అపొస్తలుల కార్యములు 3

3 ¹ ప్రార్థన సమయమందు, అనగా మధ్యాహ్నం సుమారు మూడు గంటలకు, పేతురును యోహానును దేవాలయమునకు వెళ్లుచుండిరి. ² పుట్టుకనుండి కుంటివాడైన ఒక మనుష్యుని మోసికొని వచ్చుచుండిరి; దేవాలయములోనికి ప్రవేశించువారియొద్ద భిక్షమెత్తుటకై, సుందరము అను పేరుగల దేవాలయ ద్వారమునొద్ద ప్రతిదినము వానిని ఉంచుచుండిరి. ³ పేతురును యోహానును దేవాలయములోనికి ప్రవేశింపబోవుట చూచి వాడు వారిని డబ్బు అడిగెను. ⁴ పేతురు యోహానుతో కూడ వానివైపు తేరిచూచి, "మావైపు చూడుము" అనెను. ⁵ వారియొద్ద ఏదైన పొందవలెనని ఆశించి వాడు వారివైపు లక్ష్యముంచి చూచెను. ⁶ అయితే పేతురు, "వెండి బంగారములు నాయొద్ద లేవు; నాయొద్ద ఉన్నదానిని నీకిచ్చుచున్నాను. నజరేయుడైన యేసుక్రీస్తు నామమున లేచి నడువుము" అనెను. ⁷ కుడిచేయి పట్టుకొని వానిని లేవనెత్తగా, వెంటనే వాని పాదములును చీలమండలును బలము పొందెను. ⁸ వాడు గంతువేసి నిలువబడి నడువసాగెను; నడుచుచు గంతులువేయుచు మన తండ్రిని స్తుతించుచు వారితో కూడ దేవాలయములోనికి ప్రవేశించెను. ⁹ వాడు నడుచుచు మన తండ్రిని స్తుతించుట ప్రజలందరు చూచిరి. ¹⁰ దేవాలయపు సుందర ద్వారమునొద్ద భిక్షమెత్తుచు కూర్చుండువాడు వీడేయని వారు గుర్తించి, వానికి సంభవించినదానినిబట్టి ఆశ్చర్యముతోను విస్మయముతోను నిండిపోయిరి.

పేతురు తండ్రి సేవకుని ప్రకటించుట

¹¹ వాడు పేతురును యోహానును పట్టుకొనియుండగా, ప్రజలందరు మిక్కిలి విస్మయమొంది సొలొమోను మంటపమనబడు చోటికి వారియొద్దకు పరుగెత్తికొని వచ్చిరి. ¹² పేతురు అది చూచి ప్రజలతో ఇట్లనెను: "ఇశ్రాయేలు ప్రజలారా, దీనినిగూర్చి మీరేల ఆశ్చర్యపడుచున్నారు? మా స్వశక్తిచేతనైనను భక్తిచేతనైనను వీడు నడుచునట్లు చేసినట్లు మావైపు మీరేల తేరిచూచుచున్నారు? ¹³ అబ్రాహాము ఇస్సాకు యాకోబుల తండ్రి, మన పితరుల తండ్రి, తన సేవకుడైన యేసును మహిమపరచెను; ఆయనను పిలాతు విడుదల చేయ నిశ్చయించుకొనినప్పటికి, మీరు ఆయనను అప్పగించి ఆయన ఎదుట ఆయనను నిరాకరించితిరి. ¹⁴ అయితే మీరు పరిశుద్ధుడును నీతిమంతుడునైన వానిని నిరాకరించి, ఒక నరహంతకుని మీకు అనుగ్రహింపవలెనని అడిగితిరి; ¹⁵ జీవాధికారిని మీరు చంపితిరి; ఆయనను మన తండ్రి మృతులలోనుండి లేపెను. దీనికి మేము సాక్షులము. ¹⁶ ఆయన నామము — ఆయన నామమునందలి విశ్వాసముద్వారా — మీరు చూచి యెరుగుచున్న యీ మనుష్యుని బలపరచెను. యేసునందలి విశ్వాసమే మీ కన్నుల యెదుటనే వీనికి యీ సంపూర్ణ ఆరోగ్యము దయచేసెను.

¹⁷ "సహోదరులారా, మీ అధికారులు చేసినట్లే మీరును తెలియకయే యిట్లు చేసితిరని నేనెరుగుదును. ¹⁸ అయితే తన క్రీస్తు శ్రమపడవలెనని మన తండ్రి ప్రవక్తలందరిద్వారా ముందుగా తెలియజేసినదానిని ఆయన ఈలాగున నెరవేర్చెను. ¹⁹ కావున మీ పాపములు తుడిచివేయబడునట్లు మారుమనస్సు పొంది తిరిగిరండి; ²⁰ అప్పుడు మన తండ్రి సన్నిధినుండి విశ్రాంతికాలములు వచ్చును, మీ నిమిత్తము నియమింపబడిన క్రీస్తును, అనగా యేసును, ఆయన పంపును; ²¹ సమస్తమును పునరుద్ధరించు కాలము వచ్చువరకు పరలోకము ఆయనను చేర్చుకొనవలెను; దీనినిగూర్చి మన తండ్రి పూర్వకాలమునుండి తన పరిశుద్ధ ప్రవక్తలద్వారా చెప్పెను. ²² మోషే యిట్లనెను: 'మీ తండ్రి మీ సహోదరులలోనుండి నావంటి ఒక ప్రవక్తను మీకొరకు లేపును. ఆయన మీతో చెప్పు ప్రతిదానిలో మీరు ఆయన మాట వినవలెను. ²³ ఆ ప్రవక్త మాట విననివాడెవడైనను ప్రజలలోనుండి బొత్తిగా నాశనము చేయబడును.' ²⁴ మరియు సమూయేలు మొదలుకొని ఆయన తరువాత వచ్చిన ప్రవక్తలందరు, ఎవరు మాటలాడిరో వారందరును ఈ దినములనుగూర్చి ప్రకటించిరి. ²⁵ మీరు ప్రవక్తల సంతానమును, మన తండ్రి మీ పితరులతో చేసిన నిబంధన సంతానమునైయున్నారు; 'నీ సంతానమునందు భూమిలోని వంశములన్నియు ఆశీర్వదింపబడును' అని ఆయన అబ్రాహాముతో చెప్పెను. ²⁶ మన తండ్రి తన సేవకుని లేపి, మీలో ప్రతివానిని వాని దుష్టత్వమునుండి మళ్లించి మిమ్మును ఆశీర్వదించుటకు, మొదట మీయొద్దకే ఆయనను పంపెను."