Zaburi 124

124 ¹ Kama Baba yetu asingekuwa upande wetu—Israeli na aseme sasa— ² kama Baba yetu asingekuwa upande wetu watu walipoinuka kupigana nasi, ³ ndipo wangalitumeza tukiwa hai, hasira yao ilipowaka juu yetu; ⁴ ndipo maji yangalitufunika, kijito kingalipita juu yetu; ⁵ ndipo maji yenye ghadhabu yangalipita juu yetu.

⁶ Ahimidiwe Baba yetu, ambaye hakututoa tuwe mawindo ya meno yao! ⁷ Tumeokoka kama ndege kutoka mtego wa wawindaji; mtego umevunjika, nasi tumeokoka! ⁸ Msaada wetu u katika jina la Baba yetu, aliyeziumba mbingu na nchi.