మత్తయి 26

Chapter 26.

26 ¹ యేసు ఈ మాటలన్నిటిని చెప్పి ముగించిన తరువాత, ఆయన తన శిష్యులతో ఇట్లనెను, ² "రెండు దినముల తరువాత పస్కా పండుగ వచ్చుననియు, మనుష్యకుమారుడు సిలువ వేయబడుటకు అప్పగింపబడుననియు మీకు తెలియును."

³ అప్పుడు ప్రధాన యాజకులును ప్రజల పెద్దలును కయప అను ప్రధానయాజకుని భవనములో సమకూడి, ⁴ యేసును రహస్యముగా పట్టుకొని చంపవలెనని కలిసి కుట్ర పన్నిరి. ⁵ అయితే వారు, "పండుగలో వద్దు, లేకున్న ప్రజలలో అల్లరి రేగును" అనిరి.

ఆమె యేసును ఖననము కొరకు అభిషేకించుట

⁶ యేసు బేతనియలో కుష్ఠరోగియైన సీమోను ఇంటిలో ఉన్నప్పుడు, ⁷ ఒక స్త్రీ మిక్కిలి విలువైన అత్తరు గల చలువరాతి బుడ్డిని తీసికొని ఆయనయొద్దకు వచ్చి, ఆయన భోజనమునకు కూర్చుండియుండగా దానిని ఆయన తలమీద పోసెను. ⁸ అయితే శిష్యులు దీనిని చూచి కోపగించుకొని, "ఈ నష్టమేల? ⁹ దీనిని గొప్ప విలువకు అమ్మి బీదలకు ఇయ్యవచ్చునుగదా" అనిరి.

¹⁰ యేసు దీనిని తెలిసికొని వారితో, "ఈ స్త్రీని మీరేల తొందరపెట్టుచున్నారు? ఆమె నాకొరకు ఒక మంచి పని చేసెను. ¹¹ బీదలు ఎల్లప్పుడు మీతో ఉందురు, గాని నేను ఎల్లప్పుడు మీతో ఉండను. ¹² ఆమె ఈ అత్తరును నా శరీరముమీద పోసినప్పుడు, నా ఖననము కొరకు నన్ను సిద్ధపరచుటకే దీనిని చేసెను. ¹³ నేను మీతో నిశ్చయముగా చెప్పుచున్నాను, సర్వలోకమందు ఈ సువార్త ఎక్కడ ప్రకటింపబడునో, అక్కడ ఆమె జ్ఞాపకార్థముగా ఆమె చేసిన పనియు చెప్పబడును" అనెను.

యూదా వెండి నాణేలకు కుమారుని అప్పగించుట

¹⁴ అప్పుడు పండ్రెండుమందిలో ఒకడైన ఇస్కరియోతు యూదా అనువాడు ప్రధాన యాజకులయొద్దకు వెళ్లి, ¹⁵ "నేను ఆయనను మీకు అప్పగించినయెడల మీరు నాకేమి ఇత్తురు?" అని అడిగెను. అందుకు వారు ముప్పది వెండి నాణేలను తూచి అతనికి ఇచ్చిరి. ¹⁶ అప్పటినుండి అతడు ఆయనను అప్పగించుటకు తగిన సమయము వెదకుచుండెను.

పస్కా పండుగకు సిద్ధపడుట

¹⁷ పులియని రొట్టెల పండుగలో మొదటి దినమున శిష్యులు యేసునొద్దకు వచ్చి, "నీవు పస్కాను భుజించుటకు మేము ఎక్కడ సిద్ధపరచవలెనని కోరుచున్నావు?" అని అడిగిరి.

¹⁸ ఆయన, "మీరు పట్టణములోనికి ఒక మనుష్యునియొద్దకు వెళ్లి, 'బోధకుడు ఇట్లనుచున్నాడు: నా సమయము సమీపించియున్నది. నేను నా శిష్యులతోకూడ నీ యింటిలో పస్కాను ఆచరించుదును' అని అతనితో చెప్పుడి" అనెను. ¹⁹ శిష్యులు యేసు తమకు ఆజ్ఞాపించినట్లు చేసి పస్కాను సిద్ధపరచిరి.

²⁰ సాయంకాలమైనప్పుడు ఆయన పండ్రెండుమందితో భోజనమునకు కూర్చుండెను. ²¹ వారు భోజనము చేయుచుండగా ఆయన, "నేను మీతో నిశ్చయముగా చెప్పుచున్నాను, మీలో ఒకడు నన్ను అప్పగించును" అనెను.

²² వారు మిక్కిలి దుఃఖపడి, ఒక్కొక్కడు, "ప్రభువా, అది నేనా?" అని ఆయనను అడుగసాగిరి.

