మత్తయి 4

4 ¹ అప్పుడు యేసు అపవాదిచేత శోధింపబడుటకు పరిశుద్ధాత్మచేత అరణ్యములోనికి నడిపింపబడెను. ² నలుబది పగళ్లు నలుబది రాత్రులు ఉపవాసముండిన తరువాత ఆయనకు ఆకలివేసెను. ³ అప్పుడు శోధించువాడు ఆయనయొద్దకు వచ్చి, "నీవు మన తండ్రి కుమారుడవైతే, ఈ రాళ్లు రొట్టెలగునట్లు ఆజ్ఞాపించుము" అని చెప్పెను.

⁴ అందుకు ఆయన, "'మనుష్యుడు రొట్టెవలన మాత్రమే జీవించడు, గాని మన తండ్రి నోటినుండి వచ్చు ప్రతి మాటవలన జీవించును' అని వ్రాయబడియున్నది" అని ఉత్తరమిచ్చెను.

⁵ అప్పుడు అపవాది ఆయనను పరిశుద్ధ పట్టణమునకు తీసికొనిపోయి, దేవాలయ శిఖరముపైన ఆయనను నిలిపి, ⁶ ఆయనతో, "నీవు మన తండ్రి కుమారుడవైతే క్రిందికి దుముకుము; ఎందుకనగా, 'ఆయన నిన్నుగూర్చి తన దూతలకు ఆజ్ఞాపించును,' మరియు 'నీ పాదము రాతికి తగులకుండునట్లు వారు నిన్ను తమ చేతులతో ఎత్తికొందురు' అని వ్రాయబడియున్నది" అని చెప్పెను.

⁷ అందుకు యేసు, "'నీ తండ్రిని శోధింపకూడదు' అని మరల వ్రాయబడియున్నది" అని అతనితో చెప్పెను.

⁸ మరల అపవాది మిక్కిలి ఎత్తయిన కొండకు ఆయనను తీసికొనిపోయి, లోకముయొక్క సమస్త రాజ్యములను వాటి వైభవమును ఆయనకు చూపించి, ⁹ "నీవు సాగిలపడి నన్ను ఆరాధించినయెడల, వీటినన్నిటిని నీకిచ్చెదను" అని ఆయనతో చెప్పెను.

¹⁰ అప్పుడు యేసు, "సాతానూ, తొలగిపో! ఎందుకనగా, 'నీ తండ్రిని ఆరాధించి, ఆయనను మాత్రమే సేవించవలెను' అని వ్రాయబడియున్నది" అని అతనితో చెప్పెను.

¹¹ అప్పుడు అపవాది ఆయనను విడిచిపోయెను; వెంటనే దూతలు వచ్చి ఆయనకు పరిచర్య చేసిరి.

గలిలయలో వెలుగు ఉదయించుట

¹² యోహాను చెరపట్టబడెనని ఆయన విన్నప్పుడు గలిలయకు వెళ్లిపోయెను. ¹³ నజరేతును విడిచి, జెబూలూను నఫ్తాలి ప్రాంతములలో సముద్రతీరమందున్న కపెర్నహూమునకు వెళ్లి అక్కడ నివసించెను. ¹⁴ దీనివలన ప్రవక్తయైన యెషయాద్వారా చెప్పబడినది నెరవేరునట్లు జరిగెను: ¹⁵ "జెబూలూను దేశము నఫ్తాలి దేశము, సముద్రమార్గము, యొర్దానుకు ఆవలిప్రాంతము, అన్యజనుల గలిలయ— ¹⁶ చీకటిలో నివసించు ప్రజలు గొప్ప వెలుగును చూచిరి, మరణపు ప్రాంతములోను ఛాయలోను నివసించు వారికి, వారిపైన వెలుగు ఉదయించెను."

¹⁷ ఆ సమయమునుండి యేసు, "మారుమనస్సు పొందుడి, ఏలయనగా మన తండ్రి రాజ్యము సమీపించియున్నది" అని ప్రకటింప నారంభించెను.

యేసు తన మొదటి శిష్యులను పిలుచుట

¹⁸ ఆయన గలిలయ సముద్రతీరమున నడుచుచుండగా, పేతురు అనబడిన సీమోను, అతని సహోదరుడైన అంద్రెయ అను ఇద్దరు సహోదరులు సముద్రములో వల వేయుచుండుట చూచెను; వారు జాలరులు. ¹⁹ ఆయన వారితో, "నా వెంబడి రండి, నేను మిమ్మును మనుష్యులను పట్టు జాలరులనుగా చేసెదను" అని చెప్పెను. ²⁰ వెంటనే వారు తమ వలలను విడిచిపెట్టి ఆయనను వెంబడించిరి. ²¹ అక్కడనుండి ముందుకు వెళ్లుచు, జెబెదయి కుమారుడైన యాకోబు, అతని సహోదరుడైన యోహాను అను మరి యిద్దరు సహోదరులు తమ తండ్రియైన జెబెదయితోకూడ దోనెలో తమ వలలను బాగుచేయుచుండుట చూచి ఆయన వారిని పిలిచెను. ²² వెంటనే వారు దోనెను తమ తండ్రిని విడిచిపెట్టి ఆయనను వెంబడించిరి.

తండ్రి తన కుమారుని ద్వారా స్వస్థపరచుట

²³ ఆయన గలిలయ యందంతట సంచరించుచు, వారి సమాజమందిరములలో బోధించుచు, రాజ్యసువార్తను ప్రకటించుచు, ప్రజలలోని ప్రతి రోగమును ప్రతి వ్యాధిని స్వస్థపరచుచుండెను. ²⁴ ఆయన కీర్తి సిరియా యందంతట వ్యాపించెను; నానావిధ రోగములచేతను వేదనలచేతను బాధపడువారిని, దయ్యములు పట్టినవారిని, మూర్ఛరోగులను, పక్షవాయువు గలవారిని, రోగులనందరిని ఆయనయొద్దకు తీసికొనివచ్చిరి; ఆయన వారిని స్వస్థపరచెను. ²⁵ గలిలయ, దెకపొలి, యెరూషలేము, యూదయ, యొర్దానుకు ఆవలిప్రాంతమునుండి గొప్ప జనసమూహములు ఆయనను వెంబడించిరి. ^a a v25 దెకపొలి అనునది గలిలయ సముద్రమునకు తూర్పున, ఆగ్నేయమున ఉన్న ముఖ్యముగా అన్యజనుల పది పట్టణముల సముదాయము.