லேவியராகமம் 11

11 ¹எங்கள் பிதா மோசேயோடும் ஆரோனோடும் பேசி, அவர்களை நோக்கி:

²“இஸ்ரவேல் புத்திரரோடே சொல்லுங்கள்: பூமியிலுள்ள சகல மிருகங்களிலும் நீங்கள் புசிக்கத்தக்க ஜீவன்கள் இவைகளே. ³மிருகங்களில் விரிகுளம்புள்ளதாய், குளம்பு இரண்டாகப் பிரிந்திருந்து, அசைபோடுகிற யாதொன்றையும் நீங்கள் புசிக்கலாம்.

⁴“ஆனாலும் அசைபோடுகிறவைகளிலும் விரிகுளம்புள்ளவைகளிலும் நீங்கள் புசிக்கலாகாதவைகள் இவைகளே: ஒட்டகம் அசைபோடும், ஆனாலும் அதற்கு விரிகுளம்பில்லை; அது உங்களுக்கு அசுத்தமாயிருக்கும். ⁵குழிமுசல் அசைபோடும், ஆனாலும் அதற்கு விரிகுளம்பில்லை; அது உங்களுக்கு அசுத்தமாயிருக்கும். ⁶முயல் அசைபோடும், ஆனாலும் அதற்கு விரிகுளம்பில்லை; அது உங்களுக்கு அசுத்தமாயிருக்கும். ⁷பன்றி விரிகுளம்புள்ளதாய், குளம்பு இரண்டாகப் பிரிந்திருந்தும், அசைபோடாது; அது உங்களுக்கு அசுத்தமாயிருக்கும். ⁸அவைகளின் மாம்சத்தைப் புசிக்கவேண்டாம், அவைகளின் உடலங்களைத் தொடவும் வேண்டாம்; அவைகள் உங்களுக்கு அசுத்தமாயிருக்கும்.

⁹“தண்ணீரில் உள்ள எல்லாவற்றிலும் நீங்கள் புசிக்கத்தக்கவைகள் இவைகளே: தண்ணீரிலும், சமுத்திரங்களிலும், நதிகளிலும் உள்ளவைகளில் சிறகும் செதிளும் உள்ள யாவையும் நீங்கள் புசிக்கலாம். ¹⁰ஆனால் சமுத்திரங்களிலும் நதிகளிலும் உள்ள, தண்ணீரில் நெளியும் யாவற்றிலும், தண்ணீரிலுள்ள சகல ஜீவன்களிலும், சிறகும் செதிளும் இல்லாதவைகள் யாவும் உங்களுக்கு அருவருப்பாயிருக்கக்கடவது. ¹¹அவைகள் உங்களுக்கு அருவருப்பாயிருக்கக்கடவது; அவைகளின் மாம்சத்தைப் புசிக்கவேண்டாம், அவைகளின் உடலங்களை அருவருப்பாய் எண்ணுங்கள். ¹²தண்ணீரில் சிறகும் செதிளும் இல்லாத யாவும் உங்களுக்கு அருவருப்பாயிருக்கும்.

¹³“பறவைகளில் இவைகளை அருவருப்பாய் எண்ணுங்கள்; இவைகளைப் புசிக்கவேண்டாம், இவைகள் அருவருப்பானவைகள்: கழுகும், கருடனும், கடலுராஞ்சியும், ¹⁴பருந்தும், அதனதன் ஜாதியான வல்லூறும், ¹⁵அதனதன் ஜாதியான சகல காக்கைகளும், ¹⁶தீக்குருவியும், இரவுக்குருவியும், கடற்குருவியும், அதனதன் ஜாதியான டேகையும், ¹⁷சிறிய ஆந்தையும், நீர்க்காக்கையும், பெரிய ஆந்தையும், ¹⁸வெள்ளை ஆந்தையும், வனாந்தர ஆந்தையும், பிணந்தின்னிக் கழுகும், ¹⁹நாரையும், அதனதன் ஜாதியான கொக்கும், புழுக்கொத்தியும், வெளவால்களும். ^a a v19 பண்டைக்காலத்தில் ‘பறவைகள்’ என்ற வகைப்பாடு இறகுள்ளவைகளை மட்டுமல்ல, பறக்கிற எல்லா ஜீவன்களையும் உள்ளடக்கியிருந்ததால், வெளவால்கள் இங்கே சேர்க்கப்பட்டுள்ளன.