²³ అందుకు ఆయన, "నాతోకూడ పాత్రలో చెయ్యి ముంచినవాడే నన్ను అప్పగించును. ²⁴ మనుష్యకుమారునిగూర్చి వ్రాయబడినట్లే ఆయన వెళ్లుచున్నాడు, గాని ఎవనివలన మనుష్యకుమారుడు అప్పగింపబడునో ఆ మనుష్యునికి శ్రమ! ఆ మనుష్యుడు పుట్టకుండినయెడల అతనికి మేలుగా ఉండెడిది" అనెను.

²⁵ ఆయనను అప్పగించిన యూదా, "రబ్బీ, అది నేనా?" అని అడుగగా, ఆయన అతనితో, "నీవే అంటివి" అనెను.

²⁶ వారు భోజనము చేయుచుండగా, యేసు ఒక రొట్టెను తీసికొని దానిని ఆశీర్వదించి, విరిచి, శిష్యులకిచ్చి, "తీసికొని తినుడి; ఇది నా శరీరము" అనెను. ²⁷ మరియు ఆయన ఒక గిన్నెను తీసికొని కృతజ్ఞతాస్తుతులు చెల్లించి, దానిని వారికిచ్చి, "మీరందరు దీనిలోనిది త్రాగుడి; ²⁸ ఇది నిబంధనకు సంబంధించిన నా రక్తము, పాపక్షమాపణ నిమిత్తము అనేకుల కొరకు చిందింపబడుచున్నది. ²⁹ నేను మీతో చెప్పుచున్నాను, నా తండ్రి రాజ్యములో మీతోకూడ దీనిని క్రొత్తగా త్రాగు దినమువరకు, ఇకమీదట ఈ ద్రాక్షారసమును నేను త్రాగను" అనెను.

³⁰ వారు స్తుతిగీతము పాడిన తరువాత ఒలీవల కొండకు బయలుదేరి వెళ్లిరి.

పేతురు ఎరుగననుటను యేసు ముందుగా చెప్పుట

³¹ అప్పుడు యేసు వారితో, "ఈ రాత్రి మీరందరు నా విషయమై అభ్యంతరపడెదరు. ఎందుకనగా, 'నేను గొఱ్ఱెల కాపరిని కొట్టుదును, అప్పుడు మంద గొఱ్ఱెలు చెదరిపోవును' అని వ్రాయబడియున్నది. ³² అయితే నేను లేచిన తరువాత మీకంటె ముందుగా గలిలయకు వెళ్లుదును" అనెను.

³³ అందుకు పేతురు, "అందరు నీ విషయమై అభ్యంతరపడినను, నేనెన్నడును అభ్యంతరపడను" అని ఆయనతో అనెను.

³⁴ యేసు అతనితో, "నేను నీతో నిశ్చయముగా చెప్పుచున్నాను, ఈ రాత్రి కోడి కూయకమునుపే నీవు నన్ను ఎరుగనని ముమ్మారు చెప్పెదవు" అనెను.

³⁵ పేతురు, "నేను నీతోకూడ చావవలసివచ్చినను, నిన్ను ఎరుగనని చెప్పను" అని ఆయనతో అనెను. శిష్యులందరును ఆలాగుననే అనిరి.

కుమారుడు తండ్రికి తనను తాను అప్పగించుకొనుట

³⁶ అప్పుడు యేసు వారితోకూడ గెత్సేమనే అను చోటికి వచ్చి, "నేను అక్కడికి వెళ్లి ప్రార్థన చేయువరకు మీరు ఇక్కడ కూర్చుండుడి" అని శిష్యులతో చెప్పెను. ³⁷ ఆయన పేతురును జెబెదయి ఇద్దరు కుమారులను తనతోకూడ తీసికొనిపోయి, మిక్కిలి దుఃఖపడి వ్యాకులపడసాగెను. ³⁸ అప్పుడు ఆయన వారితో, "నా ప్రాణము మరణమగునంతగా బహు దుఃఖములో మునిగియున్నది. మీరు ఇక్కడ ఉండి నాతోకూడ మెలకువగా ఉండుడి" అనెను.

³⁹ ఆయన కొంచెము దూరము వెళ్లి, సాష్టాంగపడి, "నా తండ్రీ, సాధ్యమైతే ఈ గిన్నె నానుండి తొలగిపోనిమ్ము. అయినను నా చిత్తప్రకారము కాదు, నీ చిత్తప్రకారమే జరుగనిమ్ము" అని ప్రార్థించెను.

