లూకా 22

Chapter 22.

22 ¹ ఇప్పుడు పస్కా అనబడు పులియని రొట్టెల పండుగ సమీపించుచుండెను. ² ప్రధానయాజకులును శాస్త్రులును ఆయనను ఏ విధముగా చంపింపవలెనో అను మార్గము వెదకుచుండిరి, ఏలయనగా వారు ప్రజలకు భయపడిరి.

³ అప్పుడు పన్నిద్దరిలో ఒకడైన ఇస్కరియోతు అనబడు యూదాలోనికి సాతాను ప్రవేశించెను. ⁴ అతడు వెళ్ళి, ఆయనను ఏ విధముగా వారికి అప్పగింపవచ్చునో అని ప్రధానయాజకులతోను దేవాలయపు అధికారులతోను మాటలాడెను. ⁵ వారు సంతోషించి, అతనికి డబ్బు ఇచ్చుటకు ఒప్పుకొనిరి. ⁶ అతడు అంగీకరించి, జనసమూహము లేనప్పుడు ఆయనను వారికి అప్పగించుటకు అనుకూలమైన సమయము వెదకసాగెను.

చివరి పస్కా సిద్ధపరచబడుట

⁷ పస్కా గొఱ్ఱెపిల్లను వధింపవలసిన పులియని రొట్టెల దినము వచ్చెను. ⁸ యేసు పేతురును యోహానును పంపి, "మనము పస్కాను భుజించునట్లు వెళ్ళి దానిని మనకొరకు సిద్ధపరచుడి" అని చెప్పెను.

⁹ వారు ఆయనతో, "మేము దానిని ఎక్కడ సిద్ధపరచవలెనని నీవు కోరుచున్నావు?" అని అడిగిరి.

¹⁰ ఆయన వారితో ఇట్లనెను, "ఇదిగో, మీరు పట్టణములోనికి ప్రవేశించినప్పుడు, నీళ్ళకుండ మోసికొనిపోవు ఒక మనుష్యుడు మిమ్మును కలిసికొనును. అతడు ప్రవేశించు ఇంటిలోనికి అతని వెంబడించి, ¹¹ ఆ ఇంటి యజమానితో, 'నా శిష్యులతో కూడ నేను పస్కాను భుజించుటకు అతిథిగది ఎక్కడ ఉన్నదని బోధకుడు నిన్ను అడుగుచున్నాడు' అని చెప్పుడి." ¹² "అప్పుడతడు సామగ్రితో సిద్ధపరచబడిన మేడమీది పెద్ద గదిని మీకు చూపించును; అక్కడ దానిని సిద్ధపరచుడి."

¹³ వారు వెళ్ళి, ఆయన తమతో చెప్పినట్లే కనుగొని, పస్కాను సిద్ధపరచిరి.

¹⁴ ఆ గడియ వచ్చినప్పుడు, ఆయనయు ఆయనతోకూడ అపొస్తలులును భోజనమునకు కూర్చుండిరి. ¹⁵ ఆయన వారితో, "నేను శ్రమపడకమునుపు మీతో కూడ ఈ పస్కాను భుజింపవలెనని ఎంతో ఆశపడితిని" అని చెప్పెను. ¹⁶ "ఏలయనగా, అది మన తండ్రి రాజ్యములో నెరవేరువరకు నేను దానిని భుజింపనని మీతో చెప్పుచున్నాను." ¹⁷ పిమ్మట ఆయన ఒక గిన్నెను తీసికొని, కృతజ్ఞతాస్తుతులు చెల్లించి, "దీనిని తీసికొని మీలో పంచుకొనుడి" అని చెప్పెను. ¹⁸ "ఏలయనగా, మన తండ్రి రాజ్యము వచ్చువరకు ఇక మీదట నేను ద్రాక్షాఫలరసమును త్రాగనని మీతో చెప్పుచున్నాను."