²⁰“நான்கு கால்களால் நடக்கிற, சிறகுள்ள ஊரும் பிராணிகள் யாவும் உங்களுக்கு அருவருப்பாயிருக்கும். ²¹ஆயினும் நான்கு கால்களால் நடக்கிற சிறகுள்ள ஊரும் பிராணிகள் யாவற்றிலும் நீங்கள் புசிக்கத்தக்கவைகள் இவைகளே: தரையில் தாவுகிறதற்குப் பாதங்களுக்கு மேலே மூட்டுள்ள கால்களையுடையவைகளே. ²²அவைகளில் நீங்கள் புசிக்கத்தக்கவைகள் இவைகளே: அதனதன் ஜாதியான வெட்டுக்கிளியையும், மொட்டைவெட்டுக்கிளியையும், சில்வண்டையும், விட்டில்பூச்சியையும் நீங்கள் புசிக்கலாம். ²³ஆனாலும் நான்கு கால்களையுடைய மற்ற சகல சிறகுள்ள ஊரும் பிராணிகளும் உங்களுக்கு அருவருப்பாயிருக்கும்.

²⁴“இவைகளால் நீங்கள் தீட்டுப்படுவீர்கள்; அவைகளின் உடலங்களைத் தொடுகிறவன் எவனும் சாயங்காலம்வரைக்கும் தீட்டுப்பட்டிருப்பான். ²⁵அவைகளின் உடலங்களில் யாதொன்றைச் சுமக்கிறவன் தன் வஸ்திரங்களைத் தோய்த்து, சாயங்காலம்வரைக்கும் தீட்டுப்பட்டிருப்பான்.

²⁶“விரிகுளம்புள்ளதாயிருந்தும் குளம்பு முழுவதும் பிரியாத, அல்லது அசைபோடாத சகல மிருகங்களும் உங்களுக்கு அசுத்தமாயிருக்கும்; அவைகளைத் தொடுகிறவன் எவனும் தீட்டுப்படுவான். ²⁷நான்கு கால்களால் நடக்கிற சகல மிருகங்களிலும், தன் உள்ளங்கால்களால் நடக்கிற யாவும் உங்களுக்கு அசுத்தமாயிருக்கும்; அவைகளின் உடலங்களைத் தொடுகிறவன் சாயங்காலம்வரைக்கும் தீட்டுப்பட்டிருப்பான். ²⁸அவைகளின் உடலங்களைச் சுமக்கிறவன் தன் வஸ்திரங்களைத் தோய்த்து, சாயங்காலம்வரைக்கும் தீட்டுப்பட்டிருப்பான்; அவைகள் உங்களுக்கு அசுத்தமாயிருக்கும்.