⁴⁰ ఆయన శిష్యులయొద్దకు వచ్చి వారు నిద్రించుట చూచి, పేతురుతో, "ఏమీ, మీరు నాతోకూడ ఒక్క గడియైనను మెలకువగా ఉండలేకపోతిరా? ⁴¹ మీరు శోధనలో ప్రవేశించకుండునట్లు మెలకువగా ఉండి ప్రార్థన చేయుడి. ఆత్మ సిద్ధమే గాని శరీరము బలహీనము" అనెను.

⁴² ఆయన మరల రెండవసారి వెళ్లి, "నా తండ్రీ, నేను దీనిని త్రాగకుండ ఇది తొలగిపోజాలనియెడల, నీ చిత్తమే జరుగును గాక" అని ప్రార్థించెను. ⁴³ ఆయన తిరిగి వచ్చి, వారి కన్నులు భారముగా ఉన్నందున వారు నిద్రించుట చూచెను. ⁴⁴ ఆయన వారిని మరల విడిచి వెళ్లి, ఆ మాటలనే మరల చెప్పుచు మూడవసారి ప్రార్థించెను. ⁴⁵ అప్పుడు ఆయన శిష్యులయొద్దకు వచ్చి, "మీరింకను నిద్రించి విశ్రాంతి తీసికొనుచున్నారా? ఇదిగో, గడియ వచ్చినది, మనుష్యకుమారుడు పాపుల చేతికి అప్పగింపబడుచున్నాడు. ⁴⁶ లేచి పోదము! ఇదిగో, నన్ను అప్పగించువాడు వచ్చియున్నాడు" అనెను.

యేసు అప్పగింపబడి బంధింపబడుట

⁴⁷ ఆయన ఇంకను మాటలాడుచుండగా, పండ్రెండుమందిలో ఒకడైన యూదా వచ్చెను; ప్రధాన యాజకులును ప్రజల పెద్దలును పంపిన గొప్ప జనసమూహము కత్తులతోను గుదియలతోను అతనితోకూడ వచ్చెను. ⁴⁸ ఆయనను అప్పగించువాడు, "నేను ఎవరిని ముద్దుపెట్టుకొందునో ఆయనే; ఆయనను పట్టుకొనుడి" అని వారికి ఒక సంకేతము ఇచ్చియుండెను. ⁴⁹ వెంటనే అతడు యేసునొద్దకు వచ్చి, "రబ్బీ, నీకు శుభమగుగాక!" అని చెప్పి ఆయనను ముద్దుపెట్టుకొనెను.

⁵⁰ అందుకు యేసు అతనితో, "స్నేహితుడా, నీవు దేనికి వచ్చితివో అది చేయుము" అనెను. అప్పుడు వారు వచ్చి యేసుమీద చేతులు వేసి ఆయనను పట్టుకొనిరి.

⁵¹ అంతలో యేసుతోకూడ ఉన్నవారిలో ఒకడు చెయ్యి చాచి తన కత్తిని దూసి, ప్రధానయాజకుని దాసుని కొట్టి వాని చెవి తెగనరికెను.

⁵² అప్పుడు యేసు అతనితో, "నీ కత్తిని దాని స్థానములో తిరిగి పెట్టుము. కత్తి పట్టుకొను వారందరును కత్తిచేతనే నశింతురు. ⁵³ నేను నా తండ్రిని వేడుకొనలేననియు, ఆయన పండ్రెండు సైన్యములకంటె ఎక్కువ దూతలను వెంటనే నాయొద్దకు పంపడనియు నీవు తలంచుచున్నావా? ⁵⁴ అట్లయితే ఇది ఈలాగు జరుగవలెనని చెప్పు లేఖనములు ఏలాగు నెరవేరును?" అనెను.

⁵⁵ ఆ సమయమున యేసు జనసమూహములతో, "ఒక దొంగను పట్టుకొనుటకు వచ్చినట్లు కత్తులతోను గుదియలతోను నన్ను పట్టుకొనుటకు వచ్చితిరా? నేను ప్రతిదినము దేవాలయములో కూర్చుండి బోధించుచుంటిని, అయినను మీరు నన్ను పట్టుకొనలేదు. ⁵⁶ అయితే ప్రవక్తల లేఖనములు నెరవేరునట్లు ఇదంతయు జరిగినది" అనెను. అప్పుడు శిష్యులందరు ఆయనను విడిచి పారిపోయిరి.

తనపై నేరము మోపువారి ఎదుట యేసు

⁵⁷ యేసును పట్టుకొనినవారు, శాస్త్రులును పెద్దలును కూడియున్న ప్రధానయాజకుడైన కయపయొద్దకు ఆయనను తీసికొనిపోయిరి. ⁵⁸ పేతురు దూరమునుండి ప్రధానయాజకుని ఆవరణమువరకు ఆయనను వెంబడించి, లోపలికి వెళ్లి, జరుగబోవునది చూచుటకు బంట్రౌతులతో కూర్చుండెను.

