లూకా 11

11 ¹ ఆయన ఒక చోట ప్రార్థన చేయుచుండగా, ఆయన ముగించిన తరువాత, ఆయన శిష్యులలో ఒకడు ఆయనతో, "ప్రభువా, యోహాను తన శిష్యులకు నేర్పినట్టుగా, ప్రార్థన చేయుటకు మాకును నేర్పుము" అని చెప్పెను.

² అందుకు ఆయన వారితో ఇట్లనెను, "మీరు ప్రార్థన చేయునప్పుడు ఇట్లనుడి: తండ్రీ, నీ నామము పరిశుద్ధపరచబడును గాక. నీ రాజ్యము వచ్చును గాక." ³ "అనుదినము మా అనుదిన ఆహారము మాకు దయచేయుము." ⁴ "మరియు మా పాపములను మాకు క్షమించుము, ఏలయనగా మేమును మాకు రుణపడిన ప్రతివానిని క్షమించుచున్నాము. మమ్మును శోధనలోనికి తేకుము."

⁵ మరియు ఆయన వారితో ఇట్లనెను, "మీలో ఎవనికైనను ఒక స్నేహితుడుండి, అతడు అర్ధరాత్రివేళ అతనియొద్దకు వెళ్లి, 'స్నేహితుడా, నాకు మూడు రొట్టెలు అప్పుగా ఇమ్ము; ⁶ నా స్నేహితుడొకడు ప్రయాణమై నాయొద్దకు వచ్చియున్నాడు, అతని ముందు పెట్టుటకు నాయొద్ద ఏమియు లేదు' అని అతనితో చెప్పినయెడల, ⁷ అతడు లోపలినుండి, 'నన్ను తొందరపెట్టకుము; తలుపు ఇప్పుడు వేయబడియున్నది, నా పిల్లలు నాతోకూడ పడకమీద ఉన్నారు; నేను లేచి నీకేమియు ఇయ్యజాలను' అని ఉత్తరమిచ్చునా? ⁸ "నేను మీతో చెప్పునదేమనగా, అతడు తన స్నేహితుడైనందున లేచి అతనికేమియు ఇయ్యకపోయినను, అతని సిగ్గుమాలిన పట్టుదలనుబట్టి లేచి అతనికి కావలసినవన్నియు ఇచ్చును."

⁹ "నేను మీతో చెప్పునదేమనగా, అడుగుడి, మీకియ్యబడును; వెదకుడి, మీకు దొరకును; తట్టుడి, మీకు తెరవబడును. ¹⁰ "ఏలయనగా అడుగు ప్రతివాడు పొందును, వెదకువానికి దొరకును, తట్టువానికి తెరవబడును.

¹¹ "మీలో తండ్రియైనవాడెవడైనను తన కుమారుడు చేపను అడిగినయెడల, చేపకు బదులుగా అతనికి పామునిచ్చునా; ¹² లేక అతడు గ్రుడ్డును అడిగినయెడల, అతనికి తేలునిచ్చునా? ¹³ "చెడ్డవారైన మీరే మీ పిల్లలకు మంచి యీవులను ఇయ్య నెరిగియుండగా, పరలోకమునందున్న తండ్రి తన్ను అడుగువారికి పరిశుద్ధాత్మను ఎంతో నిశ్చయముగా అనుగ్రహించును గదా!"

మన తండ్రి రాజ్యము వచ్చినది

¹⁴ ఆయన మూగదైన ఒక దయ్యమును వెళ్లగొట్టుచుండెను. ఆ దయ్యము వెడలిపోగా, ఆ మూగవాడు మాటలాడెను; అందుకు జనసమూహములు ఆశ్చర్యపడిరి. ¹⁵ అయితే వారిలో కొందరు, "ఇతడు దయ్యముల అధిపతియైన బయెల్జెబూలువలన దయ్యములను వెళ్లగొట్టుచున్నాడు" అనిరి; ¹⁶ మరికొందరు ఆయనను శోధించుచు, ఆకాశమునుండి ఒక సూచకక్రియను ఆయనయొద్ద అడుగుచుండిరి. ¹⁷ అయితే ఆయన వారి ఆలోచనలను ఎరిగి వారితో ఇట్లనెను, "తనకు తానే విరోధముగా వేరుపడిన ప్రతి రాజ్యము పాడైపోవును, ఇంటికి విరోధముగా వేరుపడిన ఇల్లు కూలిపోవును. ¹⁸ "సాతానును తనకు తానే విరోధముగా వేరుపడినయెడల, వాని రాజ్యమెట్లు నిలుచును? ఏలయనగా నేను బయెల్జెబూలువలన దయ్యములను వెళ్లగొట్టుచున్నానని మీరు చెప్పుచున్నారు. ¹⁹ "నేను బయెల్జెబూలువలన దయ్యములను వెళ్లగొట్టినయెడల, మీ కుమారులు ఎవరివలన వాటిని వెళ్లగొట్టుచున్నారు? కావున వారే మీకు తీర్పరులై యుందురు. ²⁰ "అయితే నేను మన తండ్రి వ్రేలితో దయ్యములను వెళ్లగొట్టుచున్నయెడల, మన తండ్రి రాజ్యము మీ మీదికి వచ్చియున్నది.

