కీర్తనలు 42

42 ¹ జింక నీటి కాలువల కొరకు ఆశపడునట్లు, నా ప్రాణము నీ కొరకు ఆశపడుచున్నది, నా తండ్రీ.

² నా ప్రాణము నా తండ్రి కొరకు దప్పిగొనుచున్నది, సజీవుడైన తండ్రి కొరకు. నేనెప్పుడు వచ్చి ఆయన సన్నిధిని కనబడుదును? ³ నా కన్నీళ్లే నాకు ఆహారమాయెను రేయింబవళ్లు, వారు దినమెల్ల నాతో అనుచుండగా, "నీ దేవుడు ఎక్కడ?"

⁴ నా ప్రాణమును కుమ్మరించుచు నేను వీటిని జ్ఞాపకము చేసికొనుచున్నాను: నేను జనసమూహముతో కూడ వెళ్లి, ఆనందధ్వనులతోను స్తుతిగీతములతోను, పండుగ ఆచరించు గొప్ప సమూహముతో, మన తండ్రి మందిరమునకు వారిని ఊరేగింపుగా నడిపించుచుంటిని.

⁵ నా ప్రాణమా, నీవేల క్రుంగియున్నావు? నాలో నీవేల తొందరపడుచున్నావు? మన తండ్రియందు నిరీక్షణ ఉంచుము; నేను మరల స్తుతించెదను ఆయనను, నా రక్షణయు నా తండ్రియునైనవానిని.

⁶ నా తండ్రీ, నాలో నా ప్రాణము క్రుంగియున్నది; అందుచేత నేను నిన్ను జ్ఞాపకము చేసికొనుచున్నాను యొర్దాను హెర్మోను దేశమునుండి, మిసారు కొండనుండి.

⁷ అగాధము నీ జలపాతముల ఘోషకు అగాధమునకు మొఱ్ఱపెట్టుచున్నది; నీ అలలన్నియు నీ తరంగములన్నియు నామీదుగా పొర్లిపారెను. ⁸ పగటివేళ మన తండ్రి తన నిబంధనా కృపను ఆజ్ఞాపించుచున్నాడు, రాత్రివేళ ఆయన గీతము నాతో ఉండును, నా జీవపు తండ్రికి చేయు ప్రార్థనయై యుండును.

⁹ నా ఆశ్రయశిలయైన నా తండ్రితో నేనిట్లందును, "నీవు నన్నేల మరచితివి? శత్రువు యొక్క హింసనుబట్టి నేనేల దుఃఖించుచు తిరుగులాడుచున్నాను?" ¹⁰ నా ఎముకలలో ప్రాణాంతకమైన గాయమువలె, నా విరోధులు నన్ను నిందించుచున్నారు, వారు దినమెల్ల నాతో అనుచుండగా, "నీ దేవుడు ఎక్కడ?"

¹¹ నా ప్రాణమా, నీవేల క్రుంగియున్నావు? నాలో నీవేల తొందరపడుచున్నావు? మన తండ్రియందు నిరీక్షణ ఉంచుము; నేను మరల స్తుతించెదను ఆయనను, నా రక్షణయు నా తండ్రియునైనవానిని.