எண்ணாகமம் 31

31 ¹எங்கள் பிதா மோசேயை நோக்கி:

²“இஸ்ரவேல் புத்திரருக்காக மீதியானியரிடத்தில் பழிவாங்கு; அதற்குப்பின் நீ உன் ஜனத்தாரோடே சேர்த்துக்கொள்ளப்படுவாய்” என்றார்.

³அப்பொழுது மோசே ஜனங்களை நோக்கி: “உங்களில் சிலரை யுத்தத்திற்கு ஆயுதம் தரிக்கச்செய்யுங்கள்; அவர்கள் மீதியானுக்கு விரோதமாய்ப் போய், எங்கள் பிதாவின் நீதியை மீதியானின்மேல் நிறைவேற்றட்டும். ⁴இஸ்ரவேலின் கோத்திரங்கள் ஒவ்வொன்றிலிருந்தும் 1,000 பேரை யுத்தத்திற்கு அனுப்பவேண்டும்” என்றான். ⁵அப்படியே இஸ்ரவேலின் ஆயிரங்களிலிருந்து ஒவ்வொரு கோத்திரத்திற்கு 1,000 பேராக, யுத்தத்திற்கு ஆயுதம் தரித்த 12,000 பேர் நியமிக்கப்பட்டார்கள். ⁶ஒவ்வொரு கோத்திரத்திலிருந்தும் 1,000 பேராக மோசே அவர்களை யுத்தத்திற்கு அனுப்பினான்; ஆசாரியனாகிய எலெயாசாரின் குமாரன் பினெகாசையும், பரிசுத்த ஸ்தலத்தின் பரிசுத்த பணிமுட்டுகளையும், அவன் கையில் எக்காளங்களையும் அவர்களோடே அனுப்பினான். ⁷எங்கள் பிதா மோசேக்குக் கட்டளையிட்டபடியே அவர்கள் மீதியானுக்கு விரோதமாய் யுத்தம்பண்ணி, ஆண்மக்கள் யாவரையும் கொன்றுபோட்டார்கள். ⁸கொல்லப்பட்டவர்களோடே மீதியானின் ராஜாக்களாகிய ஏவி, ரேகேம், சூர், ஊர், ரேபா என்னும் மீதியானின் ஐந்து ராஜாக்களையும் கொன்றார்கள்; பேயோரின் குமாரனாகிய பிலேயாமையும் பட்டயத்தால் கொன்றுபோட்டார்கள். ⁹இஸ்ரவேல் புத்திரர் மீதியானின் ஸ்திரீகளையும் பிள்ளைகளையும் சிறைபிடித்து, அவர்களுடைய மிருகஜீவன்கள், ஆட்டுமந்தைகள், பொருள்கள் யாவையும் கொள்ளையிட்டார்கள். ¹⁰அவர்கள் வாசம்பண்ணின பட்டணங்கள் யாவையும், அவர்களுடைய பாளயங்கள் யாவையும் அக்கினியால் சுட்டெரித்தார்கள்; ¹¹மனுஷரும் மிருகங்களுமாகிய சகல கொள்ளையையும் சகல சூறையையும் எடுத்துக்கொண்டார்கள். ¹²சிறைப்பட்டவர்களையும் சூறையையும் கொள்ளையையும் அவர்கள் எரிகோவுக்கு எதிரே யோர்தானருகிலுள்ள மோவாபின் சமபூமியில் இருந்த பாளயத்தில், மோசேயினிடத்திற்கும், ஆசாரியனாகிய எலெயாசாரினிடத்திற்கும், இஸ்ரவேல் புத்திரரின் சபை அனைத்தினிடத்திற்கும் கொண்டுவந்தார்கள். ¹³மோசேயும், ஆசாரியனாகிய எலெயாசாரும், சபையின் பிரபுக்கள் யாவரும் பாளயத்துக்கு வெளியே அவர்களை எதிர்கொள்ளப் புறப்பட்டார்கள். ¹⁴ஆனாலும் யுத்தத்திலிருந்து திரும்பிவந்த ஆயிரம்பேருக்கு அதிபதிகளும் நூறுபேருக்கு அதிபதிகளுமாகிய சேனையின் அதிகாரிகள்மேல் மோசே கோபங்கொண்டான். ¹⁵மோசே அவர்களை நோக்கி: “நீங்கள் ஸ்திரீகள் எல்லாரையும் உயிரோடே வைத்தீர்களா? ¹⁶இதோ, இந்த ஸ்திரீகள்தான் பிலேயாமின் ஆலோசனையின்படி, பேயோரின் சம்பவத்தில் இஸ்ரவேலரை எங்கள் பிதாவுக்கு விரோதமாய்த் துரோகம்பண்ணும்படி வழிநடத்தி, எங்கள் பிதாவின் சபையின்மேல் வாதையை வரப்பண்ணினார்கள். ^a a v16 பேயோரின் சம்பவம்: இஸ்ரவேல் ஆண்கள் பாகால் ஆராதனைக்கும் விபசாரத்துக்கும் மயக்கப்பட்டு, பாளயத்தின்மேல் கொடிய வாதையை வரப்பண்ணினார்கள் (எண்ணாகமம் 25-ஐப் பார்க்கவும்). ¹⁷இப்பொழுது பிள்ளைகளில் ஆண்பிள்ளைகள் யாவரையும் கொன்றுபோடுங்கள்; புருஷனோடே சயனித்த ஸ்திரீ யாவரையும் கொன்றுபோடுங்கள். ¹⁸ஆனாலும் புருஷனோடே சயனியாத பெண்பிள்ளைகள் யாவரையும் உங்களுக்காக உயிரோடே வைத்துக்கொள்ளுங்கள்.