⁵⁹ ప్రధాన యాజకులును మహాసభవారందరును యేసును చంపవలెనని ఆయనకు విరోధముగా అబద్ధసాక్ష్యము వెదకుచుండిరి, ⁶⁰ అనేకమంది అబద్ధసాక్షులు ముందుకు వచ్చినను, వారికి ఏమియు దొరకలేదు. కడకు ఇద్దరు ముందుకు వచ్చి, ⁶¹ "'నేను మన తండ్రి ఆలయమును పడగొట్టి మూడు దినములలో దానిని తిరిగి కట్టగలను' అని ఈ మనుష్యుడు చెప్పెను" అనిరి.

⁶² అప్పుడు ప్రధానయాజకుడు లేచి ఆయనతో, "నీవు చెప్పుటకు ఏమియు లేదా? వీరు నీకు విరోధముగా సాక్ష్యమిచ్చునది ఏమిటి?" అనెను. ⁶³ అయితే యేసు మౌనముగా ఉండెను. అప్పుడు ప్రధానయాజకుడు ఆయనతో, "సజీవుడైన తండ్రి తోడని నీకు ఆనబెట్టుచున్నాను, నీవు మన తండ్రి కుమారుడవైన క్రీస్తువో కావో మాకు చెప్పుము" అనెను.

⁶⁴ యేసు అతనితో, "నీవే అంటివి. అయితే నేను మీతో చెప్పుచున్నాను, ఇది మొదలుకొని మనుష్యకుమారుడు సర్వశక్తుని కుడిపార్శ్వమున కూర్చుండుటయు, ఆకాశ మేఘములమీద వచ్చుటయు మీరు చూచెదరు" అనెను.

⁶⁵ అప్పుడు ప్రధానయాజకుడు తన వస్త్రములు చించుకొని, "ఇతడు దేవదూషణ చేసెను! మనకు ఇకను సాక్షులతో పనియేమి? ఇదిగో, ఇప్పుడే ఈ దేవదూషణ మీరు వింటిరి. ⁶⁶ మీ తీర్పు ఏమిటి?" అని అడిగెను. అందుకు వారు, "ఇతడు మరణమునకు పాత్రుడు" అనిరి.

⁶⁷ అప్పుడు వారు ఆయన ముఖముమీద ఉమ్మివేసి, ఆయనను గుద్దిరి; కొందరు ఆయనను చెంపదెబ్బలు కొట్టి, ⁶⁸ "క్రీస్తూ, నిన్ను కొట్టినవాడెవడో మాకు ప్రవచింపుము!" అనిరి.

యేసును ఎరుగనని పేతురు చెప్పుట

⁶⁹ పేతురు వెలుపల ఆవరణములో కూర్చుండియుండగా, ఒక పనికత్తె అతనియొద్దకు వచ్చి, "నీవును గలిలయుడైన యేసుతోకూడ ఉంటివి" అనెను.

⁷⁰ అయితే అతడు అందరి యెదుట దానిని నిరాకరించి, "నీవు చెప్పునది నాకు తెలియదు" అనెను.

⁷¹ అతడు వాకిటిలోనికి వెళ్లగా, మరియొక పనికత్తె అతనిని చూచి, అక్కడ ఉన్నవారితో, "ఇతడు నజరేయుడైన యేసుతోకూడ ఉండెను" అనెను.

⁷² అతడు మరల ఒట్టుపెట్టుకొని, "ఆ మనుష్యుని నేనెరుగను" అని నిరాకరించెను.

⁷³ కొంతసేపైన తరువాత అక్కడ నిలుచున్నవారు వచ్చి పేతురుతో, "నిశ్చయముగా నీవును వారిలో ఒకడవే, నీ పలుకుబడి నిన్ను బయలుపరచుచున్నది" అనిరి.

⁷⁴ అప్పుడు అతడు, "ఆ మనుష్యుని నేనెరుగను" అని తనమీద శాపములు తెచ్చుకొనుచు ఒట్టుపెట్టుకొనసాగెను. వెంటనే కోడి కూసెను.

⁷⁵ అప్పుడు, "కోడి కూయకమునుపే నీవు నన్ను ఎరుగనని ముమ్మారు చెప్పెదవు" అని యేసు చెప్పిన మాట పేతురు జ్ఞాపకము చేసికొని, వెలుపలికి పోయి సంతాపముతో ఏడ్చెను.