¹⁹ మరియు ఆయన రొట్టెను తీసికొని, కృతజ్ఞతాస్తుతులు చెల్లించి, దానిని విరిచి, వారికి ఇచ్చి, "ఇది మీకొరకు ఇయ్యబడుచున్న నా శరీరము. నన్ను జ్ఞాపకము చేసికొనుటకు దీనిని చేయుడి" అని చెప్పెను. ²⁰ అటువలెనే భోజనమైన తరువాత ఆ గిన్నెను తీసికొని, "ఈ గిన్నె మీకొరకు చిందింపబడుచున్న నా రక్తములోని క్రొత్త నిబంధన" అని చెప్పెను. ²¹ "అయితే ఇదిగో — నన్ను అప్పగించువాని చెయ్యి నాతో కూడ బల్లమీద ఉన్నది." ²² "ఏలయనగా, నిర్ణయింపబడినట్లు మనుష్యకుమారుడు వెళ్ళుచున్నాడు గాని, ఆయన ఎవనిచేత అప్పగింపబడునో ఆ మనుష్యునికి శ్రమ!"

²³ అప్పుడు వారు, ఇది చేయబోవువాడు తమలో ఎవడైయుండునో అని తమలోతాము విచారించుకొనసాగిరి.

²⁴ మరియు తమలో ఎవడు గొప్పవాడని వారిమధ్య వివాదము కూడ పుట్టెను. ²⁵ ఆయన వారితో ఇట్లనెను, "అన్యజనుల రాజులు వారిమీద ప్రభుత్వము చేయుదురు, వారిమీద అధికారము గలవారు ఉపకారులని పిలువబడుదురు." ²⁶ "అయితే మీరు ఆలాగుండరాదు. మీలో గొప్పవాడు చిన్నవానివలెను, నాయకుడు సేవచేయువానివలెను ఉండవలెను." ²⁷ "భోజనమునకు కూర్చుండువాడా, సేవచేయువాడా, ఎవడు గొప్పవాడు? భోజనమునకు కూర్చుండువాడు కాడా? అయినను నేను మీ మధ్య సేవచేయువానివలె ఉన్నాను."

²⁸ "నా శోధనలలో నాతో నిలిచియున్నవారు మీరే; ²⁹ నా తండ్రి నాకు రాజ్యమును నియమించినట్లు నేనును మీకు రాజ్యమును నియమించుచున్నాను, ³⁰ ఇందువలన మీరు నా రాజ్యములో నా బల్లయొద్ద తిని త్రాగి, ఇశ్రాయేలు పండ్రెండు గోత్రములకు తీర్పుతీర్చుచు సింహాసనములమీద కూర్చుందురు."

³¹ "సీమోనూ, సీమోనూ, వినుము — గోధుమలను జల్లించునట్లు సాతాను మీ అందరిని జల్లించుటకు అనుమతి అడిగియున్నాడు, ³² అయితే నీ విశ్వాసము తప్పిపోకుండునట్లు నేను నీకొరకు వేడుకొంటిని. నీవు మళ్ళి మనసుమార్చుకొనిన తరువాత నీ సహోదరులను స్థిరపరచుము."

³³ పేతురు ఆయనతో, "ప్రభువా, నేను నీతోకూడ చెరసాలకును మరణమునకును వెళ్ళుటకు సిద్ధముగా ఉన్నాను" అనెను.

³⁴ అందుకు యేసు, "పేతురూ, నేను నీతో చెప్పుచున్నాను, నీవు నన్ను ఎరుగనని మూడుమారులు బొంకువరకు నేడు కోడి కూయదు" అని చెప్పెను.

³⁵ మరియు ఆయన వారితో, "నేను మిమ్మును సంచియైనను జాలెయైనను చెప్పులైనను లేకుండ పంపినప్పుడు, మీకు ఏమైన కొదువగా ఉండెనా?" అని అడిగెను. అందుకు వారు, "ఏమియు లేదు" అనిరి.