¹⁹நீங்கள் ஏழுநாள் பாளயத்துக்கு வெளியே தங்கியிருங்கள்; ஒருவனைக் கொன்றவனும் கொல்லப்பட்டவனைத் தொட்டவனும் மூன்றாம் நாளிலும் ஏழாம் நாளிலும் உங்களையும் உங்கள் சிறைப்பட்டவர்களையும் சுத்திகரித்துக்கொள்ளவேண்டும். ²⁰சகல வஸ்திரங்களையும், தோலினால் செய்யப்பட்ட சகல பொருள்களையும், வெள்ளாட்டு மயிரினால் செய்யப்பட்ட யாவையும், மரத்தினால் செய்யப்பட்ட சகல பொருள்களையும் சுத்திகரியுங்கள்” என்றான்.

²¹ஆசாரியனாகிய எலெயாசார் யுத்தத்திற்குப் போய்வந்த போர்வீரரை நோக்கி: “எங்கள் பிதா மோசேக்குக் கட்டளையிட்ட நியமப்பிரமாணம் இதுவே: ²²பொன், வெள்ளி, வெண்கலம், இரும்பு, தகரம், ஈயம் ஆகிய இவைகளை மாத்திரம்— ²³அக்கினியைத் தாங்கக்கூடிய யாவையும் அக்கினியிலே கடத்தவேண்டும்; அப்பொழுது அது சுத்தமாகும்; ஆயினும் அது தீட்டுக்கழிக்கும் ஜலத்தினாலும் சுத்திகரிக்கப்படவேண்டும். அக்கினியைத் தாங்கக்கூடாத யாவையும் ஜலத்திலே கடத்தவேண்டும். ²⁴ஏழாம் நாளிலே உங்கள் வஸ்திரங்களைத் தோய்த்துக்கொள்ளுங்கள், அப்பொழுது நீங்கள் சுத்தமாயிருப்பீர்கள்; பின்பு பாளயத்தில் பிரவேசிக்கலாம்” என்றான்.

கொள்ளைப்பொருளை எண்ணுதல்

²⁵எங்கள் பிதா மோசேயை நோக்கி:

²⁶“நீயும், ஆசாரியனாகிய எலெயாசாரும், சபையின் பிதாக்களுடைய வம்சத் தலைவரும், மனுஷரும் மிருகங்களுமாகிய பிடிபட்ட கொள்ளைப்பொருளின் தொகையை எண்ணுங்கள். ²⁷கொள்ளைப்பொருளை இரண்டு பங்காகப் பிரித்து, யுத்தத்திற்குப் போய்வந்த போர்வீரருக்கும் சபை அனைத்திற்கும் பங்கிடு. ²⁸யுத்தத்திற்குப் புறப்பட்ட போர்வீரரிடத்தில் மனுஷரிலும், மாடுகளிலும், கழுதைகளிலும், ஆடுகளிலும் 500-ல் ஒன்றை எனக்கு வரியாக எடுத்துக்கொள்; ²⁹அவர்களுடைய பாதிப் பங்கிலிருந்து அதை எடுத்து, எனக்குச் செலுத்தும் காணிக்கையாக ஆசாரியனாகிய எலெயாசாரிடம் கொடு. ³⁰இஸ்ரவேல் புத்திரரின் பாதிப் பங்கிலிருந்து மனுஷர், மாடுகள், கழுதைகள், ஆடுகள் ஆகிய சகல மிருகங்களிலும் 50-ல் ஒன்றை எடுத்து, என் வாசஸ்தலத்தைக் காக்கும் லேவியருக்குக் கொடு” என்றார்.

