మత్తయి 16

16 ¹ పరిసయ్యులును సద్దూకయ్యులును ఆయనను శోధించుటకు వచ్చి, పరలోకమునుండి ఒక సూచన తమకు చూపమని ఆయనను అడిగిరి. ² ఆయన ఇట్లనెను, "సాయంకాలమైనప్పుడు, 'ఆకాశము ఎఱ్ఱగా ఉన్నది గనుక వాతావరణము నిర్మలముగా ఉండును' అని మీరు చెప్పుదురు. ³ "ఉదయమందైతే, 'ఆకాశము ఎఱ్ఱగాను మబ్బుగాను ఉన్నది గనుక నేడు గాలివాన వచ్చును' అని చెప్పుదురు. ఆకాశ రూపమును వివరించుట మీకు తెలియును గాని, కాలముల సూచనలను వివరింపలేరు. ⁴ "దుష్టమైన వ్యభిచార తరము సూచన వెదకుచున్నది, అయితే యోనా సూచన తప్ప మరి యే సూచనయు దానికి ఇయ్యబడదు." అప్పుడు ఆయన వారిని విడిచి వెళ్లిపోయెను.

అబద్ధ బోధ యొక్క పులిసిన పిండి

⁵ శిష్యులు అవతలి ఒడ్డుకు వచ్చినప్పుడు, రొట్టె తెచ్చుటకు మరచిపోయిరి. ⁶ యేసు వారితో, "పరిసయ్యుల సద్దూకయ్యుల పులిసిన పిండి విషయమై జాగ్రత్తగా ఉండి, ఎచ్చరికగా ఉండుడి" అని చెప్పెను.

⁷ వారు తమలో తాము దీనిగూర్చి తర్కించుకొని, "మనము రొట్టె తేలేదు గనుకనే" అని చెప్పుకొనిరి.

⁸ యేసు దీనిని ఎరిగి, "అల్పవిశ్వాసులారా, మీయొద్ద రొట్టె లేదని మీలో మీరు ఎందుకు తర్కించుకొనుచున్నారు? ⁹ "మీరింకను గ్రహింపలేదా? అయిదువేల మందికి అయిదు రొట్టెలను, మీరు ఎన్ని గంపలు ఎత్తితిరో జ్ఞాపకము లేదా? ¹⁰ "లేక నాలుగువేల మందికి ఏడు రొట్టెలను, మీరు ఎన్ని గంపలు ఎత్తితిరో జ్ఞాపకము లేదా? ¹¹ "నేను రొట్టెనుగూర్చి మీతో మాటలాడలేదని మీరెట్లు గ్రహింపకయున్నారు? పరిసయ్యుల సద్దూకయ్యుల పులిసిన పిండి విషయమై జాగ్రత్తగా ఉండుడి."

¹² అప్పుడు ఆయన రొట్టెలో వేయు పులిసిన పిండి విషయమై కాదు గాని, పరిసయ్యుల సద్దూకయ్యుల బోధ విషయమై జాగ్రత్తగా ఉండుమని తమతో చెప్పెనని వారు గ్రహించిరి.

పేతురు తండ్రి కుమారుని ఒప్పుకొనుట

¹³ యేసు కైసరయ ఫిలిప్పి ప్రాంతమునకు వచ్చినప్పుడు, "మనుష్యకుమారుడు ఎవడని జనులు చెప్పుకొనుచున్నారు?" అని తన శిష్యులను అడిగెను.

¹⁴ వారు, "కొందరు బాప్తిస్మమిచ్చు యోహానని, మరికొందరు ఏలీయా అని, ఇంక కొందరు యిర్మీయా అని లేక ప్రవక్తలలో ఒకడని చెప్పుకొనుచున్నారు" అనిరి.

¹⁵ ఆయన వారితో, "అయితే నేనెవడనని మీరు చెప్పుచున్నారు?" అనెను.

