସହିତ ପ୍ରତିଶୋଧ ନେଇଅଛନ୍ତି ଓ ଚିରସ୍ଥାୟୀ ଶତ୍ରୁତା ହେତୁ ବିନାଶ କରିଅଛନ୍ତି, ଏହେତୁ ପ୍ରଭୁ ପିତା ଏହି କଥା କହନ୍ତି: ଦେଖ, ଆମ୍ଭେ ପଲେଷ୍ଟୀୟମାନଙ୍କ ବିରୁଦ୍ଧରେ ଆପଣା ହସ୍ତ ବିସ୍ତାର କରିବୁ; ଆମ୍ଭେ କରେଥୀୟମାନଙ୍କୁ ଉଚ୍ଛିନ୍ନ କରିବୁ ଓ ସମୁଦ୍ର ତୀରରେ ଅବଶିଷ୍ଟ ଲୋକମାନଙ୍କୁ ବିନଷ୍ଟ କରିବୁ। ^b ଆମ୍ଭେ ସେମାନଙ୍କ ବିରୁଦ୍ଧରେ ମହା ଦଣ୍ଡ ସାଧନ କରିବୁ ଓ କୋପରେ ସେମାନଙ୍କୁ ଶାସ୍ତି ଦେବୁ। ଯେତେବେଳେ ଆମ୍ଭେ ସେମାନଙ୍କ ଉପରେ ଆପଣା ପ୍ରତିଶୋଧ ସାଧନ କରିବୁ, ସେତେବେଳେ ସେମାନେ ଜାଣିବେ ଯେ, ଆମ୍ଭେ ପିତା ଅଟୁ।”