³⁶ ఆయన వారితో ఇట్లనెను, "అయితే ఇప్పుడు సంచి గలవాడు దానిని తీసికొనవలెను, ఆలాగే జాలెను తీసికొనవలెను. కత్తిలేనివాడు తన పైవస్త్రమును అమ్మి ఒక కత్తిని కొనవలెను." ³⁷ "ఏలయనగా, 'ఆయన అపరాధులలో ఒకనిగా ఎంచబడెను' అను ఈ లేఖనము నాయందు నెరవేరవలెనని మీతో చెప్పుచున్నాను. నన్నుగూర్చి వ్రాయబడినది నెరవేరుచున్నది."

³⁸ అందుకు వారు, "ప్రభువా, ఇదిగో, ఇక్కడ రెండు కత్తులు ఉన్నవి" అనిరి. ఆయన వారితో, "చాలును" అనెను.

కుమారుడు తండ్రికి తనను తాను అప్పగించుకొనుట

³⁹ ఆయన బయలుదేరి, తన అలవాటు చొప్పున ఒలీవలకొండకు వెళ్ళెను, శిష్యులును ఆయనను వెంబడించిరి. ⁴⁰ ఆ స్థలమునకు వచ్చినప్పుడు ఆయన వారితో, "మీరు శోధనలో పడకుండునట్లు ప్రార్థన చేయుడి" అని చెప్పెను.

⁴¹ ఆయన వారియొద్దనుండి ఒక రాయి విసరు దూరమంత తొలగిపోయి, మోకాళ్ళూని ప్రార్థన చేయుచు, ⁴² "తండ్రీ, నీకిష్టమైతే ఈ గిన్నెను నానుండి తొలగింపుము. అయినను నా చిత్తముకాదు, నీ చిత్తమే జరుగునుగాక" అని చెప్పెను.

⁴³ అప్పుడు పరలోకమునుండి ఒక దూత ఆయనకు కనబడి, ఆయనను బలపరచెను. ⁴⁴ ఆయన వేదనలో ఉండి మరి ఆతురముగా ప్రార్థన చేయగా, ఆయన చెమట నేలమీద పడు గొప్ప రక్తబిందువులవలె ఆయెను.

⁴⁵ ఆయన ప్రార్థన ముగించి లేచి, శిష్యులయొద్దకు వచ్చి, వారు దుఃఖముచేత నిద్రించుచుండుట చూచి, ⁴⁶ వారితో, "మీరేల నిద్రించుచున్నారు? లేచి, శోధనలో పడకుండునట్లు ప్రార్థన చేయుడి" అని చెప్పెను.

ముద్దుతో ద్రోహము

⁴⁷ ఆయన ఇంక మాటలాడుచుండగా, ఒక జనసమూహము వచ్చెను, పన్నిద్దరిలో ఒకడైన యూదా అనువాడు వారికి ముందు నడుచుచుండెను. అతడు యేసును ముద్దుపెట్టుకొనుటకు ఆయనయొద్దకు వచ్చెను, ⁴⁸ అయితే యేసు అతనితో, "యూదా, ముద్దుతో మనుష్యకుమారుని అప్పగించుచున్నావా?" అని చెప్పెను.

⁴⁹ ఆయన చుట్టునున్నవారు జరుగబోవునది చూచి, "ప్రభువా, కత్తితో నరుకుదుమా?" అని అడిగిరి. ⁵⁰ వారిలో ఒకడు ప్రధానయాజకుని దాసుని కొట్టి, వాని కుడిచెవి తెగనరికెను.

⁵¹ అయితే యేసు, "ఇక చాలును!" అని ఉత్తరమిచ్చి, ఆ చెవిని ముట్టి వానిని స్వస్థపరచెను. ⁵² అప్పుడు యేసు, తనమీదికి వచ్చిన ప్రధానయాజకులతోను దేవాలయపు అధికారులతోను పెద్దలతోను, "బందిపోటు మీదికి వచ్చినట్లు కత్తులతోను గుదియలతోను మీరు వచ్చితిరా?" అనెను. ⁵³ "ప్రతిదినము నేను మీతోకూడ దేవాలయములో ఉండగా మీరు నామీద చెయ్యి వేయలేదు. అయితే ఇది మీ గడియ, చీకటి యొక్క అధికారము."