¹⁶ సీమోను పేతురు, "నీవు క్రీస్తువు, జీవముగల తండ్రి కుమారుడవు" అని చెప్పెను.

¹⁷ యేసు, "యోనా కుమారుడవైన సీమోనూ, నీవు ధన్యుడవు! ఏలయనగా రక్తమాంసములు కాదు గాని పరలోకమందున్న నా తండ్రి దీనిని నీకు బయలుపరచెను. ¹⁸ "మరియు నీవు పేతురువు; ఈ బండమీద నా సంఘమును కట్టుదునని నేను నీతో చెప్పుచున్నాను; సమాధి ద్వారములు దానిని జయింపనేరవు. ¹⁹ "మన తండ్రి రాజ్యము యొక్క తాళపు చెవులను నీకిచ్చెదను; నీవు భూమిమీద దేనిని బంధించుదువో అది పరలోకమందు బంధింపబడియుండును, భూమిమీద దేనిని విడుదల చేయుదువో అది పరలోకమందు విడుదల చేయబడియుండును." ^a a v19 "బంధించుట, విడుదల చేయుట" అను మాట, వస్తువులను నిషిద్ధమని లేక అనుమతించబడినవని ప్రకటించుటకు యూదుల రబ్బీల నుడికారము. ²⁰ అప్పుడు తాను క్రీస్తునని ఎవరితోను చెప్పవద్దని ఆయన శిష్యులకు కఠినముగా ఆజ్ఞాపించెను.

కుమారుడు శ్రమపడి లేవవలెను

²¹ ఆ సమయమునుండి యేసు, తాను యెరూషలేమునకు వెళ్లి పెద్దల చేతను ప్రధాన యాజకుల చేతను శాస్త్రుల చేతను అనేక శ్రమలు పొంది, చంపబడి, మూడవ దినమున లేపబడవలెనని తన శిష్యులకు తెలియజేయనారంభించెను.

²² పేతురు ఆయనను ఒక ప్రక్కకు తీసికొనిపోయి, "ప్రభువా, ఇది ఎన్నటికిని కాకూడదు! ఇది నీకు ఎన్నటికిని సంభవింపదు" అని ఆయనను గద్దింపనారంభించెను.

²³ అయితే ఆయన తిరిగి పేతురుతో, "సాతానూ, నా వెనుకకు పొమ్ము! నీవు నాకు అభ్యంతరముగా ఉన్నావు; ఏలయనగా నీ మనస్సు మన తండ్రి లక్ష్యపెట్టువాటిమీద కాదు గాని మనుష్యులు లక్ష్యపెట్టువాటిమీద ఉన్నది" అని చెప్పెను.

²⁴ అప్పుడు యేసు తన శిష్యులతో, "ఎవడైనను నా వెంబడి రాగోరినయెడల, తన్నుతాను ఉపేక్షించుకొని, తన సిలువను ఎత్తికొని, నన్ను వెంబడింపవలెను. ²⁵ "తన ప్రాణమును రక్షించుకొనగోరువాడు దానిని పోగొట్టుకొనును, అయితే నా నిమిత్తము తన ప్రాణమును పోగొట్టుకొనువాడు దానిని పొందును. ²⁶ "ఒకడు లోకమంతటిని సంపాదించుకొని తన ఆత్మను పోగొట్టుకొనినయెడల వానికేమి ప్రయోజనము? లేక ఒకడు తన ఆత్మకు ప్రతిగా ఏమి ఇచ్చును? ²⁷ "మనుష్యకుమారుడు తన తండ్రి మహిమతో తన దూతలతోకూడ రాబోవుచున్నాడు; అప్పుడు ఆయన ప్రతివానికి వాని క్రియల చొప్పున ప్రతిఫలమిచ్చును. ²⁸ "మనుష్యకుమారుడు తన రాజ్యములో వచ్చుట చూచువరకు మరణము రుచిచూడని కొందరు ఇక్కడ నిలిచియున్నారని నేను మీతో నిశ్చయముగా చెప్పుచున్నాను."