జెకర్యా 4

4 ¹ అప్పుడు నాతో మాటలాడిన దూత తిరిగివచ్చి, నిద్రలోనుండి లేపబడినవానివలె నన్ను లేపెను. ² ఆయన నాతో, "నీకు ఏమి కనబడుచున్నది?" అని అడిగెను. అందుకు నేను, "నాకు కనబడుచున్నది — పూర్తిగా బంగారుతో చేయబడిన దీపస్తంభము ఒకటి, దానిపైన ఒక పాత్ర, దానిమీద దాని యేడు దీపములు, దానిపైనున్న ఒక్కొక్క దీపమునకు ఏడేసి నాళములు ఉన్నవి.

³ దానియొద్ద రెండు ఒలీవ చెట్లు ఉన్నవి, ఒకటి పాత్రకు కుడివైపునను, రెండవది దాని ఎడమవైపునను ఉన్నవి."

⁴ నేను నాతో మాటలాడిన దూతతో, "నా ప్రభువా, ఇవి ఏమిటి?" అని అడిగితిని.

⁵ నాతో మాటలాడిన దూత నాతో, "ఇవి ఏమిటో నీకు తెలియదా?" అనెను. అందుకు నేను, "తెలియదు, నా ప్రభువా" అంటిని.

⁶ అప్పుడు ఆయన నాతో ఇట్లనెను, "జెరుబ్బాబెలుకు మన తండ్రి యిచ్చు వాక్కు ఇదే: బలముచేతనైనను కాదు, శక్తిచేతనైనను కాదు, నా ఆత్మచేతనే అని పరలోక సైన్యముల తండ్రి సెలవిచ్చుచున్నాడు. ⁷ గొప్ప పర్వతమా, నీవెవడవు? జెరుబ్బాబెలు ఎదుట నీవు సమభూమిగా అగుదువు. 'దానికి కృప, కృప!' అను జయధ్వానముల మధ్య అతడు పైమూలరాతిని బయటికి తెచ్చును."

⁸ అప్పుడు మన తండ్రి వాక్కు నాకు ప్రత్యక్షమై యిట్లనెను, ⁹ "జెరుబ్బాబెలు చేతులు ఈ మందిరమునకు పునాది వేసినవి, అతని చేతులే దాని ముగించును. అప్పుడు పరలోక సైన్యముల తండ్రి నన్ను మీయొద్దకు పంపెనని మీరు తెలిసికొందురు. ¹⁰ అల్పమైన కార్యముల దినమును ఎవడు తృణీకరించెను? జెరుబ్బాబెలు చేతిలో మట్టపు గుండును చూచి వారు సంతోషించెదరు. ఈ యేడును సర్వభూమియందంతట సంచరించు మన తండ్రి కన్నులు."

¹¹ అప్పుడు నేను ఆయనతో, "దీపస్తంభమునకు కుడివైపునను దాని ఎడమవైపునను ఉన్న ఈ రెండు ఒలీవ చెట్లు ఏమిటి?" అని అడిగితిని. ¹² మరల రెండవసారి నేను ఆయనను, "బంగారు నూనెను కుమ్మరించు రెండు బంగారు గొట్టముల ప్రక్కనున్న ఈ రెండు ఒలీవ కొమ్మలు ఏమిటి?" అని అడిగితిని.

¹³ ఆయన నాతో, "ఇవి ఏమిటో నీకు తెలియదా?" అనెను. అందుకు నేను, "తెలియదు, నా ప్రభువా" అంటిని.

¹⁴ అప్పుడు ఆయన, "సమస్త భూమికి ప్రభువైనవాని యొద్ద నిలుచు ఇద్దరు అభిషిక్తులు వీరే" అనెను.