²¹ "బలవంతుడు పూర్ణాయుధములు ధరించి తన నగరును కాచుకొనుచుండగా, అతని ఆస్తి భద్రముగా ఉండును. ²² "అయితే అతనికంటె బలవంతుడైనవాడు అతనిమీదికి వచ్చి అతని జయించినప్పుడు, అతడు నమ్ముకొనిన ఆయుధములను తీసివేసి, తన దోపుడుసొమ్మును పంచిపెట్టును.

²³ "నాతోకూడ ఉండనివాడు నాకు విరోధి; నాతోకూడ పోగుచేయనివాడు చెదరగొట్టువాడు.

²⁴ "అపవిత్రాత్మ ఒక మనుష్యునిలోనుండి వెడలిపోయిన తరువాత, అది విశ్రాంతి వెదకుచు నీళ్లులేని చోట్లలో తిరుగుచు, ఏమియు దొరకకపోయినప్పుడు, 'నేను వదలివచ్చిన నా యింటికి తిరిగి వెళ్లుదును' అని చెప్పుకొనును. ²⁵ "అది వచ్చినప్పుడు, ఆ ఇల్లు ఊడ్చి చక్కబెట్టబడియుండుట చూచును. ²⁶ "అప్పుడు అది వెళ్లి, తనకంటె చెడ్డవైన మరి యేడు ఆత్మలను వెంటబెట్టుకొనివచ్చును; అవి లోపల ప్రవేశించి అక్కడ నివసించును. అప్పుడు ఆ మనుష్యుని కడపటి స్థితి మొదటి స్థితికంటె చెడ్డదగును."

²⁷ ఆయన ఈ మాటలు చెప్పుచుండగా, జనసమూహములో ఒక స్త్రీ తన కంఠమెత్తి ఆయనతో, "నిన్ను మోసిన గర్భమును, నీవు కుడిచిన స్తనములును ధన్యములు" అనెను.

²⁸ అయితే ఆయన, "అవునుగాని, మన తండ్రి వాక్యమును విని దాని ప్రకారము నడుచుకొనువారే ధన్యులు" అనెను.

యోనా కంటె గొప్పవాడు ఇక్కడ ఉన్నాడు

²⁹ జనసమూహములు గుంపుగూడుచుండగా, ఆయన ఇట్లు చెప్పసాగెను, "ఈ తరము వారు దుష్టతరమైనవారు. వారు సూచకక్రియను వెదకుచున్నారుగాని, యోనా సూచకక్రియ తప్ప మరి ఏ సూచకక్రియయు వారికి ఇయ్యబడదు. ³⁰ "యోనా నీనెవె పట్టణపువారికి ఏలాగు సూచనగా ఉండెనో, ఆలాగే మనుష్యకుమారుడును ఈ తరమువారికి సూచనగా ఉండును. ³¹ "దక్షిణదేశపు రాణి తీర్పు దినమున ఈ తరపు మనుష్యులతోకూడ లేచి వారిమీద నేరము మోపును; ఏలయనగా ఆమె సొలొమోను జ్ఞానము వినుటకు భూదిగంతములనుండి వచ్చెను; ఇదిగో, సొలొమోనుకంటె గొప్పవాడు ఇక్కడ ఉన్నాడు. ³² "నీనెవె మనుష్యులు తీర్పు దినమున ఈ తరమువారితోకూడ లేచి దానిమీద నేరము మోపుదురు; ఏలయనగా వారు యోనా బోధను విని మారుమనస్సు పొందిరి; ఇదిగో, యోనాకంటె గొప్పవాడు ఇక్కడ ఉన్నాడు.

శరీరపు దీపము

³³ "ఎవడును దీపము వెలిగించి, దానిని నేలమాళిగలోనైనను కుంచముక్రిందనైనను ఉంచడుగాని, లోపలికి వచ్చువారికి వెలుగు కనబడునట్లు దీపస్తంభముమీద ఉంచును. ³⁴ "నీ కన్ను నీ శరీరమునకు దీపము. నీ కన్ను తేటగా ఉన్నప్పుడు నీ శరీరమంతయు వెలుగుతో నిండియుండును; అది చెడినదైనప్పుడు నీ శరీరము చీకటితో నిండియుండును. ³⁵ "కావున నీలోనున్న వెలుగు చీకటిగా ఉండకుండ జాగ్రత్తపడుము. ³⁶ "కాబట్టి నీ శరీరమంతయు వెలుగుతో నిండియుండి, చీకటిగా ఉన్న భాగమేదియు లేనియెడల, దీపము తన కిరణములచేత నీకు వెలుగిచ్చునట్లు, అది పూర్తిగా వెలుగుమయమై యుండును."

