Kuvumbuka na kati ya luzingu ya Tata
Sambu bawu vumbukaka kintwadi na Klisto, luzingu ya bawu ya kibeni kele ya kubumbama ti yandi na kati ya Tata ya beto. Na yina, bawu ke katula makasi, luvunu mpe nsatu ya kulaba, mpe ke lwata mawa, mvibudulu mpe kulemvokila bonso bantu yina Tata ya beto soolaka mpe zolaka. Zola yina ke soba banzo mpe bisalu ya bawu.
3 1Na yina, sambu beno vumbukaka kintwadi na Klisto, beno sosa bima yina kele na zulu, kisika Klisto kele ya kuvwanda na lubakala ya Tata ya beto. 2Beno tula mabanza ya beno na bima ya zulu, kasi ve na bima ya ntoto. 3Samu ti beno me fwa, mpe luzingu ya beno kele ya kubumbama kintwadi na Klisto na kati ya Tata ya beto. 4Ntangu Klisto, yina kele luzingu ya beno, ke monikina, na ntangu yina beno mpe ke monikina kintwadi na yandi na nkembo.
5Na yina, beno fwa bima yina kele ya ntoto na kati ya beno: kindumba, busafu, nsatu ya nitu, nsatu ya yimbi, mpe nsatu ya kulaba—yina kele kusambila biteki. 6Samu na mambu yayi, nkele ya Tata ya beto ke kwiza na zulu ya bayina ke tumamaka yandi ve. 7Beno mpe, na ntama beno vwandaka zinga mutindu yayi—yawu vwandaka luzingu ya beno. 8Kasi ntangu yayi, beno katula mambu yayi nyonso: makasi, nkele, myangu, kutonga bampangi, mpe bampova ya nsoni yina ke basikaka na munwa ya beno. 9Beno vuna ve bampangi ya beno, samu ti beno me katula muntu ya ntama ya beno kintwadi na bifu ya yandi, 10mpe beno me lwata muntu ya mpa, yina ba ke kumisa ya mpa na luzabu, na mutindu ya kifwani ya Kiyidiki ya yandi. 11Awa, mu-Ngeleki kele ve to mu-Zwife, muntu yina ba zengaka bubakala to yina ba zengaka bubakala ve, mu-nzenza, mu-Sikite, mundongo to muntu ya kimpwanza—kasi Klisto kele bima nyonso, mpe kele na kati ya bantu nyonso.
12Na yina, samu beno kele bantu yina Tata ya beto soolaka, bantu ya longo mpe ya kuzolama mingi, beno lwata kyadi ya ntima, kindisa, kudikulumusa, mawete, mpe mvibudulu. 13Beno kanga ntima na bampangi ya beno, mpe beno lemvokila bampangi ya beno konso kima ya kingungu yina beno kele na yawu na kati ya beno. Beno lemvokila mutindu Mfumu lemvokilaka beno. 14Mpe na zulu ya mambu yayi nyonso, beno lwata luzolo, yina ke kangisaka yawu nyonso kintwadi na bumosi ya kulunga. 15Bika ti ngemba ya Klisto kuyala bantima ya beno—ba bokilaka beno na yawu bonso nitu mosi. Beno vutula matondo. 16Bika ti mambu ya Klisto kuzinga mingi na kati ya beno, beno longisa mpe beno sungika bampangi ya beno na ndwenga nyonso, beno yimbila mikunga, bankunga ya lukumu, mpe bankunga yina ke katukaka na Mpeve, na matondo na bantima ya beno samu na Tata ya beto. 17Konso kima yina beno ke sala, na mambu to na mavanga, beno sala yawu nyonso na nkumbu ya Mfumu Yesu, mpe beno pesa matondo na Tata ya beto na nzila ya yandi.
Mabuta ya kuyidikama na luzolo
18Beno bakento, beno vwanda ya kutumama na babakala ya beno, mutindu yina me fwana na Mfumu.
19Beno babakala, beno zola bakento ya beno, mpe beno vwanda na ntima ya ngolo ve na bawu.
20Beno bana, beno tumama na bibuti ya beno na mambu nyonso, samu ti yawu ke yangidikaka Mfumu.
21Beno batata, beno pesa makasi ve na bana ya beno, samu ti bawu kulemba ntima ve.
22Beno bandongo, beno tumama na bamfumu ya beno ya ntoto na mambu nyonso—kaka ve na ntangu bawu ke tala beno, samu na kusepedisa bantu, kasi na ntima ya kukuluka, mpe na boma ya Mfumu. 23Konso kima yina beno ke sala, beno sala yawu na ntima ya beno nyonso, mutindu beno ke sadila Mfumu, kasi ve bantu, 24samu ti beno zaba ti beno ke baka difwa bonso musendo yina ke katuka na Mfumu; beno ke sadila Mfumu Klisto. 25Konso muntu yina ke sala yimbi, ba ke futa yandi yimbi ya yandi, mpe kutala bizizi kele ve.