యెహెజ్కేలు 5

5 ¹ మనుష్యకుమారుడా, నీవు ఒక పదునైన కత్తిని తీసుకొని దానిని క్షురకుని మంగలికత్తిగా ఉపయోగించి, నీ తలమీదను నీ గడ్డముమీదను దానిని పోనిమ్ము. తరువాత తూకపు త్రాసును తీసుకొని ఆ వెంట్రుకలను భాగించుము. ² ముట్టడి దినములు పూర్తియైనప్పుడు పట్టణము మధ్యలో మూడవ భాగమును అగ్నితో కాల్చుము. మూడవ భాగమును తీసికొని పట్టణము చుట్టూ కత్తితో కొట్టుము. మూడవ భాగమును గాలికి చెదరగొట్టుము, నేను వారిని దూసిన కత్తితో వెంబడించెదను. ³ వాటిలో కొన్నిటిని తీసికొని నీ వస్త్రపు అంచులలో కట్టుకొనుము. ⁴ మరల వీటిలో కొన్నిటిని తీసికొని అగ్నిలో వేసి, అగ్నితో కాల్చుము. దానినుండి ఇశ్రాయేలు వంశమంతటిమీదికి అగ్ని వ్యాపించును.

⁵ సర్వాధిపతియైన తండ్రి ఈలాగు సెలవిచ్చుచున్నాడు: ఇది యెరూషలేము. నేను ఆమెను జనముల మధ్యలో ఉంచితిని, ఆమె చుట్టూ దేశములను ఉంచితిని. ⁶ అయితే ఆమె జనముల కంటె ఎక్కువ దుర్మార్గముగా నా న్యాయవిధులకు విరోధముగాను, ఆమె చుట్టునున్న దేశముల కంటె ఎక్కువగా నా కట్టడలకు విరోధముగాను తిరుగుబాటు చేసెను; వారు నా న్యాయవిధులను నిరాకరించి, నా కట్టడలలో నడువలేదు.

⁷ కావున సర్వాధిపతియైన తండ్రి ఈలాగు సెలవిచ్చుచున్నాడు: నీ చుట్టునున్న జనముల కంటె నీవు ఎక్కువ తిరుగుబాటు చేసి, నా కట్టడలలో నడవక, నా న్యాయవిధులను గైకొనక, నీ చుట్టునున్న జనముల న్యాయవిధుల ప్రకారమైనను నడువలేదు గనుక— ⁸ కావున సర్వాధిపతియైన తండ్రి ఈలాగు సెలవిచ్చుచున్నాడు: ఇదిగో, నేనే నీకు విరోధిని, జనముల కన్నుల యెదుట నీ మధ్యలో తీర్పులు జరిగించెదను. ⁹ నీ హేయమైన కార్యములన్నిటిని బట్టి నేను ఇంతకుమునుపెన్నడును చేయనిదియు, ఇకమీదట ఎన్నడును చేయనిదియునైన దానిని నీ మధ్యలో చేసెదను. ¹⁰ కావున నీ మధ్యలో తలిదండ్రులు తమ పిల్లలను తినెదరు, పిల్లలు తమ తలిదండ్రులను తినెదరు. నేను నీమీద తీర్పులు జరిగించి, నీలో మిగిలినదానినంతటిని ప్రతి గాలికి చెదరగొట్టెదను.

¹¹ కావున నా జీవముతోడని సర్వాధిపతియైన తండ్రి సెలవిచ్చుచున్నాడు: నీ నీచమైన వస్తువులన్నిటితోను, నీ హేయమైన కార్యములన్నిటితోను నీవు నా పరిశుద్ధ స్థలమును అపవిత్రపరచితివి గనుక నేనే వెనుకకు తగ్గెదను; ఎవరిని కరుణింపను, జాలిచూపను. ^a a v11 దేవుడు 'వెనుకకు తగ్గుట' అనగా ఆయన తన కాపుదల, కనికరమును యెరూషలేమునుండి తొలగించుకొనుట. ¹² నీలో మూడవ భాగము తెగులుచేత చచ్చును లేక నీ మధ్యలో కరవుచేత క్షీణించును; మూడవ భాగము నీ చుట్టూ కత్తిచేత కూలును; మూడవ భాగమును నేను ప్రతి గాలికి చెదరగొట్టి, దూసిన కత్తితో వారిని వెంబడించెదను.

¹³ అప్పుడు నా కోపము తీరును, వారిమీద నా క్రోధమును తీర్చుకొని నెమ్మది పొందెదను. నేను వారిమీద నా క్రోధమును తీర్చుకొనినప్పుడు, వారి తండ్రినైన నేను నా ఆసక్తితో మాటలాడితినని వారు తెలిసికొందురు.

¹⁴ నీ చుట్టునున్న జనములలో, దాటిపోవువారందరి కన్నుల యెదుట, నిన్ను పాడుగాను నిందగాను చేసెదను. ¹⁵ కోపముతోను క్రోధముతోను ఉగ్రమైన గద్దింపులతోను నేను నీమీద తీర్పులు జరిగించునప్పుడు, నీ చుట్టునున్న జనములకు నీవు నింద, ఎగతాళి, హెచ్చరిక, భయకారణము అగుదువు. నీ తండ్రినైన నేను మాటలాడితిని. ¹⁶ కరవు అను ప్రాణాంతకమైన బాణములను, నిన్ను నశింపజేయుటకు నేను పంపు నాశనకరమైన బాణములను నీమీదికి పంపునప్పుడు, నీమీద కరవును అధికము చేసి, నీ ఆహారపు ఆధారమును కొట్టివేసెదను. ¹⁷ నీమీదికి కరవును క్రూరమృగములను పంపెదను, అవి నిన్ను సంతానహీనునిగా చేయును. తెగులును రక్తపాతమును నీ గుండా వ్యాపించును, నీమీదికి కత్తిని రప్పించెదను. నీ తండ్రినైన నేను మాటలాడితిని.