పేతురు యేసును ఎరుగనని బొంకుట

⁵⁴ అప్పుడు వారు ఆయనను పట్టుకొని, తీసికొనిపోయి, ప్రధానయాజకుని యింటిలోనికి తెచ్చిరి, పేతురు దూరముగా వెంబడించుచుండెను. ⁵⁵ వారు ముంగిలిమధ్య చిచ్చు రగుల్చుకొని కూడ కూర్చుండగా, పేతురు వారిమధ్య కూర్చుండెను. ⁵⁶ అప్పుడు ఒక దాసి, అతడు మంటవెలుగులో కూర్చుండుట చూచి, అతనివైపు నిదానించి చూచి, "ఇతడును ఆయనతో కూడ ఉండెను" అనెను.

⁵⁷ అయితే అతడు దానిని నిరాకరించి, "ఓ స్త్రీ, నేను ఆయనను ఎరుగను" అనెను.

⁵⁸ కొంతసేపైన తరువాత మరియొకడు అతనిని చూచి, "నీవును వారిలో ఒకడవు" అనెను. అయితే పేతురు, "ఓ మనుష్యుడా, నేను కాను" అనెను.

⁵⁹ ఇంచుమించు ఒక గంటైన తరువాత మరియొకడు, "నిజముగా ఇతడును ఆయనతో కూడ ఉండెను, ఏలయనగా ఇతడును గలిలయుడు" అని దృఢముగా చెప్పెను.

⁶⁰ అయితే పేతురు, "ఓ మనుష్యుడా, నీవు చెప్పునది నాకు తెలియదు" అనెను. అతడు ఇంక మాటలాడుచుండగానే వెంటనే కోడి కూసెను. ⁶¹ అప్పుడు ప్రభువు తిరిగి పేతురువైపు చూచెను. "నేడు కోడి కూయకమునుపు నీవు నన్ను మూడుమారులు ఎరుగనని చెప్పెదవు" అని ప్రభువు తనతో చెప్పిన మాటను పేతురు జ్ఞాపకము చేసికొనెను. ⁶² అతడు వెలుపలికిపోయి, వెక్కివెక్కి యేడ్చెను.

⁶³ యేసును పట్టుకొనియున్న మనుష్యులు ఆయనను కొట్టుచు అపహాస్యము చేసిరి. ⁶⁴ వారు ఆయన కన్నులకు గంతకట్టి, "ప్రవచింపుము! నిన్ను కొట్టినవాడెవడు?" అని అడుగుచుండిరి. ⁶⁵ మరియు వారు ఆయనను దూషించుచు ఆయనకు విరోధముగా అనేక మాటలు పలికిరి.

యేసు మహాసభ యెదుట నిలుచుట

⁶⁶ తెల్లవారినప్పుడు ప్రజల పెద్దల సభయు, ప్రధానయాజకులును శాస్త్రులును కూడివచ్చి, ఆయనను తమ మహాసభలోనికి తీసికొనిపోయి, ⁶⁷ "నీవు క్రీస్తువైతే మాతో చెప్పుము" అనిరి. అయితే ఆయన వారితో, "నేను మీతో చెప్పినను మీరు నమ్మరు, ⁶⁸ నేను మిమ్మును అడిగినను మీరు ఉత్తరమియ్యరు." ⁶⁹ "అయితే ఇక మీదట మనుష్యకుమారుడు మన తండ్రి శక్తికి కుడిపార్శ్వమున ఆసీనుడైయుండును."

⁷⁰ అందుకు వారందరు, "అలాగైతే నీవు మన తండ్రి కుమారుడవా?" అనిరి. ఆయన వారితో, "మీరు చెప్పినట్లే నేను ఆయనను" అనెను.

⁷¹ అప్పుడు వారు, "మనకు ఇక సాక్ష్యముతో పనియేమి? ఆయన నోటినుండియే మనము దానిని వింటిమి గదా" అనిరి.