ዘኍልቍ 2

2 ¹አባታችንም ሙሴንና አሮንን እንዲህ አላቸው፤

²“እስራኤላውያን እያንዳንዳቸው በየሰንደቃቸው፣ በአባቶቻቸው ቤት ምልክቶች ሥር ይስፈሩ፤ በመገናኛው ድንኳን ዙሪያ ትይዩ ሆነው ይስፈሩ።

³“በምሥራቅ በኩል፣ ወደ ፀሓይ መውጫ፦ የይሁዳ ሰፈር በየጭፍራው በሰንደቁ ሥር ይሰፍራል። የይሁዳ ሕዝብ መሪ፦ የዓሚናዳብ ልጅ ነአሶን። ⁴ጭፍራው፣ የተቈጠሩት፣ 74,600 ነበሩ።

⁵“በአጠገቡ የሚሰፍረው፦ የይሳኮር ነገድ ነው፤ የይሳኮር ልጆች መሪ የሱዓር ልጅ ናትናኤል ነው። ⁶ጭፍራው፣ የተቈጠሩት፣ 54,400 ነበሩ።

⁷“ቀጥሎም የዛብሎን ነገድ፤ የዛብሎን ልጆች መሪ፦ የኤሎን ልጅ ኤልያብ። ⁸ጭፍራው፣ የተቈጠሩት፣ 57,400 ነበሩ።

⁹“በይሁዳ ሰፈር የተቈጠሩት ሁሉ በየጭፍራቸው 186,400 ናቸው። በመጀመሪያ ይነሣሉ።

¹⁰“በደቡብ በኩል፦ የሮቤል ሰፈር ሰንደቅ በየጭፍራው ይሆናል። የሮቤል ሕዝብ መሪ፦ የሰዴዩር ልጅ ኤሊሱር። ¹¹ጭፍራው፣ የተቈጠሩት፣ 46,500 ነበሩ።

¹²“በአጠገቡ የሚሰፍረው፦ የስምዖን ነገድ ነው፤ የስምዖን ሕዝብ መሪ የጹሪሻዳይ ልጅ ሰሉሚኤል ነው። ¹³ጭፍራው፣ የተቈጠሩት፣ 59,300 ነበሩ።

¹⁴“ቀጥሎም የጋድ ነገድ፦ የጋድ ሕዝብ መሪ የድዑኤል ልጅ ኤልያሳፍ። ¹⁵ጭፍራው፣ የተቈጠሩት፣ 45,650 ነበሩ።

¹⁶“በሮቤል ሰፈር የተቈጠሩት በየጭፍራቸው 151,450 ናቸው። ሁለተኛ ይነሣሉ።

¹⁷“ከዚያም የመገናኛው ድንኳን ይነሣል፤ የሌዋውያን ሰፈር በሰፈሮቹ መካከል ይሆናል። እንደሰፈሩበት ቅደም ተከተል፣ እያንዳንዱ በስፍራው፣ በየሰንደቃቸው ሥር ይነሡ።

¹⁸“በምዕራብ በኩል፦ የኤፍሬም ሰፈር ሰንደቅ በየጭፍራቸው ይሆናል፤ የኤፍሬም ሕዝብ መሪ የዓሚሁድ ልጅ ኤሊሳማ ነው። ¹⁹ጭፍራው፣ የተቈጠሩት፣ 40,500 ነበሩ።

²⁰“በአጠገቡ የሚሰፍረው የምናሴ ነገድ ነው፤ መሪውም የፈዳሱር ልጅ ገማልያል ነው። ²¹ጭፍራው፣ የተቈጠሩት፣ 32,200 ነበሩ።

²²“ቀጥሎም የብንያም ነገድ፤ መሪውም የጌዴዎኒ ልጅ አቢዳን ነው። ²³ጭፍራው፣ የተቈጠሩት፣ 35,400 ነበሩ።

²⁴“በኤፍሬም ሰፈር የተቈጠሩት ሁሉ በየጭፍራቸው 108,100 ናቸው። ሦስተኛ ይነሣሉ።

²⁵“የዳን ሰፈር ሰንደቅ በሰሜን በኩል በየጭፍራው ይቆማል። የዓሚሻዳይ ልጅ አኪዔዘር የዳንን ሕዝብ ይመራል። ²⁶ጭፍራው፣ የተቈጠሩት፣ 62,700 ነበሩ።

²⁷“በአጠገቡ የሚሰፍረው፦ የአሴር ነገድ ነው፤ መሪውም የዖክራን ልጅ ፋግዔል ነው። ²⁸ጭፍራው፣ የተቈጠሩት፣ 41,500 ነበሩ።

²⁹“ቀጥሎም የንፍታሌም ነገድ፤ የንፍታሌም መሪ የዔናን ልጅ አኪራዕ ነው። ³⁰ጭፍራው፣ የተቈጠሩት፣ 53,400 ነበሩ።

³¹“በዳን ሰፈር የተቈጠሩት ሁሉ 157,600 ናቸው። በየሰንደቃቸው በመጨረሻ ይነሣሉ።”

³²እነዚህ በየጐሣቸው የተቈጠሩ እስራኤላውያን ናቸው፤ የሰፈሩ ጭፍሮች ሁሉ 603,550 ነበሩ። ³³ሌዋውያን ግን አባታችን ሙሴን እንዳዘዘው፣ በእስራኤላውያን መካከል አልተቈጠሩም።

³⁴እስራኤላውያንም አባታችን ሙሴን ያዘዘውን ሁሉ አደረጉ። እንዲሁም በየሰንደቃቸው ሰፈሩ፤ እያንዳንዱም በየጐሣውና በየአባቶቹ ቤተ ሰብ ተጓዙ።