Zaburi 57

57 ¹ Unifadhili, Baba yangu, unifadhili, kwa maana nafsi yangu inakukimbilia wewe; katika uvuli wa mbawa zako nitakimbilia hata dhoruba ziharibuzo zipite. ² Namlilia Baba yangu, Aliye juu, Baba yetu anitimiziaye makusudi yake kwangu.

³ Atatuma toka mbinguni na kuniokoa; humkemea yule anikanyagaye mimi. Sela. Baba yangu atatuma upendo wake wa agano na uaminifu wake. ⁴ Nafsi yangu i katikati ya simba; nalala kati ya wale wapumuao moto — watu ambao meno yao ni mikuki na mishale, ndimi zao ni panga kali. ⁵ Utukuzwe, Baba yangu, juu ya mbingu! Utukufu wako uwe juu ya nchi yote!

⁶ Walitega wavu kwa hatua zangu; nafsi yangu ikainama. Walichimba shimo mbele yangu, lakini wao wenyewe wametumbukia ndani yake. Sela. ⁷ Moyo wangu ni thabiti, Baba yangu, moyo wangu ni thabiti! Nitaimba na kupiga mziki. ⁸ Amka, utukufu wangu! Amka, kinubi na zeze! Nitaiamsha alfajiri. ⁹ Nitakusifu kati ya watu, Ee Baba mwenye enzi; nitakuimbia kati ya mataifa. ¹⁰ Kwa maana upendo wako wa agano wafika mbinguni, uaminifu wako hata mawinguni. ¹¹ Utukuzwe, Baba yangu, juu ya mbingu! Utukufu wako uwe juu ya nchi yote!