యాకోబు 4

4 ¹ మీ మధ్య ఉన్న జగడాలు, పోరాటాలు దేని వలన కలుగుతున్నాయి? మీలో యుద్ధం చేస్తున్న మీ దురాశలు వలననే కదా? ² మీరు ఆశిస్తారు గాని పొందరు, కాబట్టి మీరు చంపుతారు. మీరు అత్యాశపడతారు గాని సంపాదించలేరు, కాబట్టి మీరు జగడమాడి పోరాడతారు. మీరు అడగరు కాబట్టి మీకు లేదు. ³ మీరు అడుగుతారు గాని పొందరు, ఎందుకంటే మీ స్వంత సుఖాల కోసం ఖర్చు పెట్టడానికి మీరు తప్పుగా అడుగుతారు. ⁴ వ్యభిచారులారా! లోకముతో స్నేహము మన తండ్రితో శత్రుత్వమని మీకు తెలియదా? కాబట్టి లోకముతో స్నేహితుడుగా ఉండాలని ఎవరు ఎంచుకుంటాడో, అతడు తనను తాను మన తండ్రికి శత్రువుగా చేసుకుంటాడు. ⁵ లేక, ఆయన మనలో ఉంచిన ఆత్మ రోషముతో ఆశపడుతుందని లేఖనము చెప్పేది వ్యర్థమని మీరు అనుకుంటున్నారా? ⁶ అయితే ఆయన మరింత కృపను దయచేస్తాడు. అందుకే లేఖనము ఇలా చెబుతోంది, "మన తండ్రి గర్విష్ఠులను ఎదిరిస్తాడు గాని వినయస్థులకు కృపను దయచేస్తాడు."

⁷ కాబట్టి మన తండ్రికి మిమ్మల్ని మీరు లోబరచుకోండి. అపవాదిని ఎదిరించండి, అప్పుడు అతడు మీ దగ్గర నుండి పారిపోతాడు. ⁸ మన తండ్రికి దగ్గరగా రండి, అప్పుడు ఆయన మీకు దగ్గరగా వస్తాడు. పాపులారా, మీ చేతులు కడుక్కోండి; ద్విమనస్కులారా, మీ హృదయాలను పవిత్రపరచుకోండి. ⁹ దుఃఖించండి, విలపించండి, ఏడ్వండి. మీ నవ్వును దుఃఖముగాను, మీ ఆనందమును విషాదముగాను మార్చుకోండి. ¹⁰ మన తండ్రి యెదుట మిమ్మల్ని మీరు తగ్గించుకోండి, అప్పుడు ఆయన మిమ్మల్ని హెచ్చిస్తాడు.

¹¹ సహోదర సహోదరీలారా, ఒకరికి విరోధముగా ఒకరు మాట్లాడకండి. తన సహోదరునికి విరోధముగా మాట్లాడేవాడు, లేక తన సహోదరునికి తీర్పు తీర్చేవాడు, ధర్మశాస్త్రమునకు విరోధముగా మాట్లాడి ధర్మశాస్త్రమునకు తీర్పు తీరుస్తాడు. అయితే నీవు ధర్మశాస్త్రమునకు తీర్పు తీరిస్తే, నీవు ధర్మశాస్త్రమునకు లోబడేవాడవు కావు — దానికి తీర్పు తీర్చేవాడవే. ¹² ధర్మశాస్త్రమును ఇచ్చినవాడు, తీర్పు తీర్చేవాడు ఒక్కడే; రక్షించుటకును నశింపజేయుటకును శక్తిగలవాడు ఆయనే. అయితే నీ పొరుగువానికి తీర్పు తీర్చుటకు నీవెవడవు?

రేపటి గురించి అతిశయపడకుము

¹³ "నేడైనా రేపైనా మేము ఈ పట్టణమునకో ఆ పట్టణమునకో వెళ్లి, అక్కడ ఒక సంవత్సరము గడిపి, వ్యాపారము చేసి, లాభము సంపాదిస్తాము" అని చెప్పేవారలారా, ఇప్పుడు వినండి ¹⁴ —రేపు ఏమి జరుగునో మీకు తెలియదు కూడా. మీ జీవితమేమిటి? మీరు కొంతసేపు కనబడి, ఆ తరువాత మాయమైపోయే ఆవిరి మాత్రమే. ¹⁵ దానికి బదులుగా మీరు, "మన తండ్రి చిత్తమైతే, మేము బ్రతికి ఇది గాని అది గాని చేస్తాము" అని చెప్పాలి. ¹⁶ అయితే ఇప్పుడు మీరు మీ అహంకారములో అతిశయపడుతున్నారు. అటువంటి అతిశయమంతా చెడ్డది. ¹⁷ కాబట్టి మంచి చేయవలసినదాన్ని ఎరిగి కూడా దాన్ని చేయనివానికి అది పాపమే.