சங்கீதம் 33

33 ¹ நீதிமான்களே, எங்கள் பிதாவுக்குள் களிகூருங்கள்; செம்மையானவர்களுக்குத் துதி தகுதியானது. ² சுரமண்டலத்தால் எங்கள் பிதாவைத் துதியுங்கள்; பத்து நரம்பு வீணையால் அவருக்குக் கீதம் பாடுங்கள். ³ அவருக்குப் புதிய பாட்டைப் பாடுங்கள்; ஆனந்த ஆரவாரத்தோடு திறம்பட வாசியுங்கள்.

⁴ எங்கள் பிதாவின் வார்த்தை செம்மையானது, அவருடைய செயல்கள் யாவும் உண்மையில் செய்யப்படுகின்றன. ⁵ அவர் நீதியையும் நியாயத்தையும் விரும்புகிறார்; எங்கள் பிதாவின் உடன்படிக்கை அன்பினால் பூமி நிறைந்திருக்கிறது.

⁶ எங்கள் பிதாவின் வார்த்தையால் வானங்கள் உண்டாக்கப்பட்டன, அவருடைய வாயின் சுவாசத்தால் அவற்றின் சர்வ சேனையும் உண்டாயின. ⁷ அவர் சமுத்திரத்தின் தண்ணீர்களை குவியலைப்போலச் சேர்க்கிறார்; ஆழங்களைத் தம்முடைய களஞ்சியங்களில் வைக்கிறார். ⁸ பூமியனைத்தும் எங்கள் பிதாவுக்குப் பயப்படக்கடவது; உலகத்தின் குடிகளெல்லாம் அவருக்கு முன்பாகப் பயபக்தியாய் நிற்பார்களாக. ⁹ அவர் சொல்ல, அது உண்டாயிற்று; அவர் கட்டளையிட, அது நிலைநின்றது.

¹⁰ எங்கள் பிதா ஜாதிகளின் ஆலோசனையை வீணாக்குகிறார்; ஜனங்களின் திட்டங்களைப் பயனற்றதாக்குகிறார். ¹¹ எங்கள் பிதாவின் ஆலோசனை என்றென்றைக்கும் நிலைநிற்கிறது, அவருடைய இருதயத்தின் திட்டங்கள் தலைமுறை தலைமுறையாய் நிலைத்திருக்கும்.

¹² எங்கள் பிதாவைத் தம் பிதாவாகக் கொண்ட ஜாதி பாக்கியமுள்ளது, அவர் தமக்குச் சொந்த சுதந்தரமாகத் தெரிந்துகொண்ட ஜனங்கள் பாக்கியமுள்ளவர்கள். ¹³ வானத்திலிருந்து எங்கள் பிதா நோக்கிப்பார்க்கிறார்; மனுஷர் யாவரையும் காண்கிறார். ¹⁴ தாம் வாசம்பண்ணும் இடத்திலிருந்து அவர் பூமியின் குடிகள் அனைவரையும் கண்ணோக்குகிறார். ¹⁵ அவர் அவர்கள் எல்லாருடைய இருதயங்களையும் உருவாக்குகிறார்; அவர்களுடைய செய்கைகள் யாவையும் ஆராய்ந்தறிகிறார்.

¹⁶ எந்த ராஜாவும் தன் சேனையின் மிகுதியால் இரட்சிக்கப்படுவதில்லை; வீரன் தன் மிகுந்த பலத்தால் தப்புவிக்கப்படுவதில்லை. ¹⁷ குதிரை ஜெயத்திற்குப் பொய்யான நம்பிக்கையாயிருக்கிறது; அதின் மிகுந்த பலத்தினாலும் அது தப்புவிக்கமாட்டாது.

¹⁸ ஆனால் எங்கள் பிதாவின் கண் அவருக்குப் பயந்தவர்கள்மேலும், அவருடைய உடன்படிக்கை அன்பில் நம்பிக்கை வைக்கிறவர்கள்மேலும் இருக்கிறது, ¹⁹ அவர்களுடைய ஆத்துமாவை மரணத்திற்குத் தப்புவிக்கவும், பஞ்சத்தில் அவர்களை உயிரோடே காக்கவுமே.

²⁰ நம்முடைய ஆத்துமா எங்கள் பிதாவுக்குக் காத்திருக்கிறது; அவரே நம்முடைய துணையும் நம்முடைய கேடகமுமாயிருக்கிறார். ²¹ நம்முடைய இருதயம் அவருக்குள் மகிழ்ச்சியாயிருக்கிறது, அவருடைய பரிசுத்த நாமத்தில் நாம் நம்பிக்கை வைக்கிறோம். ²² எங்கள் பிதாவே, நாங்கள் உம்மில் நம்பிக்கை வைத்திருக்கிறபடியே, உம்முடைய உடன்படிக்கை அன்பு எங்கள்மேல் இருப்பதாக.