³¹எங்கள் பிதா மோசேக்குக் கட்டளையிட்டபடியே மோசேயும் ஆசாரியனாகிய எலெயாசாரும் செய்தார்கள். ³²சேனையார் கொள்ளையிட்டதில் மீதியான சூறைப்பொருள் 675,000 ஆடுகளும், ³³72,000 மாடுகளும், ³⁴61,000 கழுதைகளும், ³⁵புருஷனோடே சயனியாத ஸ்திரீகளாகிய மொத்தம் 32,000 நபர்களுமாயிருந்தது. ³⁶யுத்தத்திற்குப் புறப்பட்டவர்களுக்குச் சேர்ந்த பாதிப் பங்கு 337,500 ஆடுகளாயிருந்தது; ³⁷அவைகளில் எங்கள் பிதாவுக்குச் செலுத்தப்பட்ட வரி 675 ஆடுகள். ³⁸மாடுகள் 36,000; அவைகளில் எங்கள் பிதாவுக்குச் செலுத்தப்பட்ட வரி 72. ³⁹கழுதைகள் 30,500; அவைகளில் எங்கள் பிதாவுக்குச் செலுத்தப்பட்ட வரி 61. ⁴⁰நபர்கள் 16,000; அவர்களில் எங்கள் பிதாவுக்குச் செலுத்தப்பட்ட வரி 32. ⁴¹எங்கள் பிதா மோசேக்குக் கட்டளையிட்டபடியே, எங்கள் பிதாவுக்குச் செலுத்தும் காணிக்கையாகிய அந்த வரியை மோசே ஆசாரியனாகிய எலெயாசாருக்குக் கொடுத்தான். ⁴²யுத்தம்பண்ணின புருஷரின் பங்கிலிருந்து மோசே பிரித்துவைத்த இஸ்ரவேல் புத்திரரின் பாதிப் பங்கைப் பொறுத்தமட்டில்— ⁴³சபையின் பாதிப் பங்கு 337,500 ஆடுகளும், ⁴⁴36,000 மாடுகளும், ⁴⁵30,500 கழுதைகளும், ⁴⁶16,000 நபர்களுமாயிருந்தது. ⁴⁷இஸ்ரவேல் புத்திரரின் பாதிப் பங்கிலிருந்து மோசே மனுஷரிலும் மிருகங்களிலும் 50-ல் ஒன்றை எடுத்து, எங்கள் பிதா மோசேக்குக் கட்டளையிட்டபடியே, எங்கள் பிதாவின் வாசஸ்தலத்தைக் காக்கும் லேவியருக்குக் கொடுத்தான்.

⁴⁸சேனையின் பிரிவுகளுக்கு அதிபதிகளாகிய ஆயிரம்பேருக்கு அதிபதிகளும் நூறுபேருக்கு அதிபதிகளும் மோசேயினிடத்தில் வந்து, ⁴⁹அவனை நோக்கி: “உமது அடியார்களாகிய நாங்கள் எங்கள் அதிகாரத்தின்கீழுள்ள போர்வீரரை எண்ணிப்பார்த்தோம்; எங்களில் ஒருவரும் குறையவில்லை. ⁵⁰ஆகையால் நாங்கள் எங்கள் பிதாவுக்கு முன்பாக எங்களுக்காகப் பாவநிவிர்த்தி செய்யும்படி, ஒவ்வொருவனும் கண்டெடுத்த பொன் ஆபரணங்கள், கை அணிகள், கடகங்கள், முத்திரை மோதிரங்கள், காதணிகள், மணிகள் ஆகியவைகளை எங்கள் பிதாவுக்குக் காணிக்கையாகக் கொண்டுவந்தோம்” என்றார்கள்.

⁵¹மோசேயும் ஆசாரியனாகிய எலெயாசாரும் அவர்கள் கையிலிருந்து பொன்னையும் வேலைப்பாடமைந்த சகல ஆபரணங்களையும் வாங்கினார்கள். ⁵²ஆயிரம்பேருக்கு அதிபதிகளும் நூறுபேருக்கு அதிபதிகளும் எங்கள் பிதாவுக்குச் செலுத்திய காணிக்கையாகிய பொன் முழுவதும் ஏறக்குறைய 420 ராத்தல் இருந்தது. ⁵³போர்வீரரில் ஒவ்வொருவனும் தனக்காகக் கொள்ளையிட்டிருந்தான். ⁵⁴மோசேயும் ஆசாரியனாகிய எலெயாசாரும் ஆயிரம்பேருக்கு அதிபதிகளிடத்திலும் நூறுபேருக்கு அதிபதிகளிடத்திலும் அந்தப் பொன்னை வாங்கி, எங்கள் பிதாவுக்கு முன்பாக இஸ்ரவேல் புத்திரருக்கு ஞாபகக்குறியாக அதை ஆசரிப்புக்கூடாரத்தில் கொண்டுவந்தார்கள்.