సంఖ్యాకాండము 9

9 ¹ వారు ఐగుప్తు దేశములోనుండి బయలుదేరి వచ్చిన తరువాత రెండవ సంవత్సరము మొదటి నెలలో, సీనాయి అరణ్యములో మన తండ్రి మోషేతో ఇట్లనెను,

² ఇశ్రాయేలు ప్రజలు నియమిత కాలమందు పస్కాను ఆచరింపవలెను. ³ ఈ నెల పదునాలుగవ దినమున, సంధ్యవేళ, నియమిత కాలమందు మీరు దాని ఆచరింపవలెను; దాని కట్టడలన్నిటిని విధులన్నిటిని మీరు అనుసరింపవలెను.

⁴ కావున ఇశ్రాయేలు ప్రజలు పస్కాను ఆచరింపవలెనని మోషే వారితో చెప్పెను. ⁵ మన తండ్రి మోషేకు ఆజ్ఞాపించినట్లే, వారు మొదటి నెల పదునాలుగవ దినమున, సంధ్యవేళ, సీనాయి అరణ్యములో పస్కాను ఆచరించిరి. ⁶ ఒక శవమును ముట్టుటవలన అపవిత్రులై ఆ దినమున పస్కాను ఆచరింపలేని కొందరు మనుష్యులుండిరి; వారు ఆ దినమున మోషే అహరోనుల యొద్దకు వచ్చిరి. ⁷ ఆ మనుష్యులు అతనితో ఇట్లనిరి, "మేము ఒక శవమును ముట్టుటవలన అపవిత్రులమైతిమి. ఇశ్రాయేలు ప్రజల మధ్య నియమిత కాలమందు మన తండ్రి అర్పణమును తెచ్చుటకు మేమెందుకు నిషేధింపబడవలెను?"

⁸ అందుకు మోషే వారితో, "మన తండ్రి దీనిగూర్చి ఏమి ఆజ్ఞాపించునో నేను వినువరకు ఇక్కడ నిలిచియుండుడి" అనెను.

⁹ అప్పుడు మన తండ్రి మోషేతో ఇట్లనెను, ¹⁰ ఇశ్రాయేలు ప్రజలతో ఇట్లనుము, మీలోగాని మీ సంతానములోగాని ఎవడైనను ఒక శవమును ముట్టుటవలన అపవిత్రుడైనను, దూర ప్రయాణములో ఉన్నను, అతడు మన తండ్రికి పస్కాను ఆచరింపవచ్చును. ¹¹ రెండవ నెల పదునాలుగవ దినమున, సంధ్యవేళ, వారు దాని ఆచరింపవలెను. పులియని రొట్టెతోను చేదు కూరలతోను దాని తినవలెను. ¹² వారు దానిలో ఏమియు ఉదయమువరకు మిగుల్చకూడదు, దాని ఎముకలలో ఏదియు విరుగగొట్టకూడదు; పస్కా కట్టడలన్నిటిని అనుసరింపవలెను. ¹³ అయితే పవిత్రుడై, ప్రయాణములో లేకయుండియు పస్కాను ఆచరింపక తప్పిపోయినవాడు, నియమిత కాలమందు మన తండ్రి అర్పణమును తేనందున, ఆ వ్యక్తి తన ప్రజలలోనుండి కొట్టివేయబడును; ఆ మనుష్యుడు తన పాపమును భరించును. ^a a v13 'తన ప్రజలలోనుండి కొట్టివేయబడుట' అనగా ఇశ్రాయేలు నిబంధన సమాజమునుండి అధికారికముగా వెలివేయబడుట.

¹⁴ మీ మధ్య నివసించు పరదేశి మన తండ్రికి పస్కాను ఆచరింపగోరినయెడల, అతడు పస్కా కట్టడను విధిని అనుసరింపవలెను. పరదేశికిని దేశనివాసికిని మీకు ఒక్కటే కట్టడ ఉండవలెను.

మేఘము దారి చూపును

¹⁵ గుడారము నిలువబెట్టిన దినమున, మేఘము గుడారమును, అనగా సాక్ష్యపు గుడారమును కమ్మెను. మరియు సాయంకాలము మొదలుకొని ఉదయమువరకు అది గుడారముపైన అగ్నివలె కనబడెను. ¹⁶ ఎల్లప్పుడు ఆలాగే జరిగెను: పగలు మేఘము దాని కమ్మెను, రాత్రి అగ్ని రూపము కనబడెను. ¹⁷ మేఘము గుడారముపైనుండి ఎప్పుడు పైకి లేచునో అప్పుడు ఇశ్రాయేలు ప్రజలు బయలుదేరిరి; మేఘము ఎక్కడ నిలుచునో అక్కడ వారు దిగిరి. ¹⁸ మన తండ్రి ఆజ్ఞనుబట్టి ఇశ్రాయేలు ప్రజలు బయలుదేరిరి, మన తండ్రి ఆజ్ఞనుబట్టి వారు దిగిరి. మేఘము గుడారముపైన నిలిచియున్నంతకాలము వారు శిబిరములోనే ఉండిరి. ¹⁹ మేఘము గుడారముపైన అనేక దినములు నిలిచియున్నప్పుడైనను, ఇశ్రాయేలు ప్రజలు మన తండ్రి ఆజ్ఞను గైకొని బయలుదేరకుండిరి. ²⁰ ఒకొక్కప్పుడు మేఘము గుడారముపైన కొన్ని దినములు మాత్రమే నిలిచెను; మన తండ్రి ఆజ్ఞనుబట్టి వారు శిబిరములో ఉండిరి; తరువాత మన తండ్రి ఆజ్ఞనుబట్టి వారు బయలుదేరిరి. ²¹ ఒకొక్కప్పుడు మేఘము సాయంకాలము మొదలుకొని ఉదయమువరకు నిలిచెను, ఉదయమున మేఘము పైకి లేచినప్పుడు వారు బయలుదేరిరి; పగలైనను రాత్రియైనను మేఘము పైకి లేచినప్పుడు వారు బయలుదేరిరి. ²² రెండు దినములైనను, ఒక నెలయైనను, అంతకంటె ఎక్కువ కాలమైనను మేఘము గుడారముపైన నిలిచియున్నయెడల, ఇశ్రాయేలు ప్రజలు శిబిరములోనే ఉండి బయలుదేరకుండిరి; అది పైకి లేచినప్పుడు మాత్రమే వారు బయలుదేరిరి. ²³ మన తండ్రి ఆజ్ఞనుబట్టి వారు దిగిరి, ఆయన ఆజ్ఞనుబట్టి వారు బయలుదేరిరి. మోషేద్వారా ఇయ్యబడిన మన తండ్రి ఆజ్ఞనుబట్టి వారు ఆయన ఆజ్ఞను గైకొనిరి.