సామెతలు 10

10 ¹ సొలొమోను సామెతలు: జ్ఞానముగల కుమారుడు తన తండ్రికి ఆనందము కలుగజేయును, మూఢుడైన కుమారుడు తన తల్లికి దుఃఖము కలుగజేయును. ² చెడుతనము వలన సంపాదించిన ధనము ఏమియు ప్రయోజనము చేయదు, నీతి మరణమునుండి తప్పించును. ³ మన తండ్రి నీతిమంతులను ఆకలితో ఉండనియ్యడు, దుష్టుల ఆశను ఆయన అడ్డగించును. ⁴ సోమరి చేతులు దరిద్రతను కలుగజేయును, శ్రద్ధగల చేతులు సంపదను కలుగజేయును. ⁵ వేసవిలో కూర్చుకొనువాడు వివేకముగల కుమారుడు, కోతకాలములో నిద్రించువాడు అవమానము కలుగజేయు కుమారుడు. ⁶ నీతిమంతుల తలపై ఆశీర్వాదములు నిలిచియుండును, దుష్టుల నోరు బలాత్కారమును కప్పివేయును. ⁷ నీతిమంతుల జ్ఞాపకము ఆశీర్వాదకరము, దుష్టుల పేరు కుళ్లిపోవును. ⁸ జ్ఞానముగల హృదయము ఆజ్ఞలను అంగీకరించును, వాగుడుకాయ మూఢుడు నాశనమునొందును. ⁹ యథార్థతతో నడుచువాడు సురక్షితముగా నడుచును, తన మార్గములను వంకరగా చేసికొనువాడు బయటపడును. ¹⁰ కన్నుకొట్టువాడు కష్టమును కలుగజేయును, వాగుడుకాయ మూఢుడు నాశనమునొందును. ¹¹ నీతిమంతుల నోరు జీవపు ఊట, దుష్టుల నోరు బలాత్కారమును కప్పివేయును. ¹² పగ కలహమును రేపును, ప్రేమ అన్ని అపరాధములను కప్పివేయును. ¹³ వివేకముగలవారి పెదవులపై, జ్ఞానము కనుగొనబడును, బుద్ధిలేనివాని వీపుకు దండము తగియున్నది. ¹⁴ జ్ఞానులు తెలివిని కూర్చుకొందురు, మూఢుని నోరు నాశనమును ఆహ్వానించును. ¹⁵ ధనవంతుల సంపద వారికి కోటవంటి పట్టణము; బీదల నాశనము వారి దరిద్రతయే. ¹⁶ నీతిమంతుల జీతము జీవమునకు నడిపించును; దుష్టుల లాభము పాపమునకు నడిపించును. ¹⁷ శిక్షను అంగీకరించువాడు జీవమార్గములో ఉన్నాడు, గద్దింపును నిర్లక్ష్యము చేయువాడు ఇతరులను తప్పుమార్గములోనికి నడిపించును. ¹⁸ పగను కప్పివేయువాడు అబద్ధికుడు, అపనింద వ్యాపింపజేయువాడు మూఢుడు. ¹⁹ మాటలు విస్తారమైనచోట పాపము లోపింపదు; తన నాలుకను అణచుకొనువాడు జ్ఞానముగలవాడు. ²⁰ నీతిమంతుని నాలుక ఎన్నికైన వెండి; దుష్టుని హృదయము విలువలేనిది. ²¹ నీతిమంతుని పెదవులు అనేకులను పోషించును, మూఢులు బుద్ధిలేమిచేత మృతిపొందుదురు. ²² మన తండ్రి ఆశీర్వాదము సంపదను కలుగజేయును, దానితో ఆయన దుఃఖమును కలుపడు. ²³ చెడుతనము చేయుట మూఢునికి క్రీడ, జ్ఞానము వివేకముగల వానికి సంతోషము. ²⁴ దుష్టుడు భయపడునది అతని మీదికి వచ్చును, నీతిమంతుని కోరిక తీర్చబడును. ²⁵ తుఫాను గతించినప్పుడు దుష్టులు లేకుండ పోవుదురు, నీతిమంతులు నిత్యము స్థిరపరచబడియుందురు. ²⁶ పళ్ళకు చిరకవలె, కళ్ళకు పొగవలె, సోమరి తనను పంపువారికి అట్టివాడు. ²⁷ మన తండ్రి భయము జీవితమును పొడిగించును, దుష్టుల సంవత్సరములు తక్కువ చేయబడును. ²⁸ నీతిమంతుల నిరీక్షణ ఆనందము కలుగజేయును, దుష్టుల కోరిక నశించిపోవును. ²⁹ మన తండ్రి మార్గము నిర్దోషులకు ఆశ్రయము, చెడుతనము చేయువారికి నాశనము. ³⁰ నీతిమంతులు ఎన్నటికిని కదల్చబడరు, దుష్టులు ఆ దేశములో నిలిచియుండరు. ³¹ నీతిమంతుని నోరు జ్ఞానమును ఫలింపజేయును, వక్రమైన నాలుక కత్తిరించబడును. ³² నీతిమంతుని పెదవులు ఏది ప్రియమైనదో తెలిసికొనును, దుష్టుని నోరు కేవలము వక్రమైనదానినే తెలిసికొనును.