వట్టి మతాచారానికి శ్రమ

³⁷ ఆయన మాటలాడుచుండగా, ఒక పరిసయ్యుడు తనతోకూడ భోజనము చేయుమని ఆయనను వేడుకొనెను; అందుకు ఆయన లోపలికి వెళ్లి భోజనపంక్తిని కూర్చుండెను. ³⁸ ఆయన భోజనమునకు ముందుగా చేతులు కడుగుకొనలేదని చూచి ఆ పరిసయ్యుడు ఆశ్చర్యపడెను. ³⁹ అప్పుడు ప్రభువు అతనితో ఇట్లనెను, "పరిసయ్యులారా, మీరు గిన్నెయు పళ్లెమును వెలుపల శుభ్రము చేయుదురుగాని, మీ లోపల దోపుడుతోను దుష్టత్వముతోను నిండియున్నారు. ⁴⁰ "అవివేకులారా! వెలుపలిది చేసినవాడు లోపలిదికూడ చేయలేదా? ⁴¹ "అయితే లోపలనున్నవాటిని దరిద్రులకు ధర్మముగా ఇయ్యుడి; అప్పుడు మీకు సమస్తమును శుభ్రమగును. ⁴² "అయితే పరిసయ్యులారా, మీకు శ్రమ! ఏలయనగా మీరు పుదీనాలోను, సదాపాకులోను, ప్రతి కూరాకులోను పదియవ వంతు చెల్లించి, న్యాయమును మన తండ్రి ప్రేమను నిర్లక్ష్యము చేయుదురు. వీటిని నిర్లక్ష్యము చేయకుండ వాటిని చేయవలసియుండెను. ⁴³ "పరిసయ్యులారా, మీకు శ్రమ! ఏలయనగా మీరు సమాజమందిరములలో అగ్రపీఠములను, సంతవీధులలో వందనములను ప్రేమించుదురు. ⁴⁴ "మీకు శ్రమ! ఏలయనగా మీరు కనబడని సమాధులవలె ఉన్నారు; మనుష్యులు వాటిని తెలియకయే వాటిమీద నడుచుదురు."

⁴⁵ ధర్మశాస్త్రోపదేశకులలో ఒకడు ఆయనతో, "బోధకుడా, నీవు ఈ మాటలు చెప్పి మమ్మునుకూడ అవమానపరచుచున్నావు" అనెను.

⁴⁶ అందుకాయన ఇట్లనెను, "ధర్మశాస్త్రోపదేశకులారా, మీకును శ్రమ! ఏలయనగా మీరు మోయశక్యముకాని భారములను మనుష్యులమీద మోపుదురు; మీరైతే ఆ భారములను మీ వ్రేళ్లలో ఒకదానితోనైనను తాకరు. ⁴⁷ "మీకు శ్రమ! ఏలయనగా మీరు ప్రవక్తల సమాధులను కట్టుదురు; మీ పితరులే వారిని చంపిరి. ⁴⁸ "కావున మీరు మీ పితరుల క్రియలకు సాక్షులై, వాటికి సమ్మతించుచున్నారు; ఏలయనగా వారు ప్రవక్తలను చంపిరి, మీరు వారి సమాధులను కట్టుదురు. ⁴⁹ "ఇందుచేతనే మన తండ్రి జ్ఞానము ఇట్లనెను, 'నేను వారియొద్దకు ప్రవక్తలను అపొస్తలులను పంపుదును; వారిలో కొందరిని వారు చంపి హింసించెదరు'; ⁵⁰ "లోకము పునాది వేయబడినది మొదలుకొని చిందింపబడిన ప్రవక్తలందరి రక్తమునుగూర్చి ఈ తరమువారు లెక్క యియ్యవలసివచ్చునట్లు, ⁵¹ "హేబెలు రక్తము మొదలుకొని, బలిపీఠమునకును పరిశుద్ధస్థలమునకును మధ్య నశించిన జెకర్యా రక్తమువరకు లెక్క యియ్యవలసివచ్చును. అవును, ఈ తరమువారు లెక్క యియ్యవలసివచ్చునని మీతో చెప్పుచున్నాను. ⁵² "ధర్మశాస్త్రోపదేశకులారా, మీకు శ్రమ! ఏలయనగా మీరు జ్ఞానమను తాళపుచెవిని తీసివేసితిరి. మీరైతే లోపల ప్రవేశింపలేదు, ప్రవేశించువారిని అడ్డగించితిరి."

⁵³ ఆయన అక్కడనుండి వెళ్లిపోవుచుండగా, శాస్త్రులును పరిసయ్యులును ఆయనను తీవ్రముగా విసిగింపసాగిరి; అనేక సంగతులనుగూర్చి ఆయన మాటలాడునట్లు ఆయనను రేపుచు, ⁵⁴ ఆయన నోటినుండి ఏదైనను ఒక మాట పట్టుకొనవలెనని ఆయనకొరకు పొంచియుండిరి.