1 దినవృత్తాంతములు 18

18 ¹ఇది జరిగిన తరువాత దావీదు ఫిలిష్తీయులను ఓడించి వారిని లొంగదీసుకొని, గాతును దాని గ్రామాలను ఫిలిష్తీయుల చేతిలోనుండి తీసుకొనెను. ²అతడు మోయాబును కూడా ఓడించెను; మోయాబీయులు దావీదుకు లోబడి కప్పము చెల్లించువారైరి.

³దావీదు తన అధికారమును యూఫ్రటీసు నదివరకు విస్తరింపజేయబోవుచు, హమాతువరకు జోబా రాజైన హదదెజెరును ఓడించెను. ⁴దావీదు అతనినుండి 1,000 రథములను, 7,000 గుఱ్ఱపు రౌతులను, 20,000 కాల్బలమును పట్టుకొనెను. అతడు నూరు రథములకు చాలినంత గుఱ్ఱములను ఉంచుకొని, మిగిలిన రథపు గుఱ్ఱములన్నిటి కాలి నరములను తెగగొట్టెను. ⁵దమస్కు అరాము జోబా రాజైన హదదెజెరుకు సహాయము చేయవచ్చినప్పుడు, దావీదు ఇరువది రెండువేల మంది అరామీయులను హతమార్చెను. ⁶దావీదు అరాము-దమస్కులో దండు కావలిదళములను ఉంచెను; అరామీయులు కప్పము చెల్లించుచు అతనికి దాసులైరి. దావీదు వెళ్లిన ప్రతిచోటను మన తండ్రి అతనికి విజయమును అనుగ్రహించెను. ⁷హదదెజెరు అధికారులు మోసిన బంగారు డాళ్లను దావీదు తీసికొని యెరూషలేముకు తెచ్చెను. ⁸హదదెజెరు పట్టణములైన తిబ్హాతు మరియు కూను నుండి దావీదు విస్తారమైన ఇత్తడిని తీసుకొనెను; దానితో సొలొమోను ఇత్తడి సముద్రమును, స్తంభములను, ఇత్తడి పాత్రలను చేయించెను.

⁹జోబా రాజైన హదదెజెరు సైన్యమంతటిని దావీదు ఓడించెనని హమాతు రాజైన తోయు వినినప్పుడు, ¹⁰తోయుతో అనేకసార్లు యుద్ధము చేసిన హదదెజెరుతో పోరాడి అతనిని ఓడించినందుకు దావీదు రాజును పలకరించి ఆశీర్వదించుటకు అతడు తన కుమారుడైన హదోరామును పంపెను; అతడు బంగారము, వెండి, ఇత్తడితో చేసిన సకల విధములైన వస్తువులను తీసుకొనివచ్చెను. ¹¹దావీదు రాజు తాను ఎదోము, మోయాబు, అమ్మోనీయులు, ఫిలిష్తీయులు, అమాలేకు అను సకల జనములనుండి తీసుకొనిన వెండి బంగారములతోపాటు వీటిని మన తండ్రికి ప్రతిష్ఠించెను.

¹²జెరూయా కుమారుడైన అబీషై ఉప్పు లోయలో పదునెనిమిదివేల మంది ఎదోమీయులను హతమార్చెను. ¹³దావీదు ఎదోములో దండు కావలిదళములను ఉంచెను; ఎదోమీయులందరు అతనికి లోబడిరి, దావీదు వెళ్లిన ప్రతిచోటను మన తండ్రి అతనికి విజయమును అనుగ్రహించెను.

దావీదు న్యాయముతోను నీతితోను రాజ్యపాలన చేస్తాడు

¹⁴ఈలాగున దావీదు ఇశ్రాయేలీయులందరిమీద రాజ్యపాలన చేయుచు, తన ప్రజలందరికి న్యాయమును నీతిని జరిగించెను. ¹⁵జెరూయా కుమారుడైన యోవాబు సైన్యమునకు అధిపతిగా ఉండెను; అహీలూదు కుమారుడైన యెహోషాపాతు లేఖికుడుగా ఉండెను; ¹⁶అహీటూబు కుమారుడైన సాదోకును అబ్యాతారు కుమారుడైన అహీమెలెకును యాజకులుగా ఉండిరి; షవ్షా కార్యదర్శిగా ఉండెను; ¹⁷యెహోయాదా కుమారుడైన బెనాయా కెరేతీయులకును పెలేతీయులకును అధిపతిగా ఉండెను; దావీదు కుమారులు రాజు ప్రక్కను ప్రధాన అధికారులుగా సేవించిరి. ^a a v17 కెరేతీయులును పెలేతీయులును దావీదు యొక్క ప్రత్యేకమైన రాజ అంగరక్షక దళములు; వీరు చాలామటుకు వృత్తిదారులైన విదేశీ సైనికులు.