²⁹“பூமியில் ஊரும் பிராணிகளில் உங்களுக்கு அசுத்தமானவைகள் இவைகளே: பெருச்சாளியும், எலியும், அதனதன் ஜாதியான பெரும்பல்லியும், ³⁰பல்லியும், உடும்பும், சுவர்ப்பல்லியும், அரணையும், பச்சோந்தியும். ³¹ஊரும் பிராணிகள் யாவற்றிலும் இவைகளே உங்களுக்கு அசுத்தமானவைகள்; இவைகள் செத்தபின் இவைகளைத் தொடுகிறவன் சாயங்காலம்வரைக்கும் தீட்டுப்பட்டிருப்பான். ³²அவைகள் செத்தபின், அவைகளில் யாதொன்று எதின்மேல் விழுகிறதோ அது தீட்டுப்படும்—மரப்பாத்திரமானாலும், வஸ்திரமானாலும், தோலானாலும், சாக்குத்துணியானாலும், வேலைக்குப் பயன்படும் எந்தக் கருவியானாலும் சரி. அது தண்ணீரில் போடப்படவேண்டும், சாயங்காலம்வரைக்கும் தீட்டாயிருந்து, பின்பு சுத்தமாகும். ³³அவைகளில் யாதொன்று விழுந்த மண்பாண்டத்தில் உள்ளதெல்லாம் தீட்டாகும்; அதை உடைத்துப்போடுங்கள். ³⁴அப்படிப்பட்ட தண்ணீர் படும் புசிக்கத்தக்க எந்த ஆகாரமும் தீட்டாகும்; அப்படிப்பட்ட பாத்திரத்தில் உள்ள எந்தப் பானமும் தீட்டாகும். ³⁵அவைகளின் உடலங்களில் யாதொன்று விழுகிற எதுவும் தீட்டாகும்; அடுப்பானாலும் சூளையானாலும் இடித்துப்போடப்படவேண்டும். அவைகள் தீட்டாயிருக்கும், உங்களுக்கும் அசுத்தமாயிருக்கும். ³⁶ஆயினும் தண்ணீர் நிற்கும் ஊற்றும் தொட்டியும் சுத்தமாயிருக்கும்; ஆனால் அவைகளின் உடலங்களைத் தொடுகிறவன் தீட்டுப்படுவான். ³⁷விதைக்கப்படும் விதையின்மேல் அவைகளின் உடலங்களில் யாதொன்று விழுந்தால், அது சுத்தமாயிருக்கும். ³⁸ஆனால் விதையின்மேல் தண்ணீர் வார்க்கப்பட்டிருந்து, அதின்மேல் அவைகளின் உடலின் ஒரு பங்கு விழுந்தால், அது உங்களுக்கு அசுத்தமாயிருக்கும்.

³⁹“நீங்கள் புசிக்கத்தக்க யாதொரு மிருகம் செத்தால், அதின் உடலத்தைத் தொடுகிறவன் சாயங்காலம்வரைக்கும் தீட்டுப்பட்டிருப்பான். ⁴⁰அதின் உடலத்தைப் புசிக்கிறவன் தன் வஸ்திரங்களைத் தோய்த்து, சாயங்காலம்வரைக்கும் தீட்டுப்பட்டிருப்பான்; அதின் உடலத்தைச் சுமக்கிறவனும் தன் வஸ்திரங்களைத் தோய்த்து, சாயங்காலம்வரைக்கும் தீட்டுப்பட்டிருப்பான்.

⁴¹“பூமியில் ஊரும் சகல பிராணிகளும் அருவருப்பானவைகள்; அவைகளைப் புசிக்கவேண்டாம். ⁴²பூமியில் ஊரும் சகல பிராணிகளிலும், வயிற்றால் நகருகிறதும், நான்கு கால்களால் நடக்கிறதும், அநேக கால்களையுடையதுமான யாதொன்றையும் புசிக்கவேண்டாம்; அவைகள் அருவருப்பானவைகள். ⁴³ஊரும் யாதொரு பிராணியினாலும் உங்களை அருவருப்பாக்கிக்கொள்ளாதிருங்கள்; அவைகளால் உங்களைத் தீட்டுப்படுத்திக்கொண்டு, அவைகளால் அசுத்தராகாதிருங்கள். ⁴⁴நான் உங்கள் பிதா; ஆகையால் உங்களை நீங்களே பரிசுத்தப்படுத்தி, பரிசுத்தராயிருங்கள், நான் பரிசுத்தராயிருக்கிறேன். தரையில் ஊரும் யாதொரு பிராணியினாலும் உங்களைத் தீட்டுப்படுத்திக்கொள்ளாதிருங்கள். ⁴⁵உங்களுக்குத் தேவனாயிருக்கும்படி உங்களை எகிப்துதேசத்திலிருந்து புறப்படப்பண்ணின உங்கள் பிதா நானே; நான் பரிசுத்தராயிருக்கிறபடியால், நீங்களும் பரிசுத்தராயிருங்கள்.”

⁴⁶மிருகங்களையும், பறவைகளையும், தண்ணீரில் நீந்தும் சகல ஜீவன்களையும், பூமியில் ஊரும் சகல பிராணிகளையும் குறித்த பிரமாணம் இதுவே; ⁴⁷அசுத்தமானதற்கும் சுத்தமானதற்கும், புசிக்கத்தக்க மிருகங்களுக்கும் புசிக்கத்தகாத மிருகங்களுக்கும் வித்தியாசம்பண்ணும்படி இதுவே.