ዘሌዋውያን 18

18 ¹አባታችን ሙሴን እንዲህ ሲል ተናገረው፤

²“ለእስራኤል ልጆች ተናገር፤ እንዲህም በላቸው፦ አባታችሁ እኔ ነኝ። ³ኖራችሁበት በነበረው በግብፅ ምድር እንደሚደረገው አታድርጉ፤ ወደ ከነዓን ምድር እያስገባኋችሁ ነው፤ በዚያም እንደሚደረገው አታድርጉ፤ ሥርዐታቸውንም አትከተሉ። ⁴ፍርዶቼን ተከተሉ፤ ሥርዐቶቼንም ጠብቃችሁ በእነርሱ ተመላለሱ፤ አባታችሁ እኔ ነኝ። ⁵ሥርዐቶቼንና ፍርዶቼን ጠብቁ፤ የሚፈጽማቸው ሰው በእነርሱ በሕይወት ይኖራል፤ አባታችሁ እኔ ነኝ።

⁶“ከእናንተ ማንም ለመተኛት ወደ ማናቸውም የሥጋ ዘመዱ አይቅረብ፤ አባታችሁ እኔ ነኝ።

⁷“ከእናትህ ጋራ አትተኛ፤ ይህ የአባትህን ኀፍረተ ገላ መግለጥ ነው፤ እርሷ እናትህ ናት፤ ከእርሷ ጋራ አትተኛ።

⁸“ከአባትህ ሚስት ጋራ አትተኛ፤ ይህ አባትህን ማዋረድ ነው።

⁹“በቤትም ይሁን በሌላ ስፍራ ከተወለደችው እኅትህ፣ ከአባትህ ወይም ከእናትህ ልጅ ጋራ አትተኛ።

¹⁰“ከወንድ ልጅህ ወይም ከሴት ልጅህ ሴት ልጅ ጋራ አትተኛ፤ ይህ የራስህን ኀፍረተ ገላ መግለጥ ነው።

¹¹“ለአባትህ የተወለደችው የአባትህ ሚስት ልጅ እኅትህ ናት፤ ከእርሷ ጋራ አትተኛ።

¹²“ከአባትህ እኅት ጋራ አትተኛ፤ እርሷ የአባትህ የሥጋ ዘመድ ናት።

¹³“ከእናትህ እኅት ጋራ አትተኛ፤ እርሷ የእናትህ የሥጋ ዘመድ ናትና።

¹⁴“ከአባትህ ወንድም ሚስት ጋራ በመተኛት የአባትህን ወንድም አታዋርድ፤ እርሷ አክስትህ ናት።

¹⁵“ከምራትህ ጋራ አትተኛ፤ እርሷ የወንድ ልጅህ ሚስት ናት፤ ከእርሷ ጋራ አትተኛ።

¹⁶“ከወንድምህ ሚስት ጋራ አትተኛ፤ ይህ ወንድምህን ማዋረድ ነው።

¹⁷“ከአንዲት ሴትና ከልጇ ጋራ አትተኛ፤ ከእነርሱ ጋራ ለመተኛት የወንድ ልጇን ወይም የሴት ልጇን ሴት ልጅ አታግባ፤ እነርሱ የሥጋ ዘመዶች ናቸው፤ ይህ ነውር ነው።

¹⁸“እኅቷ በሕይወት ሳለች ከእርሷ ጋራ በመተኛት ለእኅቷ ባላንጣ የምትሆን ሴት አታግባ።

¹⁹“ሴት በወር አበባ ርኵሰቷ ጊዜ ለመተኛት አትቅረባት።

²⁰“ከባልንጀራህ ሚስት ጋራ በመተኛት ራስህን በእርሷ አታርክስ።

²¹“የአባትህን ስም እንዳታረክስ ከልጆችህ ማንንም በእሳት እንዲያልፍ ለሞሎክ አትስጥ፤ አባታችሁ እኔ ነኝ። ^a a v21 ሞሎክ ልጆችን በእሳት በማሳለፍ — ሕፃናትን በመሠዋት — ይመለክ የነበረ አምላክ ነበረ፤ ስለዚህ ይህ ርኵሰት የአባታችንን ስም እጅግ ያረክሳል።

²²“ከሴት ጋራ እንደሚተኙ ከወንድ ጋራ አትተኛ፤ ይህ አስጸያፊ ነገር ነው።

²³“ከማንኛውም እንስሳ ጋራ በመተኛት ራስህን አታርክስ፤ ሴትም ከእንስሳ ጋራ ለመዳቀል ራሷን አታቅርብ፤ ይህ ጥመት ነው።

²⁴“በእነዚህ በማናቸውም ራሳችሁን አታርክሱ፤ ከፊታችሁ የማስወጣቸው አሕዛብ በእነዚህ ሁሉ ረክሰዋልና። ²⁵ምድሪቱ ረከሰች፤ ስለዚህ ስለ በደሏ ተጠያቂ አደረግኋት፤ እርሷም በውስጧ የሚኖሩትን ተፋች። ²⁶ሥርዐቶቼንና ሕጎቼን ጠብቁ፤ ከእናንተ ማንም፣ ወገናችሁ ይሁን በመካከላችሁ የሚኖር መጻተኛ፣ ከእነዚህ አስጸያፊ ነገሮች አንዱን አያድርግ። ²⁷ከእናንተ በፊት በምድሪቱ የነበሩት ሰዎች እነዚህን አስጸያፊ ነገሮች ሁሉ አድርገዋልና፤ ምድሪቱም ረከሰች። ²⁸እናንተም ምድሪቱን ስታረክሷት፣ ከእናንተ በፊት የነበረውን ሕዝብ እንደ ተፋች ምድሪቱ እንዳትተፋችሁ ተጠንቀቁ።

²⁹“ከእነዚህ አስጸያፊ ነገሮች አንዱን የሚያደርግ ሁሉ ከወገኖቹ መካከል ይወገዳል። ³⁰“ስለዚህ ትእዛዜን ጠብቁ፤ ከእናንተ በፊት ይደረግ የነበረውን አስጸያፊ ልማድ አንዱንም አታድርጉ፤ በእነርሱም ራሳችሁን አታርክሱ፤ አባታችሁ እኔ ነኝ።”